ဖာက၊ အံက်တဝ်ဗာ (၂၇)
ပ္ဍဲဒေသ အဏာတ်ပါ၊ ပွိုၚ်ဍုၚ်ဖာက၊ တွဵုရးကချေၚ်ဂှ် ဒပ်ပၞာန်ဗၟာ ဟိုတ်နူထောံလဝ်မခတိုဟ် နကဵုက္ၜၚ်ကျာတုဲ လ္တူလၟေၚ်ဒဒှ် ဂၠိုၚ်ကဵုဒါဇြိန် ကလိဂွံဝပ်ချိုတ်အာတံဂှ် ဂကောံရပ်လွဟ်ကောန်ဍုၚ်အရၚ် EAOs မသဳကၠဳလဝ် ပရေၚ်ၜိုဟ်လလမ်တံ သ္ၚိတ်ဇြဒၟံၚ်ရောၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်တံ ပါ်ပါဲလဝ်ရ။
တုဲကၠုၚ် ဂိတုအံက်တဝ်ဗာ (၂၃) ဗ္တံ ၜိုတ် (၈) နာဍဳကဝက်ဂှ် ပ္ဍဲဒေသ အဏာတ်ပါ မၞုံတိဍာ် ဒပ်မဟာ (၉) ဂကောံဗၠးၜးကချေၚ် (KIO) ဂှ် အဃောမကၠောန်သ္ပဒၟံၚ် ပေါဲသ္ဘၚ်ဒယှ်ေဂဳတ စၟတ်သမ္တီဒစးဒုၚ် တ္ၚဲ KIO ကၠောံသၞာံဂှ် ကံၚ်ဇြဳပၞာန် ထောံလဝ်မခတိုဟ် နကဵုက္ၜၚ်ကျာဂျက်ရ။
ဟိုတ်နူထောံလဝ်မခတိုဟ် ဗ္တိုက်လဝ်ဂှ်တုဲ စဵုကဵုဂိတုအံက်တဝ်ဗာ (၂၅) ဂှ် မၞိဟ်မ္ဒးစုတိအာ နွံကၠုၚ် ပွဳပွူ (၈၀) တၠတုဲ ညးဂွံဝပ်တံလေဝ် မၞုံဒၟံၚ် ဗၞတ်ပွဳပွူ (၁၅၀) တၠရ။
စပ်ကဵုညးဍုၚ်ကွာန်ကောန်အရာပ်တံ ကလိဂွံလဝ်ဝပ် ဇီုကပိုက်ချိုတ်အာလဝ်ဂှ်တုဲ အလဵုအသဳညဳသၟဟ်ဂကူ NUG မပါလုပ် သီုကဵုဂကောံရပ်လွဟ်ကောန်ဍုၚ်အရၚ်တံ ၊ ဂကောံဇြဟတ်ပၠန်ဂတးတံ ကေုာံ ဂကောံဇြဟတ်ပရေၚ်ဍုၚ်ကွာန်တံဂှ် လလောၚ်ပ္တိတ်လဝ် တၚ်လလောၚ်တြး ဒစဵုဒစးဟီုပျုတ် ကုကံၚ်ဇြဳပၞာန် ဗီုညးကဵုညးရ။
ဆ္ဂး ဂကောံရပ်လွဟ်ကောန်ဍုၚ်အရၚ် မထ္ပက်လဝ်စၟတ်တဲ ဒေါအ်ပန်ပှော်တုဲ သဳကၠဳလဝ်ပရေၚ်ဍုၚ်ကွာန် ကုကံၚ်ဇြဳပၞာန် ၜါဝါတံဂှ် စပ်ကဵုလၟေၚ်ဒဒှ်အဏာတ်ပါဂှ်တုဲ စဵုကဵုတ္ၚဲဏံ အပ္ဍဲဗွိုၚ်ဂကောံဂှ်ကီု၊ နကဵုဂကောံက္ဍိုက်ပ် လၟေၚ်ကမၠောန်ပရေၚ်ၜိုဟ်လလမ် PPST တံကီုဂှ် လလောၚ်ပ္တိတ်လဝ် မွဲမွဲသာ် ဟွံမွဲဏီရ။
ညးလ္ၚတ်သ္ၚဳဂၠိပ် ပရေၚ်ဍုၚ်ကွာန် ဥူတာန်သဵုနာၚ်ဂှ် ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ ဒေါအ်ပန်ပှော်တံဝွံ ဒှ်ဂကောံ ဆလအ်မှ ဒစဵုဒစးဟီုဗျိ ကုဒပ်ကံၚ်ဇြဳပၞာန် မကလိလောန်ဒၟံၚ် အမှုရာဇာဝတ်ပၞာန်တံ ဟွံသေၚ်ပုဟ်ဂှ် ပါ်ပါဲလဝ်ရ။
“ကံၚ်ဇြဳပၞာန်ဂှ် တ္ၚဲဏံ ကလိလောန်ဒၟံၚ် အမှုရာဇာဝတ်ပၞာန်တံမ္ဂးလေဝ် ဒးပပၞညံၚ်ကဵုဟွံတီဂှ်တှ်ေ ဒှ်တာလျိုၚ်ညးတံရ၊ ဒၞါဲဏံသၟး ဟွံသေၚ်ပုဟ်၊ စပ်ကဵုကိစ္စ ထောံလဝ်မခတိုဟ် ကုကွးဘာတံဂှ်လေဝ် ဟွံဟီုကၠုၚ်လဝ်ပုဟ်၊ ဆလအ်မှလေဝ် ဟွံဟီုလဝ်ပုဟ်၊ မူဟိုတ်ရောတှ်ေ ညးတံဂှ် ပံၚ်ကဵုကံၚ်ဇြဳပၞာန်တုဲ ဒှ်ရဲဂၠါဲဒၟံၚ်အခေါၚ်အရာ ပရေၚ်ဍုၚ်ကွာန်ဂှ်ရ လစွံစိုတ်ကဵုကံၚ်ဇြဳပၞာန်လေဝ် ဒှ်မွဲရတုဲ လညာတ်ဟီုဂးပါ်ပါဲ ကုကံၚ်ဇြဳပၞာန်လေဝ် ဆလအ်မှ ဟွံထ္မံက်ထ္ၜးလဝ်ပုဟ်၊ ဟိုတ်ဂှ်ရ ပ္ဍဲအခိၚ်ကာလဏံ သ္ၚိတ်ဇြဒၟံၚ် ညးသ္ကအ်အိုတ်ရ” ဂှ် ညးဟီုရ။
ဗွဲကြဴ ဒပ်ပၞာန်သီအဝဵု ကၟိန်ဍုၚ်ဗၟာတုဲဂှ် ပွမဗ္တိုက်ကဵုက္ၜၚ်ကျာ အလုံကၟိန်ဍုၚ်မွဲဂှ် ကၠောန်သ္ပလဝ် ဗ္ဒါဲ (၂၄၀) ဝါတုဲ ညးဍုၚ်ကွာန်ကောန်အရာပ် (၂၀၀) ပြၚ်ဝွံ ဟိုတ်နူဗ္တိုက်ကဵုက္ၜၚ်ကျာတံတုဲ ဒးချိုတ်အာလဝ်ဂှ် အလဵုအသဳညဳသၟဟ်ဂကူ NUG လလောၚ်ပ္တိတ်လဝ် ပ္ဍဲဂိတုအံက်တဝ်ဗာ (၂၄) တေံရ။
ညးလ္ၚတ်သ္ၚဳဂၠိပ်ပရေၚ်ကောန်ဍုၚ်အရၚ်မွဲတၠဂှ်လေဝ် နကဵု EAOs မထ္ပက်လဝ်စၟတ်တဲ NCA တံ ကဵုဇြဟတ်ဂရိုဟ်ကုကံၚ်ဇြဳပၞာန် မလုတ်လောန်ဒၟံၚ်အမှုရာဇာဝတ်ပၞာန်တံ နကဵုပရေၚ်ဍုၚ်ကွာန်ဟွံမာန်ဂှ်ဝွံ သ္ဇက်ဒးဂွခိုဟ်ရောၚ် ပါ်ပါဲလဝ်ရ။
“ဂကောံရပ်လွဟ် ထ္ပက်လဝ်စၟတ်တဲ NCA တှ်ေ ဗော်ဍုၚ်မန်တၟိ နွံဏောၚ်၊ ဂကောံဇၞော်ဇၞော်ဂှ်တှ်ေ RCSS တံ နွံဏောၚ်၊ ညးတံလေဝ် ညအ်ဂှ် ထံက်ထ္ၜးကဵု ( ဂျဳနဳဗာ ကောန်ဝေန်ယှေန်) တုဲ ဒးဟီုဏောၚ်၊ ဒးပါ်ပါဲဏောၚ်၊ ဂကောံ EAOs မထ္ပက်လဝ်စၟတ်တဲ NCA သဳကၠဳဒၟံၚ် ကုကံၚ်ဇြဳပၞာန် မလုတ်လောန်ထ္ၜးဒၟံၚ် အမှုရာဇာဝတ်ပၞာန်တံဂှ် မုမွဲမှ ဟီုပ္တိတ်ပါ်ပါဲ၊ ကဵုဇြဟတ်ဂရိုဟ် အတိုၚ်ပရေၚ်ဍုၚ်ကွာန်တံ ဟွံမာန်ဂှ်ဝွံ သ္ဇက်ဒးဂွခိုဟ် ကွေံကွေံရ၊ ဗွဲတွဵုမယုတ် ၜိုတ်တၚ်လလောၚ်ပ္တိတ်ဓဝ်ဂှ် ဒဵုအခိၚ်လၟုဟ် ပ္တိတ်ကဵုဟွံမာန်ပုဟ်” သာ်ဝွံ ထံက်ထ္ၜးလဝ်ရ။
ဂကောံက္ဍိုက်ပ် လၟေၚ်ကမၠောန်ပရေၚ်ၜိုဟ်လလမ် PPST မဒက်လဝ် နကဵုဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ NCA တံဂှ် စပ်ကဵုလၟေၚ်ဒဒှ် အဏာတ်ပါဂှ်တုဲ သွက်ဂွံသဳကၠဳအာ ပ္ဍဲကောံဓရီု PPST နွံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အကာဲအရာလၟုဟ်ဂှ်လေဝ် ကောန်ဂကောံ PPST တံဂှ် ကောံဒၟံၚ်မွဲဒၞါဲဓဝ် ဟွံသေၚ်ပုဟ်၊ ဂကောံလ္ၚဵုတံဂှ် လ္တူအရာဟွံညိၚ်ဝတ် ပဋိပက္ခ မက္တဵုဒှ်ဒၟံၚ် အပ္ဍဲဒေသဇကုတံ အခိၚ်လၟုဟ် ဇိုကပိုက်ဒိဓဗတ်နွံဒၟံၚ်ဂှ် မွဲဂကောံ ၜါဂကောံ ပ္ညဳပ္ညပ်ကေတ်အဆက် ဗွဲမပြဟ်တုဲ သွက်ဂွံသဳကၠဳ အခက်အခုဲနွံဒၟံၚ်ဂှ်ရ နူကဵုကောံဓရီု PPST မကၠောန်ဗဒှ် ယးကဠဳတေံမှ သဳကၠဳအာ ကိစ္စဏံဏောၚ်၊ ဗီုကဵုပါ်ပါဲဒၟံၚ် မ္ၚးဏံ ဟွံဂွံဇြဟတ် ဟွံဂွံတရိုပ်စိုတ် ဒှ်ဒၟံၚ်တံ နွံမာန်ဏောၚ်ဂှ်လေဝ် ပိုယ်တံ ခယျဂွံဒၟံၚ်ရ” ဂှ် ညးမၞုံအခေါၚ်ဟီုဂး PPST သ္ကိုပ်ဗိုလ်ဇၞော် သဝ်ကျဝ်ညောအ် သ္ဂးရ။
ပ္ဍဲ PPST ဂှ် ကံၚ်ဇြဳကလေၚ်ဒက်ပ္တန်ရးသေံ (RCSS) ၊ ဗော်ပရေၚ်ဗၠးၜးရခေၚ် (ALP) ၊ ကံၚ်ဇြဳပရေၚ်ၜိုဟ်လလမ်ကရေၚ် (KNU/KNLA-PC) ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် (DKBA) ၊ ဂအုပ်ဂကောံ ပရေၚ်ဗၠးၜးကောန်ဂကူပအိုဝ် (PNLO) ၊ ဗော်သွးဒဳမဝ်ကရေတ်တေတ်လာဟူ (LDU) ကေုာံ ဗော်ဍုၚ်မန်တၟိ (NMSP) တံ ပါလုပ်ရ။
အခိၚ်လၟုဟ်ဂှ် ဗော်သွးကောန်ဂကူကရေၚ် KNU၊ ဒပ်ပၠတရဴ ကောန်ဂကူချေၚ် (CNF) ကေုာံ ဒပ်ပၠတရဴဒဳမဝ်ကရေတ်တေတ် အလုံကၟိန်ဍုၚ်ဗၟာ (ABSDF) မဒှ်ဒၟံၚ်ပေါဲဗ္တိုက်ကဵု ဒပ်ကံၚ်ဇြဳပၞာန်တံဂှ် ဖအောန်ဖျေံလဝ် ဒဒှ်မပါလုပ် ပ္ဍဲဂကောံက္ဍိုက်ပ် ကမၠောန်ပရေၚ်ၜိုဟ်လလမ် (PPST) ရ။
PPST ဂှ် သွက်ညးဍုၚ်ကွာန်တံ ဂွံဗၠးၜးနူအကြေပ်အဂြတ် ပြသၞာပရေၚ်ဍုၚ်ကွာန်တ္ၚဲဏံဂှ် ပ္ဍဲကဵုမူသ္ဇိုၚ် NCA (၃) သာ် ပြသၞာပရေၚ်ဍုၚ်ကွာန် သွက်ဂွံသောၚ်ကလး နနဲပရေၚ်ဍုၚ်ကွာန်ကီု၊ ညးမဆေၚ်စပ်အိုဿီုပါလုပ်တုဲ သွက်ဂွံဒှ် ပေါဲသဳကၠဳပရေၚ်ဍုၚ်ကွာန် မဍိုက်ပေၚ်တဴကဵု အဓိပ္ပာယ်ဂှ်ကီု၊ သွက်ဂွံကဵု ပွမစဵုဒၞါ ကုကောန်အရာပ်တံဂှ် ရေၚ်တၠုၚ်ဒၟံၚ်ရောၚ် လလောၚ်ပ္တိတ်လဝ် ပ္ဍဲသၞာံထ္ပက်လိက်ကသုက် NCA ပေၚ် (၇) သၞာံဏံရ။
ပရိုၚ်−သြၚ်လောန်တိုၚ်(မ်)