လ္ဂုၚ်၊ အံက်တဝ်ဗာ (၃၀)
ပ္ဍဲအရာဒက်ပ္တန်ပရေၚ်ၜိုဟ်လလမ်ဂှ် ကၠာသၞာံဏံဂွိုအ်အိုတ် သွက်ဂွံကၠောန်သ္ပ ပေါဲသဳကၠဳပရေၚ်ဍုၚ်ကွာန် ဂကောံရပ်လွဟ်ကောန်ဍုၚ်အရၚ် (EAOs) တံ သီုဖအိုတ် သွက်ဂွံပါလုပ်မွဲဂှ် ဂ္စါန်ဒၟံၚ်ရောၚ် ဂကောံက္ဍိုက်ပ် လၟေၚ်ကမၠောန် ပရေၚ်ၜိုဟ်လလမ် (PPST) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပေါဲသဳကၠဳပရေၚ်ဍုၚ်ကွာန်ဂှ် ညံၚ်ဂွံဒှ်ပေါဲသဳကၠဳ ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ ဒေါအ်ပန်ပှော် (NCA) တံ ကေုာံ ဂကောံ EAOs ဟွံဂွံထ္ပက်လဝ်စၟတ်တဲတံ ဂွံပါလုပ်သီုဖအိုတ်ဂှ် ရေၚ်တၠုၚ်ဒၟံၚ်ရောၚ် သ္ဂးရ။
ဆ္ဂး ဒၟါနူ PPST စဳဇန်တုဲ ပံၚ်တောဲပါလုပ် ပ္ဍဲပေါဲသဳကၠဳပရေၚ်ဍုၚ်ကွာန်ဏံ ဟွံသေၚ်မွဲသာ် ညးဂမၠိုၚ် ဒုၚ်တဲတုပ်စိုတ်တုဲ ညံၚ်ဂွံဒှ်ပေါဲသဳကၠဳ မကၠောန်ဗဒှ်က္ဍိုက်ပ်ဂှ် ဂ္စါန်ဒၟံၚ်ရောၚ် ညးမၞုံအခေါၚ်ဟီုဂး PPST သ္ကိုပ်ဗိုလ်ဇၞော် သဝ်ကျဝ်ညောအ် ဟီုရ။
“ပေါဲဆဵုဂဗဏံဂှ် ဒၟါနူ PPST ရေၚ်တၠုၚ်စဳဇန်တုဲ ဒးပံၚ်တောဲပါလုပ် သာ်ဏံဟွံသေၚ်မွဲသာ် ပါလုပ်သီုဖအိုတ်တုဲ ညံၚ်ဂွံဒှ်အကာဲအရာ ညးဂမၠိုၚ်ပိုၚ်ပြဳ၊ ညံၚ်ဂွံဒှ် Joint Ownership ဂကောံရပ်လွဟ်ကောန်ဍုၚ်အရၚ်တံဂှ် လ္တူပိုယ်တံ မကၠောန်သ္ပစဳဇန်လဝ် သွက်ဂွံသဳကၠဳပ္ညဳပ္ညပ်တုပ်ပ် စနူကဵုပရူပရာအစဳဇန် မပ္တံကဵု ဒၞါဲဒတန်၊ ဌာန်ဒေသ၊ အခိၚ်အခါတံ သီုဖအိုတ်ဂှ် ဒၞါဲလဵုတှ်ေ ဒှ်မာန်ရော၊ အခိၚ်လဵုတှ်ေ ဒှ်မာန်ရောဟီုဂှ် သွက်ဂွံအာ အတိုၚ်ညးဂမၠိုၚ်တုပ်စိုတ်ဒုၚ်တဲမာန် နူကဵုပိုယ်တံ မပ္ညဳပ္ညပ်သဳကၠဳလဝ်ဂှ် နွံ” သာ်ဝွံ ညးသ္ဂးရ။
အခိၚ်လၟုဟ် သွက်ဂွံဒှ်ကၠုၚ် ပေါဲသဳကၠဳပရေၚ်ဍုၚ်ကွာန်ဂှ် အစောံစရာဲ မကၠောန်သ္ပဆက်စပ်ကဵု ဂကောံရပ်လွဟ်ကောန်ဍုၚ်အရၚ် (EAOs) တံကဵုဒှ်၊ ပွမပြာပ်လုပ်ပ္ညဳပ္ညပ် ဗွဲပလး လ္ဂောံကဵုပရေၚ်ပူဂဵုတံကဵုဒှ် ပ္တိတ်ဇြဟတ် ဂိုတ်ဂ္စါန်ဒၟံၚ်တံ နွံဂှ် သ္ကိုပ်ဗိုလ်ဇၞော် သဝ်ကျဝ်ညောအ် သ္ဂးရ။
တၚ်နွံပၟိက် ပေါဲသဳကၠဳဆဵုဂဗ ဂကောံရပ်လွဟ်ကောန်ဍုၚ်အရၚ်တံသီုဖအိုတ် ဂွံမံက်ကၠုၚ်ဂှ် တုပ်စိုတ်ဒုၚ်တဲကီုလေဝ် လၟေၚ်ဒဒှ်အကာဲအရာဏံဝွံ သၟဝ်ပၠတရဴ PPST ဂှ် ရေၚ်တၠုၚ်မာန် ဟွံသေၚ်ရောၚ် ညးအုပ်ကာ (၁) ဗော်တောတက်ကရေၚ်ဍာဲ KNPP ခူဒါနဳယာ ဟီုရ။
“ဒၞါဲဒတန်ဆဵုဂဗ ကောန်ဍုၚ်အရၚ်တံမွဲ ဂွံမံက်ကၠုၚ်ဂှ် နွံပၟိက်ရ၊ လၟုဟ်လေဝ် ကၠောန်ဒၟံၚ်ဖိုဟ်ရ၊ ဆ္ဂး စၟအ်အ်ဂကောံ ဟွံပါလုပ်ဏီပုဟ်၊ ဥပမာ PPST ကၠောန်မှ ပါလုပ်ဏောၚ်ဂှ်လေဝ် ဟွံသေၚ်ဏီပုဟ်၊ ဂၠံၚ်တရဴပရေၚ်ဍုၚ်ကွာန် PPST က္ဍိုက်ပ်ဟွံသေၚ်မွဲသာ် ဂၠံၚ်တရဴတၟိ ကောန်ဍုၚ်အရၚ် သီုဖအိုတ်မွဲ ဂွံဒှ်ကၠုၚ်ဂှ် ပိုယ်တံ စၟဳစဒၟံၚ်ရ၊ ပေါဲသဳကၠဳပရေၚ်ဍုၚ်ကွာန်ဂှ်တှ်ေ ဗီုလဵုဒှ်ဒှ် အကြာကောန်ဍုၚ်အရၚ်တံ နွံဂှ်ဒးနွံလဝ်ရောၚ်ဂှ် ပိုယ်တံ ကၠိုဟ်လဝ်တုဲတုဲရ” ဂှ် ဟီုရ။
PPST ဂှ် သွက်ဂွံသောၚ်ကလး အကြေပ်ဂြတ်ပရေၚ်ဍုၚ်ကွာန်အခိၚ်လၟုဟ် ဗွဲမသၟဟ်ကဵု တၚ်နွံပၟိက်ပရေၚ်ဍုၚ်ကွာန်ကၟိန်ဍုၚ်ဗၟာ နတဲတံဂှ်ကီု၊ သွက်ဂွံကဵု ပွစဵုဒၞါ ကုကောန်အရာပ်တံမာန် ကေုာံ သွက်သ္ဂောံဂွံ အရီုဗၚ်ပရေၚ်ဗ္စာရဏာမၞိဟ်တံမာန်ဂှ် ပံၚ်တောဲရေၚ်တၠုၚ်အာကဵု ဍုၚ်သ္အာၚ်တံရောၚ် တုဲကၠုၚ်ဂိတုအံက်တဝ်ဗာ (၂၈) တေံ လလောၚ်ပ္တိတ်လဝ်ရ။
ဆ္ဂး ကြဴနူဒပ်ပၞာန်သီအဝဵုတုဲ ဗော်သွးကောန်ဂကူကရေၚ် KNU၊ ဒပ်ပၠတရဴကောန်ဂကူချေၚ် CNF ၊ ကံၚ်ဇြဳကလေၚ်ဒက်ပ္တန်ရးသေံ (RCSS) တံ ဖအောန်ဖျေံလဝ် ပွမပါလုပ် အပ္ဍဲဂကောံ PPST တံရ။
မွဲလ္ပာ်ပၠန်ဂှ် ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ NCA (၇) ဂကောံတံကဵု ဂကောံရပ်လွဟ်ကောန်ဍုၚ်အရၚ် ဟွံဂွံထပက်လဝ်စၟတ်တဲ (၃) ဂကောံတံ တိုန်စိုပ်သဳကၠဳလဝ် ပေါဲသဳကၠဳပရေၚ်ဍုၚ်ကွာန် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မကော်ဘိက်ဂှ် စဵုကဵုၜါဝါရ။
အခိၚ်လၟုဟ်ဂှ် ဒပ်ကံၚ်ဇြဳပၞာန်ဝွံ က္တဵုဒှ်ဒၟံၚ်ပေါဲဗ္တိုက် ကုဂကောံထ္ပက်လဝ် NCA လ္ၚဵုတံဂှ်ကီု၊ ဂကောံရပ်လွဟ် ဟွံဂွံထ္ပက်လဝ်စၟတ်တဲတံ မပါလုပ် သီုကဵုဂကောံဒပ်စဵုဒၞါညးဍုၚ်ကွာန် (PDF) တံ အဆက်က်ရ။
ပရိုၚ်−သြၚ်လောန်တိုၚ်(မ်)