ဒိုဝ်ဟာ၊ အံက်တဝ်ဗာ (၂၉)
ကၟိန်ဍုၚ်ကာတာဝွံ သွက်ပုရိသာတ်မခ္ဍံကျာ မကၠုၚ်စိုပ်ဂေတ်ဝေၚ် အပ္ဍဲကာလပေါဲပြိုၚ်သၠိုၚ်ဂၠးကဝ်ဂှ်တုဲ ကၟာတ်ထောံလဝ် ဗ္ဒမ်တိုက် ဒၞါဲကောန်ကမၠောန်ဍုၚ်သ္အာၚ် ဂၠိုၚ်ကဵုလ္ၚီတံ မသ္ပဒတဴဒၟံၚ် ပ္ဍဲဍုၚ်ဒိုဝ်ဟာဂှ်ရောၚ် သၟာကမၠောန် ဒးဒုၚ်ထဍေၚ်ပ္တိတ် နူကဵုသ္ၚိဒၟံၚ်တံ ဟီုကဵု ဌာန်ပရိုၚ်ရိုက်တာရ။
သၟိၚ်တၠအဝဵုတံ ကၟာတ်ထောံလဝ် စမြိုၚ်မွဲဒါဇြိန်ပြၚ်တုဲ ဗွဲအဓိကမ္ဂး သၟာကမၠောန်အာယှတံကဵု အာဖရိကတံဂှ် ၜိုတ်သၟဟ်ရထ သွက်ဂွံဂၠါဲ ဒၞါဲမံၚ်တၞဟ်သ္အာၚ်တံဂှ် သၟိၚ်တၠအဝဵုတံ ဟီုလဝ်ကဵုညးတံရဂှ် သ္ဂးရ။
ဍုၚ်သ္အာၚ်တံ ကၠောန်သ္ပသ္ၚဳဂၠိပ်လဝ် ဗီုပြၚ်ဍုၚ်ကာတာ ဆက်ဆောံ လ္တူကောန်ကမၠောန်ဍုၚ်သ္အာၚ်တံ ကေုာံ သၞောဝ်ဥပဒေပရေၚ်မၞိဟ် မတေၚ်ဂြတ်တံ ဗွဲမသ္ကာတ်မြဟ်တုဲ ကၠာပေါဲပြိုၚ်သၠိုၚ်ဂၠးကဝ် ပ္ဍဲဂိတုနဝ်ဝေမ်ဗာ (၂၀) တေံ ဂွိုအ်စိုပ်ဏီ ၜိုတ် (၄) သတ္တာဟဂှ် ပွမချဳဒရာၚ်သာ်ဏံ မံက်တိတ်ကၠုၚ်လဝ်ရ။
ညးတာလျိုၚ်ပရေၚ်ဂဵုလဟဵုတံ လုပ်စိုပ်ကၠုၚ် အခိၚ်ဗ္တံ ၜိုတ် (၁၀) နာဍဳကဝက်ဂှ်တုဲ ထဍေၚ်ပ္တိတ်ထောံဖအိုတ်တုဲ ကၟာတ်ထောံပါၚ်တြၚ် စမြိုၚ်တံဂှ်ရောၚ် သ္ဂးရ။
ဟိုတ်ဂှ်ရ သ္ၚိကၟိန်လ္ၚဵုတံတွံ ၜိုတ်သ္ဂောံပ္တိတ်ကပေါတ်ညးတံရဂှ် ဗွဲမဂတာပ်အခိၚ် ကလေၚ်စဴဟွံဂတာပ်ပုဟ်ဂှ် ဂွံတီကေတ်ရ။
ကောန်ကမၠောန်ဍုၚ်သ္အာၚ်ဗွဲမဂၠိုၚ် မဆက်စၠောံလဴပူနၚ်ကဵု ဌာန်ပရိုၚ်ရိုက်တာတံဂှ်လေဝ် ဂွိၚ်ဖေက်ဒးဒုၚ်ပလန်တဲ နူကဵုသၟိၚ်တၠအဝဵုတံ ၊ တၠကမၠောန်တံဂှ်တုဲ သွက်ဂွံဟီုပ္တိတ် တၚ်နၚ်ပရူပရာညးတံ ဗွဲလစှ်ေဂှ် ဂယျာန်ပါဲလဝ်ရ။
သၞာဲဒဴအလဵုအသဳကာတာမွဲတၠဂှ် ပွမထဍေၚ်ပ္တိတ်သာ်ဏံဂှ်ဝွံ ဒဒှ်ရဟွံဆက်စပ်ကဵုပေါဲပြိုၚ်သၠိုၚ်ဂၠးကဝ်ဂှ် ဟီုဂးလဝ်တုဲ ဗွဲမကိတ်ညဳကဵု အစဳဇန်ဍာ်ဇမၠိၚ် သ္ဂောံကလေၚ်ဒက်ပ္တန် ဒေသဒိုဝ်ဟာဂှ် ပ္တိတ်ဒၟံၚ်ဒဳဇြာၚ် သၠဲသၠဲလးလးရောၚ်ဂှ် ဟီုလဝ်ရ။
“ညးတံသီုဖအိုတ် ဗၠးဘဲတုဲ ကလေၚ်မံၚ်ဒၟံၚ် ပ္ဍဲကဵုဒၞါဲဒတန် ဗွဲမဒးရးတံယျ” ဂှ် ညးတာလျိုၚ်ဂှ် ဟီုဂးလဝ်တုဲ ပွမအာတ်မိက် အခေါၚ်သ္ဂောံကလေၚ်တန်တဴတံဂှ် ရေၚ်တၠုၚ်အာ နကဵုတၚ်ကဵုသမ္တီ ဗွဲမဒးရးတံရောၚ်ဂှ်လေဝ် ညးဆက်ဟီုလဝ်ရ။
Ref: CNA