ကျာ်ထဝ်၊ အံက်တဝ်ဗာ (၃၀)
ပ္ဍဲကဵုကွာန်ဂမၠိုၚ် မၞုံဇိုၚ်ဒဵု၊ လ္တူဒဵု ကျာ်ဣသိယဵု၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်တံဂှ် ဒပ်ကံၚ်ဇြဳပၞာန် ထပ်သၠဲပ္တိုန်ကၠုၚ် ဇြဟတ်ဒပ် (၂၀၀) ပြၚ်ရောၚ် ဥက္ကဌ ကမ္မတဳကောပ်ကာဲဖန်ဇန် ကေၚ်ကာမိတ်ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ ပ္ဍဲဂိတုအံက်တဝ်ဗာ (၂၆) ဂှ် လုပ်စိုပ်ကၠုၚ် ပ္ဍဲကွာန်ကျံက်ဖျာ ပွိုၚ်ဍုၚ်ကျာ်ထဝ် နကဵုကရောၚ်ပၞာန်မွဲကရောၚ် ဇြဟတ်ဒပ် မၞုံ (၁၀၀) ပြၚ်ဂှ်ကီု၊ ပ္ဍဲမွဲဒမြိပ်ဇိုၚ်ဒဵုကျာ်ဣသိယဵုဂှ်လေဝ် လုပ်စိုပ်ကၠုၚ် နကဵုကရောၚ်ပၞာန် ဇြဟတ်ဒပ်မၞုံ (၁၀၀) ပြၚ်တံကီုဂှ် ဂွံတီကေတ်ရ။
ဒပ်ကံၚ်ဇြဳပၞာန် မထပ်လုပ်စိုပ်ကၠုၚ်တံဝွံ တြးလဝ်ဒပ် ပ္ဍဲကဵုကွာန် သံၚ်နာၚ်ကျဳ၊ ငှက်ပျောတဝ်၊ ကဒက်ချံၚ် မပါလုပ် သီုကဵုပွဳပွူဗ္ဒါဲသၞေဟ်ကွဳစက်တိုန်ဒဵု ဂြိုပ်ကပေါဝ် ကေုာံ ပွဳပွူဗ္ဒါဲ ဒဵုကျာ်ဣသိယဵု၊ ပွိုၚ်ဍုၚ်ကျာ်ထဝ်တံဂှ်ရ။
လ္ပာ်ဒပ်ကံၚ်ဇြဳပၞာန် ထပ်သၠဲပ္တိုန်ဇြဟတ်ဒပ်ဂှ်ဝွံ ဟိုတ်နူအကာဲအရာ သ္ဂောံရေၚ်တၠုၚ် ပရေၚ်ပြုပြေၚ်ပၞာန် နွံဒၟံၚ်ဂှ်ရ နကဵုညးဍုၚ်ကွာန်တံ သွက်ဂွံစွံသတိ အာကၠုၚ်ဗွဲတၟေၚ်အိုတ်ဂှ် ဥက္ကဌကမ္မတဳ ကောပ်ကာဲဖန်ဇန် ကေၚ်ကာမိတ်ခရိုၚ်သဓီု KNU သ္ကိုပ်ဗိုလ်သဝ်ကျဝ်မျေအ် ဖ္တိုက်ဖ္အောဝ်လဝ်ရ။
ဒပ်ကံၚ်ဇြဳပၞာန် တြးလဝ်ဒပ် နကဵုဇြဟတ်ဒပ် လၟိဟ်ဗွဲမဂၠိုၚ်ဂၠေၚ်ဂှ်ရ ညးဒေသ နူပွဳပွူဗ္ဒါဲဒဵုကျာ်ဣသိယဵုတံဝွံ ဂွိၚ်ဂွါဲဒၟံၚ် ပေါဲဗ္တိုက်ၜါလ္ပာ် သာသ္ကာတ်မြဟ်ကၠုၚ်ဂှ်ရ ပွမပါဲဒလေတ်မံၚ်စံၚ်တံလေဝ် နွံကၠုၚ်ရ။
မွဲလ္ပာ်ပၠန်ဂှ် ဒပ်ကံၚ်ဇြဳပၞာန်ဝွံ ထ္ပက်လဝ်ကရောၚ်ပၞာန် အပ္ဍဲပွိုၚ်ဍုၚ်ကျာ်ထဝ် နကဵုဇြဟတ်ဒပ် (၃၀၀) ပြၚ်တုဲ ဖျေံလဝ်ဒပ် ပ္ဍဲကွာန်(ပျဉ်းကတိုးကုန်း) ကေုာံ ကွာန် (ပိန္နဲကုန်း) တံဂှ်ရ ဆက်က္တဵုဒှ်ဒၟံၚ် ပေါဲဗ္တိုက်ဆေၚ်မုက် ကုဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံရ။
ပရိုၚ်−သြၚ်လောန်တိုၚ်(မ်)