မနဳလာ၊ နဝ်ဝေမ်ဗာ (၁)
ဟိုတ်နူလဗိုတ်ကျာ မလုပ်စိုပ်ပိုက်လဝ် အပ္ဍဲဍုၚ်ဖိလေတ်ဖေန်ဂှ်ရ လၟိဟ်ညးမဒးချိုတ်အာ သၠုၚ်တိုန်ကၠုၚ်လဝ် စဵုကဵု (၉၈) တၠဂှ် အေဂျေန်ဇြဳဘဲအန္တရာယ်သဘာဝကောန်ဂကူ ဖဳလေတ်ဖေန် ဟီုရ။
တုဲကၠုၚ် တ္ၚဲသိုက် (ဂိတုအံက်တဝ်ဗာ ၂၈) ဂှ် ဟိုတ်နူလဗိုတ်ကျာသ္ကုတ်ဂမ္တဴ နာ(လ်)ဂေ မလုပ်စိုပ်ပိုက်လဝ် အပ္ဍဲကွာန် မၞုံလ္တူတ္ကအ် မေန်ဒါနာအဵု သ္ကုတ်သၠုၚ်ကျာ ဖဳလေတ်ဖေန်ဂှ်ရ ဍာ်ဇၞော်ဍာ်ကလိုပ်တံ က္တဵုဒှ်လဝ် အဆက်က်တုဲ ဒၟါနူတိလာ်တံဂှ်တုဲ ညးမဒးချိုတ်အာတံလေဝ် နွံလဝ်ရ။
လဗိုတ်ကျာ တိုၚ်ဝှောန် မလုပ်စိုပ်ပိုက်စလေပ် ပ္ဍဲတ္ကအ်မေန်ဒါနာအဵု ဍုၚ်ဖဳလေတ်ဖေန်တံဂှ် လၟေၚ်သၞာံ လဗိုတ်ကျာ (၂၀) ဟွံက နွံကၠုၚ်ကီုလေဝ် လဗိုတ်ကျာ မစိုပ်ကၠုၚ်ဒေသဏံဂမၠိုၚ်ဝွံ လ္တူနူကဵုဒေသ သ္ကုတ်လဒေါဝ်ကၟိန်ဍုၚ်ဂှ် သ္ကဵုမၞိဟ်ချိုတ်ဂၠိုၚ်လဝ်ရ။
အတိုၚ်ဂလာန်လဟီု အေဂျေန်ဇြဳဘဲအန္တရာယ်သဘာဝ ကောန်ဂကူ ဍုၚ်ဖဳလေတ်ဖေန်ဂှ်မ္ဂး အပံၚ်မၞိဟ် (၆၃) တၠဂှ် ကၠေံဒၟံၚ်ဖိုဟ်တုဲ ဒဒှ်ရမၞိဟ်ဗွဲမဂၠိုၚ်ဂၠေၚ် ကလိဂွံလဝ်ဝပ်ဂှ် စၟတ်သမ္တီလဝ်တုဲ လၟိဟ်ညးမဒးချိုတ်တံ သ္ဇက်ဂွံသၠုၚ်တိုန်ကၠုၚ် နူဏံနွံဂှ် ဂွံတီကေတ်ရ။
ဒပ်မၚ်ပြၚ်ၜဳဖဳလေတ်ဖေန်ဂှ် ဒးဂၠါဲလဝ်ဇွ ညးမဒးချိုတ်အာ နူကဵုကွာန် ကူသဳယောန် (Kusiong) မဒးလီုလာ်ဆောံလေၚ်လဝ် မၞုံတွဵုရးဍုၚ်မေန်ဒါနာအဵုတံ ဝါတ်တ်ဂါတ်တ်ဂှ် သ္ဂးရ။
ဒၟါနူတိလာ်သရိုဟ်ဂှ်တုဲ ကွာန်ကူသဳယောန်ဝွံ ဒးဗၠိုက်အာလဝ်တုဲ နူကဵုက္ဍဟ်ဒဵု မကျေဝ်ဂေါဝ်ဂှ် ဒးက္တဵုဒှ်အာ အရာမလီုလာ်ဇၞော်ကဵုဇြဟတ်ရ။
မွဲအခိၚ်ဓဝ် မၞိဟ်ဂျိုၚ်လမျီု သှ်ေၜက်တံလေဝ် ဆက်ကၠောန်ၜိုတ်ၚးတးသ္အးဇ္ၚးဒၟံၚ် သ္ၚိမဒးလီုလာ်အာလဝ်တံ ဗွဲမဂၠိုက်ဂဟောံ အောန်စိုတ်ရ။
ဟိုတ်နူဍာ်ဇၞော်ဍာ်ကလိုပ်ဂှ်တုဲ ကွာန်ဂမၠိုၚ် ဒးဗၠိုက်လဝ်ဍာ်ဂှ်ကီု၊ သြောံသ္ၚုၜဲတံလေဝ် လီုလာ်တုဲ ဒေသဗွဲမဂၠိုၚ်လေဝ် ပၟတ်ပိုတ်အာလဝ်ရ။
ဒၟါနူရာသဳဥတုဖံက်ပၠန်တုဲ ဂၠးတိလေဝ်ဂမ္တဴကၠုၚ်ဂှ်ဗက် လဗိုတ်ကျာ မဘပဠဒၟံၚ် အန္တရာယ်လမျီုတံလေဝ် သာတုဲဇြဟတ်ခိုဟ်ကၠုၚ်ရဂှ် တၠပညာသိပ္ပံတံ ကဵုလဝ်သတိရ။
Ref: CNA