လ္ဂုၚ်၊ နဝ်ဝေမ်ဗာ (၁)
သွက်ဂွံထ္မံက်အာ ပေါဲဗ္တိုက်သီဍုၚ်တံ အလုံကၟိန်ဍုၚ်မွဲဂှ် ပံၚ်တောဲပလေဝ်ပလေတ်ဒၟံၚ်ကဵု ဂကောံဒပ်ပံၚ်ကောံ မဟာမိတ်တံ မပါလုပ် သီုကဵုဂကောံရပ်လွဟ်ကောန်ဍုၚ်အရၚ်တံ နကဵုမဟာဗျူဟာတံယျဂှ် ညးမၞုံအခေါၚ်ဟီုဂး ရုၚ်သမ္မတ အလဵုအသဳညဳသၟဟ်ဂကူ NUG ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အလဵုအသဳညဳသၟဟ်ဂကူ NUG ဂှ် ကၠုၚ်စိုပ်သၞာံ ၂၀၂၃ ဏံ နူကဵုပၞာန်ဒုၚ် ပြံၚ်လှာဲအာ ပၞာန်ထ္ပက် ကုကံၚ်ဇြဳပၞာန်ဂှ်တုဲ ပရေၚ်ဍုၚ်ကွာန်၊ ပရေၚ်ပၞာန်၊ ပရေၚ်ပိုန်ဒြပ်၊ ပရေၚ်ကာဍုၚ်သ္အာၚ်တံ မပါလုပ် နူကဵုဇၟာပ်ပ်ဒိုဟ်ဂှ် ပံက်အာမုက်ပၞာန် (၆) တုဲ ပတုဲထောံ ပရေၚ်ပၠန်ဂတးဏံရောၚ်ဂှ် တုဲကၠုၚ်ဂိတုအံက်တဝ်ဗာ (၇) တေံ လလောၚ်တြးလဝ်ရ။
အခိၚ်လၟုဟ်ဂှ် သွက်ဂွံထ္မံက်အာ ပေါဲဗ္တိုက်သီဍုၚ်တံမာန် ပံၚ်တောဲပလေဝ်ပလေတ်ရေၚ်တၠုၚ်ဒၟံၚ် ကဵုဂကောံဒပ်ပံၚ်ကောံ မဟာမိတ်တံ နကဵုမဟာဗျူဟာတံဂှ်တုဲ ပ္ဍဲဍုၚ်လ္ၚဵုတံဟီုမ္ဂး စဵုကဵုဗိုၚ်လဝ် ဒပ်ကံၚ်ဇြဳပၞာန်တံမာန် မၞုံကၠုၚ်ရဂှ် သ္ဂးရ။
ပ္ဍဲအရာထ္မံက်အာပေါဲဗ္တိုက်သီဍုၚ်တံဂှ် ညံၚ်ပွမဇီုကပိုက် ကုသ္ၚိဌာန်ကၠအ်သွဝ်လမျီုညးဍုၚ်ကွာန်တံ ဂွံဒှ်အောန်အိုတ်ဂှ် ဖန်ဇန်ရေၚ်တၠုၚ်ဒၟံၚ်ရောၚ် ညးမၞုံအခေါၚ်ဟီုဂး ရုၚ်သမ္မတ NUG ဥူကျဝ်ဇြဝ် ဟီုရ။
“ထ္မံက်အာ ပေါဲဗ္တိုက်သီဍုၚ်တံရောၚ်၊ ဆ္ဂး အခိၚ်လၟုဟ် ကၠာဂွိုအ်ထ္မံက်အာ ပေါဲဗ္တိုက်သီဍုၚ်တံဂှ် ညံၚ်ဍေံတံ ချဳဒရာၚ်ဟွံဂွံ၊ ညံၚ်တိဍာ်ဍေံတံ မချဳဒရာၚ်ဒၟံၚ်တံ ဂွံဍန်အာဂှ် စဵုကဵုတိတ်မ္ၚးဒပ် အပ္ဍဲဍုၚ်တံ ဟွံဂွံဂှ် ကၠောန်သ္ပလဝ်မာန်ယျ၊ လမျီုဒြပ်ရတ်ထဝ်သြန်ညးဍုၚ်ကွာန်တံ ညံၚ်ဂွံဇီုကပိုက်အောန်အိုတ်ဂှ်ကဵု ညံၚ်ဂွံက္တဵုဒှ်အာ အံၚ်ၚ်ဇၞးဇၞးဂှ် နကဵု MOD သဳကၠဳပလေဝ်ပလေတ်ရေၚ်တၠုၚ်ဒၟံၚ် မဟာဗျူဟာ ကုမဟာမိတ်တံဂှ် နွံရ” ရဴဝွံ ဟီုဂးလဝ်ရ။
ဆ္ဂး လၟေၚ်ကမၠောန် ထ္မံက်အာရုပ်ရဴ ပေါဲဗ္တိုက်သီဍုၚ်တံဂှ် အခိၚ်လဵု ကာလလဵု နဗီုပြၚ်သာ်လဵုရောဟီုဂှ် NUG ထ္မံက်ပ္တိတ်ဟီုဂးလဝ် ဟွံမွဲဏီရ။
တုဲကၠုၚ် ဂိတုအံက်တဝ်ဗာ (၂၁) တေံဂှ်လေဝ် ဟိုတ်နူချူတြးကၠုၚ်ဒၟံၚ် ပ္ဍဲမုက်လိက်ဇာဇၞိက်ပရေၚ်မၞိဟ်တံ ဒဒှ်ရပေါဲဗ္တိုက်ကအ်ကြိက်ဝွံ ဒှ်ပေါဲဗ္တိုက်သီဍုၚ်ဂးတုဲ ဒပ်ကံၚ်ဇြဳပၞာန်တံ ကလေၚ်ခၠေဝ်ပလန် ဗ္တိုက်ကၠုၚ် ကဵုက္ၜၚ်ကျာတံ သ္ကာတ်တ်မြဟ်ဟ်ရ။
ဒုဗိုလ်အကြာပ် CDM နူဒပ်ပရေၚ်စဵုဒၞါဘဲသၞက္ၜၚ်ကျာ မွဲတၠဂှ် ယဝ်ရစဵုဒၞါ နူကဵုသၞက္ၜၚ်ကျာ ကံၚ်ဇြဳပၞာန်တံမာန်မ္ဂး ဒဵုဗ္ၜတ်မွဲမွဲ ထ္မံက်အာ ပေါဲဗ္တိုက်သီဍုၚ်တံမာန်ဂှ်ရ ကိုပ်ကၠာအိုတ် သွက်ဂွံစဵုဒၞါ နူကံၚ်ဇြဳပၞာန်တံ မဗ္တိုက်ဒၟံၚ် နကဵုက္ၜၚ်ကျာတံဂှ် နွံပၟိက်ရောၚ် ဟီုရ။
“ပိုယ်တံ စဵုဒၞါ နူကဵုသၞက္ၜၚ်ကျာ ဒပ်ပၞာန်တံမာန်ယျမ္ဂး ၜိုန်ရထ္မံက်ပေါဲဗ္တိုက်သီဍုၚ်တံလွာဲဂှ် ဟွံမာန်ကီုလေဝ် အရာမတောတက် တၟာဂလိုၚ်နွံမာန်ဏောၚ်၊ အယောၚ်အလာ သ္ဂောံအံၚ်ဇၞးဂှ် သာဂၠိုၚ်ဏောၚ်၊ သွက်ဂွံစဵုဒၞါ နူကံၚ်ဇြဳပၞာန်တံ မဗ္တိုက်ဒၟံၚ် နကဵုက္ၜၚ်ကျာတံဂှ်တှ်ေ အဓိက ညံၚ်က္ၜၚ်ကျာဍေံတံ ပဝ်ဟွံဂွံဂှ် ယဝ်ရကၠောန်ၜိုတ်အာ စဵုကဵုဗ္တိုက်ဂၠံၚ်က္ၜၚ်ကျာဂြိပ်တံ၊ ဌာနဒပ်ကျာတံမာန်မ္ဂး သွက်ဂွံစဵုဒၞါ နူကဵုမဗ္တိုက်ဒၟံၚ် ကဵုက္ၜၚ်ကျာတံဂှ် ဒှ်အထံက်အရီုတၟာဂလိုၚ်ဏောၚ်၊ လွဟ်ပန်က္ၜၚ်ကျာတံ နွံတှ်ေ သာခိုဟ်ရ” ဂှ် ဟီုရ။
အခိၚ်လၟုဟ်ဂှ် ဒပ်ကံၚ်ဇြဳပၞာန်ဝွံ အပ္ဍဲပေါဲဗ္တိုက်ၜါလ္ပာ်တံဂှ် ဗ္တိုက်ကၠုၚ်ကဵုက္ၜၚ်ကျာတံ ဂၠိုၚ်ကၠုၚ်တုဲ ကုကောန်အရာပ် ညးဍုၚ်ကွာန်တံဂှ်လေဝ် နကဵုတၚ်ရန်တၟံနွံနွံ ဆက်ကလိလောန် ထောံဒၟံၚ်မခတိုဟ်တံ အဆက်က်ရ။
အလဵုအသဳညဳသၟဟ်ဂကူဂှ် သွက်ဂွံခၠေဝ်ပၠန် လ္တူကံၚ်ဇြဳပၞာန်တံ မဗ္တိုက်ဒၟံၚ် ကဵုက္ၜၚ်ကျာတံဂှ် ပ္ဍဲကဵုဒၞါဲ မစိုပ်တရဴအိုတ်တံဂှ် နကဵုမဟာဗျူဟာစှ်ေစှ်ေ ဖန်ဇန်ရေၚ်တၠုၚ်ဒၟံၚ် လွဟ်ပန်က္ၜၚ်ကျာတံယျဂှ် ဟီုဂးလဝ်ရ။
အလုံကၟိန်ဍုၚ်မွဲ ကြဴနူဒပ်ပၞာန်သီအဝဵုတုဲ လၟိဟ်လ္တုန်ဒပ်ကံၚ်ဇြဳပၞာန်တံ ဗ္တိုက်ကၠုၚ်လဝ် ကဵုက္ၜၚ်ကျာတံ ဟွံအောန်နူကဵု (၂၅၀) ဝါတုဲ အပ္ဍဲပရေၚ်ဗ္တိုက်တံဏံဂှ် ညးဍုၚ်ကွာန်ကောန်အရာပ် (၂၀၀) ပြၚ် ဒးချိုတ်အာလဝ်ဂှ် အလဵုအသဳညဳသၟဟ်ဂကူ NUG လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)