ကျာ်ထဝ်၊ သိပ်တေမ်ပါ ၂၈
ပ္ဍဲကွာန်နွံမံၚ် အကြာပယျဵုမန်ကဵုဗဂေါတံဂှ် ဒပ်ပၞာန်ကျာဗမာ ထပ်ကြဳလဝ်ဗုမ်ဇၞော်ကဵုဇြဟတ်နွံမံၚ်ဂှ် တမ်ရိုဟ်ကၞက်ပရိုၚ်ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုသိပ်တေမ်ပါ ၂၆ အခိၚ်စနူဂယး နူကဵု ၉ နာဍဳကဝက် ဒဵုကဵုအခိၚ်ဒေါဝ်တ္ၚဲ ၁၂ နာဍဳပေၚ်ၚ်ဂှ် နူကဵုၜၚ်ကျာဒပ်ပၞာန်ဗမာ ၆ မ၊ ကြဳဖျေံဏာဗုမ် ဟွံအောန်နူကဵု ၅၀ မနွံတုဲ လွဟ်ဇၞော်ဟံၚ်ဝေတ်ဇြာတံလေဝ် နူကဵုဗလးတိ ပန်ပလံၚ်ကဵုမံၚ်ဆက်က်ရောၚ်။
ပရေၚ်ကြဳဗုမ် ပ္ဍဲကဵုဒၞာဲဌာန်ဂအုပ်ပၞာန်ရးတၟေၚ် အလဵုအသဳညဳသၟဟ်ကောန်ဂကူ NUG ဒှ်လဝ်တုဲ ပရေၚ်ကြဳဗုမ်အလန်ဒုတိယ လၟုဟ်ဏံဂှ် ထပ်ကၠောန်ဗတိုက်လဝ် ပရေၚ်ဗွဲတၟေၚ်မွဲရောၚ် ဂွံတီရ။
ဟိုတ်နူ ပရေၚ်ကြဳဗုမ်ဒပ်ပၞာန်ဗမာတုဲ ညးဍုၚ်ကွာန်လၟိဟ်ကဵုလ္ၚီ နူကဵု ၆ ကွာန်တံ ဒးဂြိပ်ပါဲတိတ်အာ နူကဵုသ္ၚိဌာန်ညးတံကီု၊ မၞိဟ်ဗွဲမဂၠိုၚ်တံ အောပ်မာဒၟံၚ်အပ္ဍဲဥမၚ်တံနွံတုဲ ပရေၚ်ဒးဝပ်ချိုတ်လီုလာ်အာာဝ်နာနာတံ ဗွဲတြးဂှ်ဟွံဂွံတီဏီပုဟ်။
ပ္ဍဲအခိၚ်ကာလ ဒပ်ပၞာန်သီလဝ်အဝဵု ပွိုၚ် ၅ သၞာံဂှ် ပရေၚ်ကြဳဗုမ်လၟုဟ်ဏံ ပ္ဍဲအကြာပယျဵုမန်ကဵုဗဂေါမ္ဂး ဒပ်ပၞာန်ကျာဗမာ ကြဳလဝ်ဗုမ်ဇြဟတ်ဇၞော်အိုတ်ဒှ်မံၚ်ရောၚ် တမ်ရိုဟ်ကၞက်ပရိုၚ်ညးဒေသတံ ဟီုတုဲ ဂွံတီရ။
မၞိဟ်အပ္ဍဲနူကဵုဌာန်ဂအုပ်ပၞာန်ရးတၟေၚ် အလဵုအသဳညဳသၟဟ်ကောန်ဂကူ NUG တံ ကဵုပရိုၚ်တုဲ အာဗတိုက်လဝ် နကဵုၜၚ်ကျာရောၚ် လိက်ပရိုၚ်တြးဝါဒ အလဵုအသဳပၞာန် လလောၚ်ပတိတ်လဝ် ပ္ဍဲဂိတုသိပ်တေမ်ပါ ၂၆ ဂှ်ရ။
ပ္ဍဲကဵုပရေၚ်ကြဳဗုမ် ဒၞာဲဌာန်ဂအုပ်ပၞာန်ရးတၟေၚ် NUG ဏံ အကြာပ်ဇၞော် CDM နေဝေၚ်အံၚ်၊ ကောန်သ္ဂံၚ် PDF ၅ တၠတံ ချိုတ်တုဲ သ္ကိုပ်ပရေၚ်ကောပ်ကာဲဌာန်ပၞာန် သ္ဂံၚ် အံၚ်သာန်ယှာ ကဵု ကောန်သ္ဂံၚ် PDF လၟိဟ်ကဵုစှော်တံ ဒးအာဝပ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media