ဘာအၚ်၊ နဝ်ဝေမ်ဗာ (၅)
ဒပ်ကံၚ်ဇြဳပၞာန် ပန်ပှော်လဝ် လွဟ်လက်နက်ဇၞော် ပ္ဍဲရုၚ်ဂဥုဲပွိုၚ်တိုက်ဒဵုဖလာန် မၞုံဂကောံကွာန် ဟာတ်တလိုက်၊ ပွိုၚ်ဍုၚ်ဘာအၚ်၊ တွဵုရးကရေၚ်ဂှ်တုဲ ဒးပဆုဲပြံၚ်လဝ် မၞိဟ်ယဲတံ ကာမံက်တိုန်ရဂှ် ညးတာလျိုၚ်ခရိုၚ်သဓီု KNU တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုနဝ်ဝေမ်ဗာ (၁) တေံ နူကဵုဗ္ဒိုပ်ဒပ်(ကမမံၚ်) ခမရ(၄၀၈) သၟဝ်တဲ စကခ(၈) ကံၚ်ဇြဳပၞာန်ဂှ် ပန်ပှော်လဝ် ရုၚ်ဂဥုဲပွိုၚ်တိုက်ဒဵုဖလာန် နကဵုလွဟ်လက်နက်ဇၞော် (၁၂၀−မမ) (၅) လစုတ်ရ။
ပ္ဍဲဒပ်ကံၚ်ဇြဳပၞာန် ပန်ပှော်လွဟ်လက်နက်ဇၞော်ဂှ် ရုၚ်ဂဥုဲ ဇီုကပိုက်လီုလာ်အာ ဟွံမွဲကီုလေဝ် ဒၟါနူပရေၚ်ဂီုကၠီုတုဲ ဒးကၟာတ်လဝ်ရုၚ်ဂဥုဲယာယဳတုဲ မၞိဟ်ယဲတိုန်စိုပ်လွဳဒၟံၚ်ယဲတံကဵု သၞာဲဒဴပရေၚ်ထတ်ယုက်တံဂှ် ပဆုဲပြံၚ်လဝ် ကာတၟေၚ်ရ။
ဒပ်ကံၚ်ဇြဳပၞာန် ပန်ပှော်ကဵုလွဟ်လက်နက်ဇၞော် လ္တူရုၚ်ဂဥုဲဂှ်ဝွံ ဒှ်အရာဘပဠ သၞာဲဒဴပရေၚ်ထတ်ယုက်တံတုဲ ဒစဵုဒစး ပြဝလၟုဟ်ဏံ ဍိုက်က်ပေၚ်ၚ်ရဂှ် ညးအုပ်ကာ ခရိုၚ်သဓီု KNU ပဒိုဝ်သဝ်တဝ်နဳ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ရုၚ်ဂဥုဲပွိုၚ်တိုက် ဒဵုဖလာန်ဂှ်ဝွံ မၞုံအပ္ဍဲပွိုၚ်ဍုၚ်ဘာအၚ် KNU ဂှ်တုဲ ဒှ်ရုၚ်ဂဥုဲပွိုၚ်တိုက် (ခါတ်−၁၅ မ) တုဲ ကြဴနူဒပ်ပၞာန်သီအဝဵုတုဲဂှ် သၞာဲဒဴပရေၚ်ထတ်ယုက် တၠစေတနာတံ ပံၚ်ကောံတုဲ ရေၚ်တၠုၚ်ကဵုဒၟံၚ် ဒတုဲဖဵုပရေၚ်ထတ်ယုက်တံမရ။
ရုၚ်ဂဥုဲဏံဂှ် ဒှ်ရုၚ်ဂဥုဲညးဍုၚ်ကွာန်ဒေသတံ သၟးဟွံက သီုကဵုမၞိဟ်ယဲ ဌာန်သ္ၚောဲဌာန်ကြပ် ဂၠိုၚ်ကဵုကၠံတံ မကၠုၚ်စိုပ်ထ္ၜးဒၟံၚ်ယဲ လၟေၚ်ၚ်တ္ၚဲမွဲ မဒှ်ရ။
သၞာံတုဲကၠုၚ် ဂိတုနဝ်ဝေမ်ဗာ (၁၆) တေံလေဝ် ဂကောံဒပ် BGF သၟဝ်တဲကံၚ်ဇြဳပၞာန်သီအဝဵုတံ လုပ်စိုပ်ဗ္တးဗ္တန်လဝ် ရုၚ်ဂဥုဲပွိုၚ်တိုက်ဒဵုဖလာန်ဂှ်တုဲ ကၠောန်သ္ပကေတ်ဏာ၊ ပလီုပလာ်ဏာလဝ် ဂဥုဲဇဗတံ၊ ကပေါတ်တၞဟ်ဟ်တံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)