နေဗျဳဒဝ် ၊ နိုဝမ်ပါ ၂
သွက်ဂွံကလေၚ်သောင်ကလးအာ ပရေၚ်အခက်အခုဲဍုၚ်ဗမာ နူကဵုအာသဳယာန် ဖျေံကဵုလဝ် တၚ်တုပ်စိုတ်ဘုံ ၅ တၚ်တုဲ ညံၚ်ဂွံပြံၚ်သၠာဲအာကီု ပ္ဍဲဂကောံရးနိဂီုဍုၚ်အဂၞဲ အာသဳယာန်ဂှ်လေဝ် ဂကောံပၞာန်တံ သွက်ဂွံကလေၚ်လုပ် သၠဲသၠဲလးလးမာန် ဟွံလောဲသွာဏီပုဟ် ညးခါတ်အကာဲပရေၚ်ဍုၚ်ကွာန်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူသီအဝဵု သၞာံ၂၀၂၁ သ္ပတမ်နူကဵုပေါဲရုဲမာဲ ပံက်ကၠုၚ်လဝ်အလဵုအသဳ မွဲဂကောံတုဲ ပ္ဍဲကဵုအာသဳယာန်ကဵု ကုလသမဂ္ဂတံ သွက်ဍုၚ်ဗမာ ညံၚ်သ္ဂောံဂွံထံက်ဂလာန် နကဵုပရေၚ်ဍုၚ်ကွာန်ဂှ် အလဵုအသဳပၞာန် ဂစာန်ကၠုၚ်မံၚ်ရောၚ်။
တုဲကၠုၚ်အကြာမွဲၜါတ္ၚဲဏံ ဝန်ဇၞော်ပရေၚ်ဍုၚ်သအာၚ် ဖိလေတ်ပိုင်၊ ညးစၞးတၟေၚ် ဥက္ကဌစှ်ေအလန် ဆေင်စပ်ကဵုဍုၚ်ဗမာ လာဇာရို ဂွံအခေါၚ် ကၠုၚ်ဍုၚ်ဗမာပွိုၚ် ၂ တ္ၚဲ နကဵုတရဴ ပရေၚ်ဓဝ်ဗစာရဏာ မၞိဟ်တံရ။
အပ္ဍဲတရဴဏံ အံက်တဝ်ပါ ၂၈ ဂှ် အာစိုပ်ဗ္ဒိုပ်ဒဴပၞာန် ညးနွံပၟိက် ပရေၚ်အရီုဗၚ် ပ္ဍဲကဵုဍုၚ်တံၚ်ဂျဳ သၠုၚ်ကျာ တွဵုရးသေံတုဲ ပ္ဍဲအံက်တဝ်ပါ ၂၉ ဂှ် စပ်ကဵုတၚ်တုပ်စိုတ်ဘုံဂှ် အာဆဵုဂဗလဝ် ဝန်ဇၞော်ဍုၚ်သအာၚ် ဂကောံအလဵုအသဳပၞာန်ကီုရ။
အပ္ဍဲကဵု ညးတံဆဵုဂဗသဳကၠဳလဝ်ဏံဂှ် နဲကဲသွက်ဍုၚ်ဗမာ ညံၚ်ဂွံကလေၚ်ထိၚ်ဒက်အာ အခေါၚ်အရာ အခန်ကဏ္ဍမူလတံမာန် ကေုာံ စပ်ကဵုပရေၚ်ကိစ္စ ကောံဓရီုအဆံၚ်သၠုၚ် ဂကောံအာသဳယာန် ၄၉ ဝါကဵု ကောံဓရီုဆက်စပ်တံသဳကၠဳလဝ်ဂှ် အလဵုအသဳပၞာန် ပတိတ်လဝ် ပရိုၚ်ရ။
နူကဵုဝန်ဇၞော်ဍုၚ်သအာၚ် ဖိလေတ်ပိုၚ်ဂှ်လေဝ် စပ်ကဵုသွက်ဂွံထမံက် ရုပ်ရဴ တၚ်တုပ်စိုတ်ဘုံအာသဳယာ ၅ တၚ် ဍိုက်က်ပေၚ်ၚ်မာန်တုဲ ကိစ္စစပ်ကဵု ပရေၚ်ပံၚ်တောဲ အကြာၜါဍုၚ်ဂှ်လေဝ် သဳကၠဳလဝ် ညးသ္ကံရောၚ်ဂှ် ပတိတ်လဝ်ပရိုၚ်ရ။
ဆဂး ပ္ဍဲကဵုတရဴဏံ နူကဵုညးစၞးတၟေၚ်အာသဳယာန် အာတ်မိက်လဝ်အခေါၚ် သွက်ဂွံအာဆဵုဂဗ က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳကီုလေဝ် မုလေဝ်ဟွံတၟေၚ်ကၠုၚ်ဂှ် ဒှ်မံၚ်သက်သဳဍာံပြရ။
လ္တူဏံ သွက်အလဵုအသဳပၞာန် ဂွံပရေၚ်ကဵုစၟတ် ယအ်အာဗွဲမဂၠိုၚ်တုဲ အတိုၚ်တၚ်တုပ်စိုတ်ဘုံဂှ်မ္ဂး သွက်ဂွံကလေၚ်လုပ် အပ္ဍဲအာသဳယာန် ဟွံလောဲသွာဏီရောၚ် ညးအုပ်ကာ ကံၚ်သဳမဳဒဳယာပရိုၚ်ဗမာ ဥူတိုဝ်ဇြဝ်လာတ် သ္ၚဳဂၠိပ်လဝ်ရ။
“ပြဟ်ဟ်ဏံ ဍုၚ်ဗမာ(အလဵုအသဳပၞာန်) ဂွံကလေၚ်လုပ်အာသဳယာန်ပၠန် အခိၚ်ပြဟ်မံၚ်ဏီ။ အတိုၚ်ဗီုဝန်ဇၞော်ပရေၚ်စဵုဒၞာ ယာပျေအ်ဟီုလဝ်ရ။ သွက်ပရေၚ်ၜိုဟ်လလမ် ကြဳမံၚ်ဗုမ်။ ကြဳမံၚ်ဗုမ်ဂှ်တှ်ေ ကလေၚ်စိုပ်အပ္ဍဲအာသဳယာန်လောဲလောဲ အဲဟွံထေၚ်ဏီ။ ဣဏံဂှ် စပ်ကဵုပရေၚ်တၚ်တုပ်စိုတ်ဘုံတံလေဝ်။ Engagement သွက်ဇၟာပ်ပ်ဍုၚ်ကောန်ဂကောံမွဲမွဲတံ ဂတနူဏံ ဆက်နွံကၠုၚ်ဂၠိုၚ်တိုန်ဏောၚ်။ ဆဂး ပြဟ်ဟ်ဏံ အဲခယျ ၜိုတ်ခါဏံ ဗွဲတၟေၚ် ဟွံဂွံအခေါၚ်ဆဵုညာတ် ဒဝ်အံၚ်သာန်သုကျဳဂှ်တှ် စၟတ်ယအ်အာဗွဲမဂၠိုၚ်” သာ်ဝွံ သ္ဂးရ။
နူကဵုသမ္မတခါန်ကၞက်ကေတ်တ် ဥူမေန်အံၚ်လှိုၚ် ဂွံအခေါၚ်အာဝေၚ်လဝ် ဍုၚ်ကောန်ဂကောံအာသဳယာန် ၅ ဍုၚ်တံဂှ် သွက်ဂွံကလေၚ်လုပ်အပ္ဍဲအာသဳယာန်ဂှ် အလဵုအသဳပၞာန် စန်ဒက်လဝ်နွံတုဲ ဍုၚ်တံဏံ ထံက်ဂလာန် ကဵုအာအရီုဗၚ်ရောၚ် ဟီုဂးလဝ်ညးသ္ကံကီုရောၚ်။
ဆဂး သွက်အရာဂကောံအာသဳယာန်ဇၞော်မွဲ သ္ပစၞး ဇီုကပိုက်အာ ဇၞော်ဇၞော်ဟွံသေၚ်တုဲ အပ္ဍဲလက်ထက်အာယုက် ညးစၞးတၟေၚ် အာသဳယာန်ဏံ သွက်ပရေၚ်ဍုၚ်ဗမာ ဆၜိုတ် ညးကၠောန်ကဵုမံၚ်ဏံရ နွံအာရောၚ် ဥူတိုဝ်ဇြဝ်လာတ် ထံက်ထ္ၜးရ။
ပ္ဍဲကဵုဆဵုဂဗလဝ်ကဵု ညးစၞးတၟေၚ်အာသဳယာန်ဏံ သွက်ပရေၚ်ညိၚ်ဝပ်၊ ပရေၚ်ဖောအ်ဗြဳ၊ ပတိုက်သရိုဟ်ပကီုပရာတ် ကေုာံ သွက်ပရေၚ်ၜိုဟ်လလမ် ထာဝရ ဂစာန်ထမံက်အာမံၚ်ရုပ်ရဴ ဂးတုဲ ဝန်ဇၞော်ဍုၚ်သအာၚ် ဥူတေၚ်မိုင်သွိုဲ သောၚ်ကလးလဝ်ရောၚ်။
တုဲပၠန် စပ်ကဵုတၚ်တုပ်စိုတ်ဘုံ အာသဳယာန် ၅ တၚ်တုဲ ပရေၚ်ဂုဏ်ဖဵုပိုန်ဒြပ်ကေုာံ ပရေၚ်ပိုၚ်ပြဳအဝဵုအာဏာ သွက်ဍုၚ်ဗမာ ညံၚ်ဟွံဂွံယုတ်ဒေက်အာ အတိုၚ်တၚ်ပတဝ်က္ဍိုပ် လၟေၚ်ကမၠောန် အလဵုအသဳတံ ပံၚ်တောဲထမံက်မံၚ်ရုပ်ရဴဂှ်လေဝ် ဟီုလဴကဵုလဝ် သ္ဂးရ။
စပ်ကဵုတရဴ အာလဝ်ဍုၚ်ဗမာ လက်ကရဴအိုတ်ဏံတုဲ ပရေၚ်လ္ၚတ်တီညာတ်လဝ် နကဵုညးစၞးတၟေၚ် ပရေၚ်ဍုၚ်ဗမာ ဥက္ကဌအာသဳယာန်မွဲ ပတိုန်ထ္ၜးအာ ကောံဓရီုအဆံၚ်သၠုၚ် အာသဳယာန်တေံရောၚ် ဝန်ဇၞော်ဍုၚ်သအာၚ် ဖိလေတ်ပိုၚ် ဟီုရ။
ဟိုတ်ဂှ်ရ အပ္ဍဲဂကောံအာသဳယာန် ညံၚ်ဂွံဂၠာဲအာပၞော် ကလေၚ်ထမံက်ပတိတ် အခန်ကဏ္ဍ အခေါၚ်အရာ တမ်မူလတံမာန်ကီု သွက်ဂွံထပဵုကဵုအာ ပရေၚ်အရီုဗၚ် ဗစာရဏာ မၞိဟ်တံ ဂၠိုၚ်ၚ်မာန် ဆက်ပံၚ်တောဲရေၚ်တၠုၚ်အာရောၚ်ဂှ် အလဵုအသဳပၞာန် ပတိတ်လဝ်ပရိုၚ်ရ။
စနူသီအဝဵုတုဲ အကြာၜါဂိတုဂှ် စပ်ကဵုပရေၚ်ဍုၚ်ဗမာ တၚ်တုပ်စိုတ်ဘုံ ၅ တၚ် ဖျေံလဝ်ဂှ် ဥက္ကဌ ေစှ်အလန်တံကီု ညးစၞးတၟေၚ် ပြံၚ်လှာဲအာကီုလေဝ် ပရေၚ်တောတက်တံဂှ် ကၠောန်မာန်လဝ် အောန်ကွေံကွေံရောၚ် ညးခါတ်အကာဲ ပရေၚ်ၜိုဟ်လလမ်တံ ထံက်ထ္ၜးရ။
ပ္ဍဲကဵုတၚ်တုပ်စိုတ်ဘုံမ္ဂး ညံၚ်ဂွံဒေါအ်ထောံ ပရေၚ်ပကီုပရာတ်တံ လၟုဟ်ပိုတ်တ်၊ သွက်ဂွံစကၠောန်အာ ပေါဲတက်ကျာသဳကၠဳ ညးဆေၚ်စပ်တံ ပါလုပ်မာန်ဖအိုတ်၊ သွက်ဂွံကဵုအာအထက်ပၚ် ပရေၚ်ရီုဗၚ် ဗစာရဏာမၞိဟ်ဂှ်ကီု၊ ပေါဲသဳကၠဳတက်တံညံၚ်ဂွံဒှ် သွက်ဂွံလုပ်ပ္ညဳပ္ညပ်အကြာ ခါန်ကၞက်ညးစၞးတၟေၚ်အာသဳယာန် ကေုာံ ညးစၞးတၟေၚ် ကၠုၚ်ဍုၚ်ဗမာတုဲ သွက်ဂွံဆဵုဂဗတက်ကျာ ညးဆေၚ်စပ်တံ သီုဖအိုတ် မဒှ်ရ။
တၚ်တုပ်စိုတ်ဘုံအာသဳယာန်ဂှ် ကိစ္စပြံၚ်လှာဲကေတ်လောဲလောဲ ဟွံသေၚ်တုဲ အလဵုအသဳပၞာန် သွက်ဂွံပါလုပ်အာ အပ္ဍဲအာသဳယာန် ပေၚ်ၚ်မာန်ဂှ် ခက်ခုဲမံၚ်ဏီရောၚ် ညးလ္ၚတ်ပါ်ပါဲပရေၚ်ဍုၚ်ဗမာ ဒံက်တာသိုၚ်ကျဳဇြေၚ်သိုဝ် သ္ၚဳဂၠိပ်လဝ်ရ။
“ဣဏံဂှ် ပရေၚ်ကိစ္စပြံၚ်လှာဲဂွံလောဲလောဲ မွဲအလန်ဓဝ်ဟွံသေၚ်ပုဟ်။ ဟိုတ်ဂှ်တုဲ ပ္ဍဲအကြာဂကောံအာသဳယာန် ၜိုတ်လဵုဂွံပါလုပ်အာ ပေၚ်ၚ်မာန်ဟီုဂှ် ၜတ်ကၞာတ်အာကဵု ပရေၚ်ထမံက်ရုပ်ရဴ တၚ်တုပ်စိုတ်ဘုံ ၅ တၚ်ဂှ်တုဲ သဘဴ သွက်ဂွံဒုၚ်အာတဲ နွံရ။ ဟိုတ်ဂှ်တုဲ အတိုၚ်အကာဲအရာ သဘဴတံဏံမ္ဂး နကဵုဍုၚ်ဗမာ အလဵုအသဳမေန်အံၚ်လှိုၚ်တံ သွက်ဂွံပါလုပ်အာ ပေၚ်ၚ်မာန်ဂှ် ခက်ခုဲအာမံၚ်ဏီ ဟီုဂွံရ။” သာ်ဝွံ သ္ဂးရ။
တၚ်တုပ်စိုတ်ဘုံအာသဳယာန် ၅ တၚ်ဂှ် ၜိုတ်လဵုထမံက်လဝ်ရုပ်ရဴနွံ တော်ဆၜတ်ကၞာတ်အာ ဒုၚ်သ္ဇိုၚ်ကဵုပရေၚ်တောတက် လ္တူဏံတုဲ နူကဵုသဘၚ်သဳကၠဳကုလသမဂ္ဂ သွက်ဂွံဆက်ဆောံအာ ဍုၚ်ဗမာဂှ် ဟီုရ။
ဟိုတ်ဂှ်ရ တၚ်တုပ်စိုတ်ဘုံအာသဳယာန် ၅ တၚ်ဂှ် သွက်ပရေၚ်ဍုၚ်ဗမာ ဒှ်မံၚ်တိုၚ်ခဳမွဲတုဲ ပလီုလေဝ်ဟွံဂွံ မိက်ဂွံ ကလေၚ်ပလေဝ်မ္ဂး ဒးကေတ်အာဆန္ဒ ဍုၚ်ကောန်ဂကောံ အာသဳယာန်တံဂှ် ညးထံက်ထ္ၜးရ။
စပ်ကဵုအထံက်ပၚ်ပရေၚ်ဗစာရဏာတုဲ နူကဵု AHA Centre သီုကဵုကောန်ဂကောံအာသဳယာန် မၚ်လ္ၚတ်ရံၚ်အာတံကီု နကဵုပရေၚ်အရီုဗၚ် ဂကောံဇိုၚ်ခရက် ဍုၚ်ဗမာ ညးစၞးတၟေၚ်အာသဳယာန် ဂွံအခေါၚ်အာထံက်ပၚ် လ္ၚတ်ရံၚ်အာ ဒေသအလဵုအသဳပၞာန် ထိၚ်ချုက်လဝ်လ္ၚဵုတံ မဒှ်ရ။
ဒၞာဲဒေသ ဒးလဝ်ဘဲပၞာန်သှ်ေမံၚ် ဂကောံကောန်ဍုၚ်အရၚ် ကေုာံ ပၠန်ဂတးတမ်ကညၚ်တံ ထိၚ်ချုက်ဂွံလဝ်ဂှ် နွံမံၚ်ပၟိက် အရီုဗၚ်ဗစာရဏာ မၞိဟ်တံကီုလေဝ် အခေါင်အာ ဟွံမွဲပုဟ်။
လ္တူအကာဲအရာဏံ နူကဵုပရေၚ်ထိၚ်ချုက် အလဵုအသဳတံ ကၠောန်အာ ပရေၚ်ပံၚ်တောဲမ္ဂး ပရေၚ်အရီုဗၚ်တံ သွက်ဂွံစိုပ်အာဒၞာဲ ညးနွံပၟိက် ပေၚ်ၚ်ဟွံမာန်ပုဟ်ဂှ် ဍုၚ်ဂမၠိုၚ်တံကၠိုဟ်ကေတ်မံၚ်တုဲ ကၠောန်မံၚ်ပရေၚ်အပြံၚ်လှာဲ ဟီုမံၚ်ဂှ် ဒုၚ်တဲမာန် ဟွံသေၚ်ဏီပုဟ်။
ဆဂး ကိစ္စအထံက်ပၚ်ရီုဗၚ်ဗစာရဏာ သွက်ဂွံစဵုဒၞာကဵု ညးဍုၚ်ကွာန်တံမာန်ဂှ် ပံၚ်တောဲမံၚ်ကဵု AHA Centre အာသဳယာန် ရောၚ် နူကဵုဍုၚ်ထံက်မံၚ်ဂလာန်ကဵု အလဵုအသဳပၞာန်တံဂှ် ဂွံအာတၚ်နၚ် သွက်ဂွံထ္ၜးစမွဲရဂှ် ဒံက်တာသိုၚ်ကျဳဇြေန်သိုဝ် ထံက်ထ္ၜးရ။
မွဲလပါ်ပၠန်ဂှ်လေဝ် ဟွံဒဂေတ်ဗက်လဝ် တၚ်တုပ်စိုတ်ဘုံ ၅ တၚ်ဂှ်တုဲ နူကဵုလက်ထက် ကံၚ်သဳပၞာန်တေံ အာသဳယာန်ကၟာတ်လဝ်အခေါၚ် ညးတာလျိုၚ်အဆံၚ်သၠုၚ် အလဵုအသဳပၞာန်တံ ဟွံကဵုတိုန်စိုပ် ကောံဓရီုအာသဳယာန် အဆံၚ်သၠုၚ်ၚ်တံရောၚ်။
ဟိုတ်ဂှ်တုဲ ပ္ဍဲကဵုကောံဓရီုအာသဳယာန်အဆံၚ်သၠုၚ်ဏံမ္ဂး ညးတာလျိုၚ် အလဵုအသဳပၞာန်အဆံၚ်သၠုၚ်ၚ်တံ ဂွံအခေါၚ် တိုန်စိုပ်ဟာ၊ စပ်ကဵုပရေၚ်ဍုၚ်ဗမာဂှ် တင်တုပ်စိုတ်ဘုံဏံ ဆက်ကေမ်ရပ် သၠောပ်ပအပ်အာ ဥက္ကဌစှ်ေအလန် အပ္ဍဲတဲ သင်ကာပူ ဟာဂှ် ဒးဆက်မၚ်ရံၚ်အာရောၚ်။
ပရိုၚ်-သြၚ်လောန်တိုၚ်မ်
Photo – Social Media