မတ်မလီု၊ နိုဝမ်ပါ ၁၀
အပ္ဍဲတွဵုရးမန် ဍုၚ်မတ်မလီု ရုၚ်ဂဥုဲၚိုဲမိုဝ် မပါလုပ် သီုဂကောံပရေၚ်ပိုန်ဒြပ် ၁၉ ဂကောံတံ ဂွံမံၚ်ပၟတ်ဓါတ်လလဳ ပွိုၚ် ၂၄ နာဍဳရဂှ် နူကဵုဌာန်ပရိုၚ်သြၚ်လောန်တိုၚ်မ် ဂွံလဝ်တၚ်နၚ် နူကဵုအလဵုအသဳပၞာန် တွဵုရးမန်ရ။
ဟိုတ်နူဂကောံပရေၚ်ပိုန်ဒြပ် ၁၉ ဂကောံတံ ချုက်လဝ်လိက်ကဵုအလဵုအသဳတွဵုရးမန်တုဲ ဂွံလဝ်ပၟတ်ဓါတ်လလဳ မွဲယူနေတ် ၉၀၀ ဒကေဝ် ပွိုၚ် ၂၄ နာဍဳ မဒှ်ရ။
ဂကောံပရေၚ်ပိုန်ဒြပ် ဂွံလဝ်ပၟတ်ပွိုၚ် ၂၄ နာဍဳဂှ်တှ်ေ ပ္ဍဲဍုၚ်မတ်မလီု ရုၚ်ဂဥုဲၚိုဲမိုဝ်၊ Ocean Center ၊ ရုၚ်စက်သ္ၚု ယှိုဲမျာၚ်၊ ရုၚ်ကရေက်ဆု ရာဘာ မိုဝ်မျချေဝ်၊ ရုၚ်ပတိတ်ဆုရာဘာ ရောဂေါ၊ Grand Mawlamyaing Shopping Mall၊ သ္ၚိဌာန် ဥူသိၚ်ဝါန် Myanmar Lighting Co,Ltd(IPP) တံပါလုပ်ရ။
တုဲပၠန် ပ္ဍဲပွိုၚ်ဍုၚ်မုဟ်ဍုၚ် ရုၚ်စက်ရာဘာ ယှိုဲမာဃ၊ ရုၚ်စက်ဂတဵုကြဳ ယှာန်ဟုၚ်၊ ရုၚ်စက်ရာဘာ ရာသုနှေစ်၊၊ ရုၚ်စက် ဖူရှေန်ခရမ် ရုၚ်စက်ရာဘာ ယှိုဲမျာန်မာ၊ ရုင်စက်ဆုပရဲ Honda Myamar၊ ရုၚ်စက်ရာဘာ Sir Trang Ayeyar ကေုာံ ပ္ဍဲကဵုပွိုၚ်ဍုၚ်ဇြပ်ဗု ရုၚ်စက် ကံကောၚ်ခြေၚ်ရတနာတံ ဂွံမံၚ်ပၟတ်ဓါတ်လလဳ ပွိုၚ် ၂၄ နာဍဳရ။
သွက်တွဵုရးမန် ဍုၚ်မတ်မလီု ပါ်ပရအ်အရၚ်တုဲ ဂွံလဝ်ပၟတ်လလဳ ၄၀ မဂ္ဂါဝါတ်ပြၚ်ဂှ် ကလေၚ်တြးကဵုလဝ် သွက်ဂကောံပရေၚ်ပိုန်ဒြပ် ၁၉ ဂကောံတံဏံ ၁၁ ဒသမ ၉၇ မဂ္ဂါဝပ် တၟော်မွဲနဲပၠန်မ္ဂး တြးကဵုလဝ် ပၟတ်ဓါတ်လလဳအကြာဍေံတံ ၂၇% မဒှ်ရ။
အလဵုအသဳသွံတြးကဵုမံၚ် ပၟတ်လလဳမွဲယူနေတ် ၉၀၀ ဂှ် ယဝ်ရတၟော်အာကဵု ပၟတ်ယူနေတ်ပွိုၚ်ဍုၚ်ရေဝ်မ္ဂး ခြာမံၚ် ၃၁၀၀ ဒကေဝ်တုဲ ညးဒေသရေဝ်တံ ဒးရာန်မံၚ် ပၟတ်ဓါတ်လလဳပုဂ္ဂလိက မွဲယူနေတ်နွံမံၚ် ၃၈၀၀ ဒကေဝ်ရ။
ကမၠောန်ပရေၚ်ပိုန်ဒြပ် ဂွံလဝ်ပၟတ်လလဳ ၂၄ နာဍဳတံဂှ် ဒှ်ကမၠောန် ဒတုဲဖဵုညးဍုၚ်ကွာန်တံလေဝ်ဟွံသေၚ်၊ ကမၠောန်ဓလိုက်တမ်ရိုဟ် ပရေၚ်ပိုန်ဒြပ် သွက်ဂုဏ်ဖဵုသွက်ဍေံတံဟေၚ် မဒှ်ရ။
ကမၠောန်အလဵုအသဳတြးကဵုမံၚ် ပၟတ်ဓါတ်လလဳတံဂှ်တှ်ေ သွက်ကဆံၚ်မၞိဟ် ဒုၚ်စရှ်သာအခေါၚ်တၟေၚ်တံ ခုတ်စွံကဵုလဝ် ၚုဟ်မးသာသာတုဲ ပါ်တြးသွံကဵုမံၚ် ပၟတ်လလဳ ဒှ်မံၚ်သာ်ဏံရောၚ်ဂှ် ညးဒေသ ဟွံမိက်ထမံက်ယၟု ၜါတၠ ပါ်ပါဲလဝ်ရ။
အပ္ဍဲဒေသဂှ်တှ်ေ သွက်ညးဍုၚ်ကွာန်တံ ဂွံပၟတ်ဓါတ်လလဳ ပ္ဍဲမွဲတ္ၚဲ ၜိုတ် ၂ နာဍဳဒှ်ကီုလေဝ် သွက်ရဲအဆံၚ်မၞိဟ် ဒုၚ်စရှ်သာ အခေါၚ်တၟေၚ်တံကဵု အလဵုအသဳတံ ဂွံလဝ်ပၟတ် ပွိုၚ် ၂၄ နာဍဳ ပေၚ်ၚ်ရ။
ပရိုၚ်-သြၚ်လောန်တိုၚ်မ်
Photo – Social Media