တၞၚ်သဳ၊ နဝ်ဝေမ်ဗာ (၇)
တုဲကၠုၚ် အပ္ဍဲဂိတုအံက်တဝ်ဗာမွဲဂိတုဓဝ်ဂှ် ဒၟါနူလၟေၚ်ဒဒှ် ပဋိပက္ခပကီုပရာပ်တံတုဲ အပ္ဍဲပွိုၚ်ဍုၚ် နူရးတၞၚ်သဳတံဂှ် ကောန်အရာပ် (၂၆) တၠ ချိုတ်တုဲ (၄) တၠ ကလိဂွံလဝ်ဝပ်ရောၚ်ဂှ် ဂကောံသုတေသန Southern Monitor လလောၚ်ပ္တိတ်လဝ်ရ။
ပ္ဍဲကဵုညးမဒးချိုတ်အာတံဂှ် နူပွိုၚ်ဍုၚ်လံၚ်လုၚ်ဂှ် (၁၃) တၠ၊ နူပွိုၚ်ဍုၚ်ဍာ်ဗုဂှ် (၆) တၠ ၊ နူပွိုၚ်ဍုၚ်တယိတ်ချံၚ်ဂှ် (၃) တၠ၊ ပ္ဍဲပွိုၚ်ဍုၚ် (ဘုတ်ပြၚ်း) ၊ ကအ်သံၚ်၊ ပဠဝ် ကေုာံ ပွိုၚ်ဍုၚ်တၞၚ်သဳတံဂှ် မွဲတၠစၟံစၟံ အပံၚ်ဖအိုတ် (၂၆) တၠ ချိုတ်အာလဝ်ရ။
ညးဍုၚ်ကွာန်ကောန်အရာပ်တံဝွံ အခိၚ်ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် အပ္ဍဲကွာန်တံဂှ် ဟိုတ်နူဒးဒုၚ်ရပ်ဒက်ဂစိုတ်တအ်ကီု၊ ဒးလွဟ်ဇၞော် နူဒပ်ကံၚ်ဇြဳပၞာန်တံ မပန်ပှော်လဝ်ဂှ်ကီု၊ နကဵုတၚ်ထ္ၜးဟိုတ် ပရေၚ်ဂီုကၠီုတံတုဲ ရပ်ဒက်ပန်ပှော် ကုညးမဍိုက်ကွဳလိုန်ဓာတ်တံကီုဂှ်တုဲ ဒးချိုတ်ဒၟံၚ်ရ။
သ္အာၚ်နူဂှ်ပၠန် ဂကောံသၟဝ်တဲကံၚ်ဇြဳပၞာန်ဂမၠိုၚ် မပ္တံကဵု ဂကောံပျူသဝ်ထဳ၊ ဂကောံ(သွေးသောက်) ၊ ဂကောံ (စွန်ရဲ) တံလေဝ် စွံပွန်ကၠတ်ဂစိုတ်ဒၟံၚ် ညးသၟတ်ကတိုၚ်ကၟဟ်တံ၊ ကောန်သ္ၚိကၟိန် PDF တံ ကေုာံ ကောန်ဗော် NLD တံလေဝ် နွံလဝ်ရ။
သ္အာၚ်နူဂှ်ပၠန် ဒၟါနူဂကောံဇြဟတ်ပၠန်ဂတးတံ ကၠတ်ပန်ဂစိုတ်လဝ် ပျူသဝ်ထဳတံ၊ ဂကောံ(သွေးသောက်) တံ၊ ညးကဵုပရိုၚ် ဒပ်ပၞာန်တံ မပါလုပ် သီုကဵုသ္ကိုပ်အုပ်ဓုပ်တံဂှ်တုဲလေဝ် ကောန်အရာပ် ဒးချိုတ်အာတံ နွံလဝ်ရ။
အတိုၚ်ဂလာန် ဂကောံ Southern Monitor ဂှ်မ္ဂး ကြဴနူဒပ်ပၞာန်သီအဝဵုတုဲ ပ္ဍဲရးတၞၚ်သဳဂှ် ညးမဒးချိုတ်အာ နွံကၠုၚ် စဵုကဵု (၂၉၃) တၠရဂှ် လလောၚ်ပ္တိတ်ကၠုၚ်လဝ်ရ။
ပရိုၚ်−သြၚ်လောန်တိုၚ်(မ်)