မတ်မလီု၊ နဝ်ဝေမ်ဗာ (၇)
သြန်ဂၠေံကဝ်ဝေဒ် နူကဵုကၟိန်ဍုၚ် မပ္တိတ်ဓလေံလဝ်ကဵု ပ္ဍဲသၞာံ ၂၀၂၀ လက်ထက်အလဵုအသဳ NLD တံဂှ် ယဝ်ရကလေၚ်လေဲကဵု အိက်သြန်ဍေံ အပ္ဍဲအခိၚ်မစၟတ်လဝ်ဂှ်မှ ထပ်ကလိဂွံ အခိၚ်မွဲသၞာံပၠန်ရောၚ်ဂှ် တုဲကၠုၚ်ဂိတုနဝ်ဝေမ်ဗာ (၄) တေံ ကံၚ်ဇြဳပၞာန် လလောၚ်ပ္တိတ်ကၠုၚ်ရ။
ကုကမ္ပဏဳ ကေုာံ ကမၠောန် နူကဵုကၟိန်ဍုၚ် မပ္တိတ်လဝ်ကဵု သြန်ဂၠေံတံဂှ် သၞာံတုဲကၠုၚ် ပ္ဍဲဂိတုမာတ် (၁၇) ဂှ် အလန်ပထမ ပပဵုပ္တိုန်ကဵုလဝ် အာယုက်ကာလ သ္ဂောံလေဲသြန်ဂၠေံဂှ် (၆) ဂိတု ကေုာံ ပ္ဍဲဂိတုသေပ်တေမ်ဗာ (၁၁) ဂှ် အလန်ဒုတိယ (၆) ဂိတုပၠန် အပံၚ်ဖအိုတ် ထပ်ပပဵုပ္တိုန်ကဵုလဝ် မွဲသၞာံရ။
မခိၚ်လၟုဟ်ဂှ် ဒၟါနူယဲကပ်ကဝ်ဝေဒ်တုဲ ဇီုကပိုက်ဒးလဝ် လ္တူကမၠောန်ပရေၚ်ပိုန်ဒြပ်တံနွံတုဲ ညံၚ်သြန်သၠုဲဂေတ်ဂြိပ် ပ္ဍဲကမၠောန်ပရေၚ်ပိုန်ဒြပ် အပ္ဍဲဍုၚ်တံ ဂွံပြေပြံၚ်ဂှ် စနူအခိၚ်ကာလ ဒးကလေၚ်ကဵုသြန်ဂၠေံ တ္ၚဲပေၚ်တုဲဂှ် ထပ်ပပဵုပ္တိုန်ကဵု အာယုက်မွဲသၞာံပၠန်ရောၚ် ကံၚ်ဇြဳပၞာန် သ္ဂးရ။
ဆ္ဂး နကဵုကမ္ပဏဳတံ/ကမၠောန်တံ မကေတ်လဝ်သြန်ဂၠေံတံဂှ် ညံၚ်ဂွံတၞီလုပ် အပ္ဍဲမွဲသၞာံ မပပဵုကဵုအာယုက်ဏံဂှ် ဒးကလေၚ်လေဲကဵု အိက်သြန် ညံၚ်ဂွံပေၚ်ၜါဝါ သွက်သၞာံပထမ ကဵု သၞာံဒုတိယတံဂှ် စၞောန်ပ္ညုၚ်ကၠုၚ်ရ။
သၟာဗ္ၚၜဵု မကေတ်လဝ် သြန်ဂၠေံကဝ်ဝေဒ် မွဲတၠဂှ် သွက်ဂွံကလေၚ်လေဲ အိက်သြန်တံ အပ္ဍဲကာလ မစၟတ်လဝ် မာန်ဂှ်တှ်ေ ဒးဇက်သၠုဲနူကဵုမ္ၚးဏံ နကဵုအိက်သြန်ဂၠိုၚ်ၚ်တုဲ ဒးကလေၚ်လေဲရောၚ်ဂှ်ရ အခက်အခုဲနွံဂှ် ဟီုရ။
“အိက်သြန်ဂှ်တှ်ေ မွဲသၞာံမွဲအလန် ပိုယ်တံ ဒးပၠောပ်ကဵုဏောၚ်၊ ဍေံတံ စၟတ်လဝ်ဂှ်တှ်ေ ဒးပၠောပ်ကဵုဏောၚ်၊ ယဝ်ရဟီုကၠုၚ် မၞိဟ်သှ်ေဒၟံၚ်တံ ဒးပၠောပ်ဏောၚ်ဟီုတှ်ေ ဒးပၠောပ် သီုညးဖအိုတ်ရ၊ ဟွံမွဲလေဝ် ဂၠါဲတုဲ ဒးကဵုဏောၚ်၊ ဆ္ဂး ပိုယ်တံ ဟွံမွဲတုဲ ဂၠေံလဝ်ရ၊ နူကဵုကၟိန်ဍုၚ် ဓလေံကဵုလဝ်ဂှ်တှ်ေ အိက်သြန်ဂှ် ဒးကလေၚ်ပၠောပ်ကဵု လၟေၚ်ၚ်ဏောၚ်၊ အခိၚ်နွံပၟိက်ဂှ် ပၟိက်တံ ဒးကလေၚ်လေဲကဵုဏောၚ်၊ ဟွံမွဲလေဝ် ပိုယ်တံ ဒးဂၠါဲဏောၚ်၊ ဂၠါဲကေတ် နူမ္ၚးဏံ ကဵုအိက်သြန်ဂၠိုၚ်ၚ်တုဲ ဒးကလေၚ်လေဲဏောၚ်၊ အေဇှ် ပ္ဍဲပိုယ်တံ အခက်အခုဲ နွံရ၊ ဟိုတ်ဂှ်ရ ပိုယ်တံ ပ္တိုန်ထ္ၜးအာတ်မိက်လဝ် တမ်ဍေံဂှ် စွံလဝ်ကဵု မွဲလစုတ်၊ မၚ်ကဵုၜိုတ်မွဲဂိတုရ” ဂှ် ညးသ္ဂးရ။
ပ္ဍဲကဵုလိက်ကဵုပရိုၚ် နူကဵုကမ္မတဳ ကမၠောန်ပရေၚ်လဟဵု ကာမံက်တိုန် မကဵုလဝ်အခေါၚ် ပ္တိတ်သြန်ဂၠေံ လ္တူပရေၚ်ပိုန်ဒြပ် မ္ဒးဇီုကပိုက်လဝ် ဒၟါနူယဲကပ်ကဝ်ဝေဒ်ဂှ်မ္ဂး ယဝ်ရသွက်ဂွံကလေၚ်လေဲဂှ် လီုလာ်အာမ္ဂး ဒးဒုၚ်ကေတ်အရေဝ် ဗွဲမဗဗွဲကဵုဥပဒေရောၚ် သ္ဂးလဝ်ရ။
ဟိုတ်ဂှ်ရ နကဵုကမ္ပဏဳ ကေုာံ ကမၠောန် မပ္တိတ်လဝ်သြန်ဂၠေံ နူကဵုတိုက်သြန်ပရေၚ်ပိုန်ဒြပ် ဍုၚ်ဗၟာတံ ယဝ်ရသ္ဂောံကလေၚ်လေဲသြန်ဂၠေံတံ သီုတမ်သီုအိက်ဂှ် လီုလာ်အာမ္ဂး ကေတ်အာအရေဝ် အတိုၚ်သၞောဝ်ဥပဒေတုဲ သွက်ဂွံလေဲကဵု အပ္ဍဲအခိၚ်ကာလ မပပဵုကဵုလဝ်အာယုက်တံဒတုဲဂှ် ကဵုလဝ်သတိရ။
တၠကမၠောန်ဟဝ်တေဝ်မွဲတၠဂှ်လေဝ် ကိစ္စ မဒးကလေၚ်လေဲအိက်သြန် သွက်သြန်ဂၠေံတံဂှ်ဝွံ မၞိဟ်အခက်အခုဲနွံတံ နွံမာန်တုဲ မၞိဟ်ဟွံမွဲတံလေဝ် နွံဒၟံၚ်တုဲ ဟိုတ်နူထပ်ပပဵုကဵုလဝ် အာယုက် (၁) သၞာံတံဂှ်ရ ပလေဝ်ပလေတ်ဒၟံၚ် သွက်ဂွံကလေၚ်လေဲကဵု အိက်သြန်အိုတ်ရဂှ် သ္ဂးရ။
“ပ္ဍဲကဵုပိုယ်တံဂှ် ဂကောံဟဝ်တေဝ်တံ အခက်အခုဲနွံတှ်ေ နွံဏောၚ်၊ ဟွံမွဲမ္ဂးလေဝ် ဟွံမွဲပုဟ် ဟီုဂွံရ၊ ဆ္ဂး နွံမွဲဂှ်တှ်ေ ဒးလေဲကဵုအလဵုအသဳ (၁) တၟံကၠံဟီုဂှ် အခိၚ်ထပ်ပပဵုပ္တိုန်ကဵု အာယုက်မွဲသၞာံပၠန်ဏံတှ်ေ မုဒှ်ဒှ်ရ၊ အခိၚ်ပိုယ်တံ ပ္ညဳပ္ညပ်သဳကၠဳလဝ်ဂှ်တှ်ေ ဒးလေဲထေက်ရဏောၚ်ဂှ် ဟီုလဝ်နွံ၊ ပပဵုပ္တိုန်ကဵု အာယုက် ပဆုဲပြံၚ်ကဵုအခိၚ်တံဟီုဂှ် ဒုၚ်ဂွံဒၟံၚ် သီုညးဖအိုတ်ရ၊ လ္ၚဵုဂှ်လေဝ် သွက်ဂွံလေဲကဵုဂှ် ပလေဝ်ပလေတ်ဒၟံၚ်ယျ” သာ်ဝွံ ညးသ္ဂးရ။
လ္တူပရေၚ်ပိုန်ဒြပ်ဇီုကပိုက် မက္တဵုဒှ်ကၠုၚ်မာန် ဒၟါနူယဲကပ်ကဝ်ဝေဒ်ဂၠးတိဂှ်တုဲ နူကဵုကမ္မတဳ ကမၠောန်ပရေၚ်ဗဂဵုလဟဵုတံ အတိုၚ်ကဏ္ဍ မဒးကဵုက္ဍိုပ်ဂှ် နူကဵုသြန်ဗွဝ်ကဝ်ဝေဒ် (၂၀၀) ဗဳလျာန်ဒ္ကေဝ်ဂှ် စနူသၞာံ ၂၀၂၀ ဂိတုဨပရဴ (၉) လက်ထက်အလဵုအသဳ NLD ဂှ်တုဲ ပ္တိတ်ဓလေံကဵုလဝ် အပံၚ်လၟိဟ် ကမၠောန် ကေုာံ ကမ္ပဏဳ (၅၉၉၀) ရ။
သွက်သြန်ဂၠေံ နကဵုနှေန်အိက်သြန် မွဲတၟံကၠံဂှ် စၟတ်လဝ်ကဵု အာယုက်မွဲသၞာံတုဲ ပ္တိတ်ဓလေံကဵုလဝ် ကမၠောန် CMP တံ၊ ကမၠောန်ဟဝ်တေဝ် ကေုာံ ကမၠောန်အာတရဴတံ၊ ကမၠောန်အဇာဍောတ် အဇာလဒေါဝ်တံ (၁၅၈) ဗဳလျာန်ဒ္ကေဝ်ရ။
သ္အာၚ်နူဂှ်ပၠန် ကမၠောန်ပရေၚ်တဵုလွဳ၊ ပရေၚ်လွဳလွတ်တိရစ္ဆာန် ကေုာံ ကမၠောန်ကၠောန်ပ္တိတ် ကပေါတ်တိတ်နူဍာ်တံ၊ ကမၠောန်ကၠောန်ပ္တိတ် ဗၞိက်သ္ဂောံပလံၚ်ဍုၚ်သ္အာၚ်တံ ကေုာံ ကမၠောန်ကၠောန်ပ္တိတ် ကပေါတ်ထ္ပက်အဇာ ဗၞိက်ပၠောပ်တံလေဝ် ပါလုပ်ရ။
တုပ်သာ်ဂှ်ကီု ကမၠောန် မပါလုပ်ရေၚ်တၠုၚ်လဝ် ပ္ဍဲကဵုအဆက်အစေန် မကၠောန်ပ္တိတ်ဗၞိက် (Supply Chain) နူကဵုအပ္ဍဲဍုၚ် စဵုကဵုပလံၚ်ဗစိုပ်ဍုၚ်သ္အာၚ်တံ၊ ကမၠောန်ကၠောန်ပ္တိတ် ဗၞိက်စၞစတံ၊ ကမၠောန်ရေၚ်တၠုၚ်ဒတုဲဖဵု ကမၠောန်ဍုၚ်သ္အာၚ်တံ ကေုာံ ဘာဗ္တောန်လိက်ပညာကွတ်ဂယိုၚ်လမျီုတံဂှ်လေဝ် ပ္တိတ်ဂၠေံကဵုလဝ်ရ။
ပရိုၚ်−သြၚ်လောန်တိုၚ်(မ်)