ထဝါဲ၊ နဝ်ဝေမ်ဗာ (၈)
ပ္ဍဲဗ္ဒါဲတၞံဇြဲ ဂၠံၚ်ဂေတ်ဍုၚ်၊ အရာပ် (ပိန္နဲတော) ၊ ဍုၚ်ထဝါဲ၊ ရးဒေသဇၞော်တၞၚ်သဳဂှ် ပ္ဍဲဂိတုနဝ်ဝေမ်ဗာ (၇) ပယျာံဂယး ၜိုတ် (၁၀) နာဍဳဂှ် အလံၚ်ညးစၞး ဗော်ဖောအ်ဗြေဝ်ခိုၚ်ကၠိုက် (USDP) မွဲတၠ ဒးဒုၚ်ဂစိုတ်လဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံဒပ်ဒမၠုက်လ္တူဍုၚ်ထဝါဲတံ ပန်ပှော်လဝ် ဥူမေန်ထိုဲ မဒှ်အလံၚ်ညးစၞး ဗော်ဖောအ်ဗြေဝ်ခိုၚ်ကၠိုက် လ္တူကွဳစက်ညး နကဵုသေနာတ်ရ။
ဒၟါနူဒးဒုၚ်ပန်ဂစိုတ်လဝ် ကဵုသေနာတ်ဂှ်ရ ပ္ဍဲကဵုဇကုခန္ဓ ကေုာံ တဲ ဥူမေန်ထိုဲတံဂှ် ကလိဂွံလဝ် ဝပ်သေနာတ် ဟွံအောန်နူကဵု (၁၀) လစုတ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ် လွာဲဂှ်ဂှ် ဂွံတီကေတ်ရ။
ဥူမေန်ထိုဲဝွံ ဟိုတ်နူထံက်ပၚ်ကဵုဒၟံၚ် ဂကောံပျူသဝ်ထဳတံ ကေုာံ ဒပ်ကံၚ်ဇြဳပၞာန်တံကီု၊ နဒဒှ်က္ဍိုပ်သ္ကိုပ်ပျူသဝ်ထဳဂှ် ဒှ်ဒၟံၚ်မၞိဟ်ရပ်လွဟ်ဂှ်ရ ပန်ပှော်ပသောၚ်လဝ်ရောၚ်ဂှ် ညးတာလျိုၚ် ဂကောံဒပ်ဒမၠုက်လ္တူဍုၚ်ထဝါဲမွဲတၠ ဟီုရ။
သ္အာၚ်နူဂှ်ပၠန် ဥူမေန်ထိုဲဝွံ မပ္တံကဵု ကရောၚ်ပၞာန်ဗကပ်ဗဗေၚ်တံ၊ ကောန်သ္ဂံၚ်ပရေၚ်ပၠန်ဂတးတံဂှ် ကဵုပရိုၚ် ကုကံၚ်ဇြဳပၞာန်တုဲ ကဵုရပ်ဂှ်ကီု၊ ဘပဠ ညးဍုၚ်ကွာန်တံ နာနာသာ်တုဲ ပၠံၚ်ၜးကေတ်သ္ၚိကၠအ်တံ ဟွံဗဗွဲဓဝ်တံဂှ်ကီု၊ ပံက်ဂအာၚ်ကၠအ် လ္တူတိဝါ ဟွံဗဗွဲဓဝ်တံ ဒှ်တမ် လုတ်လောန်ဒၟံၚ်ရောၚ် သ္ဂးရ။
ဂကောံရီုဗၚ်ပရေၚ်မၞိဟ်ဒေသတံဂှ် ကလေၚ်ပလံၚ်ကဵုလဝ် ဇွဥူမေန်ထိုဲ ပ္ဍဲကဵုကွာန်ဇြဳတဝ်၊ ပွိုၚ်ဍုၚ်တယိတ်ချံၚ် မဒှ်ဌာန်ဒၟံၚ်ညးဂှ် ဂွံတီကေတ်ရ။
ဥူမေန်ထိုဲ မဒှ်အလံၚ်ညးစၞး ဗော်ဖောအ်ဗြေဝ်ခိုၚ်ကၠိုက်ဏံဂှ်ဝွံ ပ္ဍဲပေါဲရုဲမာဲ ၂၀၂၀ တေံဂှ် လုပ်စိုပ်ဒုၚ်ရုဲစှ်လဝ် နဒဒှ်ညးစၞးရးဒေသဇၞော် နူကဵုပွိုၚ်ဍုၚ်တယိတ်ချံၚ်ဂှ်ကီုလေဝ် ဒှ်ညးမဒးကျအာလဝ် နကဵုမာဲ ပိုတ်တ်သကုတ်သကုတ်ရ။
ပရိုၚ်−သြၚ်လောန်တိုၚ်(မ်)