သေတ်တိုဲ၊ နဝ်ဝေမ်ဗာ (၉)
စနူဂိတုအံက်တဝ်ဗာ (၃၁) တုဲကၠုၚ်တေံတုဲ ကံၚ်ဇြဳပၞာန် လလောၚ်ပ္တိတ်လဝ်အမိၚ် သွက်ဂွံပလီုထောံ ဗ္ဒိုပ်ပါဲဒဴဘဲပၞာန် နူတွဵုရးရခေၚ် ဒၞါဲညးဒဒိုက်ပါဲဒဴဘဲပၞာန်တံ မသ္ပဒတဴဒၟံၚ် ဂၠိုၚ်ကဵုကိုဋ်တံဂှ် ကဵု သွက်ညးဍုၚ်ကွာန်ပါဲဒဴဘဲပၞာန်တံ သ္ဂောံစဴဌာန်ဒၟံၚ်တံရ။
ကံၚ်ဇြဳပၞာန်ဝွံ ကြဴနူလလောၚ်ပ္တိတ် အမိၚ်ဏံတုဲဂှ် ဗက်ရပ်ဒက်ကၠုၚ် ညးဒုၚ်တာလျိုၚ် ဗ္ဒိုပ်ပါဲဒဴဘဲပၞာန်တံကီု၊ လုပ်စိုပ်ဂၠိုက်ဂၠါဲကၠုၚ် ပ္ဍဲဗ္ဒိုပ်တံ နကဵုဇြဟတ်ဗွဲမဂၠိုၚ်ဂၠေၚ်တံကီုဂှ် ကၠောန်ၜိုတ်ကၠုၚ်ရ။
ညးဒုၚ်တာလျိုၚ် ဗ္ဒိုပ်ပါဲဒဴဘဲပၞာန်တံဝွံ ဂွိၚ်ဖေက်ဒးဒုၚ်ဂၠါဲသၞကဵု ကံၚ်ဇြဳပၞာန်တံတုဲ အလဵုညးဒေသတံ ကေုာံ ညးပါဲဒဴဘဲပၞာန်တံဂှ် ဟွံဂံၚ်အာတ်အရီုဗၚ်တံရတုဲ နူကဵုဌာန်ပရိုၚ်တံ ဆက်စၠောံသၟာန်သၟုက်ကၠုၚ်တံဂှ်လေဝ် ဟွံဂံၚ်သွဟ်ရပုဟ်ဂှ် သ္ဂးရ။
အခိၚ်လၟုဟ်ဂှ် ကံၚ်ဇြဳပၞာန်ဝွံ စွံအဓိကဂၠိုက်ဂၠါဲဒၟံၚ် လ္တူညးဒုၚ်တာလျိုၚ် ဗ္ဒိုပ်ပါဲဒဴဘဲပၞာန် နူကဵုကွာန်ဒုၚ်ညဵု ကေုာံ လ္တူဍုၚ်မျံက်ဥူတံဂှ်တုဲ ညးတံဝွံ ဆက်စပ်ဒၟံၚ်ကဵု ဒပ်ပၞာန်ရခေၚ် (AA) တံရောၚ် ကံၚ်ဇြဳပၞာန် ထေၚ်ကေတ်တုဲ ဗက်ရပ်ဒက်ဒၟံၚ်ဂှ်လေဝ် ညးဟီုရ။
တၞဟ်နသ္ဂောံရီုဗၚ်ကဵု ပရေၚ်ပါဲဒဴဘဲပၞာန်တံတုဲ ကေတ်အဆက်ကဵု ညးဒေသတံဂှ် သ္ဂောံဆက်ဖုၚ်ဝါတ်ဂါတ်သၟးဟွံက ယဝ်ရဂွံလာၚ်ဖုၚ်မ္ဂးလေဝ် ဒၟါနူဒှ်အခက်အခုဲကဵု ပၟတ်ဓာတ်လလဳတံတုဲ ဒးဂဗဒၟံၚ်ကဵု အခက်အခုဲ စပ်ကဵုပၠောပ်ဇြဟတ်ဖုၚ် ဟွံဂွံတံရဂှ် ညးဒေသတံ သ္ဂးအိုတ်ရ။
ပ္ဍဲကဵုတွဵုရးရခေၚ် ပေါဲဗ္တိုက်ကလေၚ်မွဲဝါပၠန်တံ မကလေၚ်ဒှ်ကၠုၚ် စနူဂိတုအံက်တဝ်ဗာ တုဲကၠုၚ်တေံဂှ်တုဲ အပ္ဍဲသတ္တာဟပထမ ဂိတုနဝ်ဝေမ်ဗာဂှ် ဒၟါနူကံၚ်ဇြဳပၞာန် ပန်ပှော်လဝ် ကဵုလွဟ်လက်နက်ဇၞော်ဂှ်ရ (၇) တၠ ချိုတ်တုဲ (၁၀) တၠ ကလိဂွံလဝ်ဝပ်ဇီုကပိုက်ဒးလဝ်ရ။
ပ္ဍဲကဵုညးမဒးချိုတ်အာတံဂှ် ကောန်ၚာ်သၟတ် အာယုက် (၈) သၞာံ မွဲတၠကဵု အပါနော်ဗျု အာယုက် (၈၀) သၞာံပြၚ်မွဲတၠ တံ ပါလုပ်ဒၟံၚ်ဂှ် ပရိုၚ်အပ္ဍဲဒေသတံ ထ္မံက်ထ္ၜးလဝ်ကီုလေဝ် လ္ပာ်ကံၚ်ဇြဳပၞာန် လလောၚ်ပ္တိတ် ဟီုဂးလဝ်ဂှ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)