မတ်မလီု၊ နဝ်ဝေမ်ဗာ (၉)
အပ္ဍဲတ္ၚဲအကြာဏံ ကရောံၚုဟ်ကၠေၚ်ဍေန်ဂၠးတိ ကလေၚ်သၠုၚ်တိုန်ညိညပၠန်ဂှ် ဟိုတ်နူရာန်ကၠေၚ်စက်တံ ၜိုတ်နွံပၟိက် ဟွံဂွံဂှ်ရ ၚုဟ်ကၠေၚ်စက်အပ္ဍဲဍုၚ် ကလေၚ်သၠုၚ်တိုန်ကၠုၚ်ရဂှ် တၠကမၠောန်ပရေၚ်သွံရာန် ကၠေၚ်ဍေန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ကၠေၚ်ဍေန်ဂၠးတိဝွံ တုဲကၠုၚ်ဂိတုနဝ်ဝေမ်ဗာ (၁) တေံ နူကဵုဂွံဒၟံၚ်ၚုဟ် မွဲစေဝ် ပွဳပွူ (၉၅) ဒဝ်ဠာအမေရိကာန်ဂှ် ပ္ဍဲဂိတုနဝ်ဝေမ်ဗာ (၈) ဂှ် ၚုဟ်ကလေၚ်တိုန်အာ မွဲစေဝ် စဵုကဵု (၉၇) ဒဝ်ဠာ ညိညပၠန်ရ။
ၚုဟ်ကၠေၚ်ဍေန်ဂၠးတိ သၠုၚ်တိုန်အာလဝ်ညိညဂှ်ရ ၚုဟ်ကၠေၚ်စက်အပ္ဍဲဍုၚ်ဝွံ ကၠေၚ်ဓာတ် (၉၅) မွဲလဳတာ နူ (၂၀၈၀) ဒ္ကေဝ်ဂှ် သၠုၚ်တိုန်အာ စဵုကဵု (၂၃၀၀) ဒ္ကေဝ်ကီု၊ (၉၂) မွဲလဳတာဂှ် နူ (၁၉၈၅) ဒ္ကေဝ် သၠုၚ်တိုန်အာ စဵုကဵု (၂၁၈၀) ဒ္ကေဝ်ကီုဂှ်ရ မွဲမွဲလဳတာ ၚုဟ်ကလေၚ်တိုန်အာ ၜိုတ် (၂၀၀) ဒ္ကေဝ်ဒှ်ရ။
တၠကမၠောန် ပရေၚ်သွံရာန်ကၠေၚ်စက်မွဲတၠဂှ် တန်တဴကဵု လ္တူၚုဟ်ကၠေၚ်ဍေန်ဂၠးတိတုဲ သွံတြးကဵုဒၟံၚ် ကၠေၚ်စက် အပ္ဍဲဍုၚ်တံကီုလေဝ် ဒၟါနူၚုဟ်ဟွံညိၚ်ဝတ်တုဲ ဒှ်ဒၟံၚ်အခက်အခုဲရောၚ်ဂှ် ဟီုရ။
အခိၚ်လၟုဟ်ဂှ် ၚုဟ်ကၠေၚ်စက်တံဝွံ အရိုဟ်ဒဒှ်တ္ၚဲ အပြံၚ်အလှာဲတံ က္တဵုဒှ်ဒၟံၚ်တုဲ လ္ပာ်ကံၚ်ဇြဳပၞာန် ၜိုတ်နွံပၟိက် သွံတြးကဵုဒၟံၚ်ဂှ် ဟွံမွဲဏီရ။
ကံၚ်ဇြဳပၞာန်ဂှ် သွက်ၚုဟ်ကၠေၚ်စက် ဂွံစှ်ေအာဂှ် ပၠောပ်ဗ္ကန်ဒၟံၚ် ကၠေၚ်စက်တံ နူကဵုဍုၚ်ရုယှာရောၚ် ဟီုဒၟံၚ်ကီုလေဝ် အပ္ဍဲဗွဝ်ဖျာဂှ် ဟွံဂွံကၠေၚ်စက် နူဍုၚ်ရုယှာတံဏီပုဟ်ဂှ် တၠကမၠောန်ပရေၚ်သွံရာန် ကၠေၚ်စက်မွဲတၠ သ္ဂးအိုတ်ရ။
သ္အာၚ်နူဂှ်ပၠန် တိုက်သြန်ဗဟဵု သၟဝ်တဲကံၚ်ဇြဳပၞာန်ဂှ် ဒၟါနူၚုဟ်ကၠေၚ်စက် က္ဍၚ်တုဲ ညံၚ်ၚုဟ်ဗၞိက်သ္ဇိုၚ် မက္ဍၚ်ဒၟံၚ်တံ ဂွံသက်သာအာဂှ် နူကဵုဗွဝ်ဖျာသြန်သၠုဲ ဍုၚ်သ္အာၚ်တံဂှ် ထံက်ပၚ်ကဵုအာ သြန်ဒဝ်ဠာအမေရိကာန် (၂၀၀) မဳလျာန်ပြၚ်ရောၚ် တုဲကၠုၚ်ဂိတုအဝ်ဂါတ် (၃၁) တေံ လလောၚ်ပ္တိတ်လဝ်ကီုလေဝ် ၚုဟ်ကၠေၚ်စက်စှ်ေအာလဝ် တီတီဒှ်ဒှ်ဂှ် ဟွံမွဲဏီရ။
ပ္ဍဲကၟိန်ဍုၚ်ဗၟာဂှ် ၚုဟ်ကၠေၚ်စက်ဝွံ ပ္ဍဲလက်ထက်အလဵုအသဳ NLD တုဲကၠုၚ်တေံဂှ် မွဲလဳတာ ၚုဟ်မၞုံကၠုၚ် ပွဳပွူ (၆၀၀) ဒ္ကေဝ်တုဲ ကြဴနူဒပ်ပၞာန်သီအဝဵုတုဲဂှ် မွဲလဳတာ စဵုကဵု (၂၄၀၀) ဒ္ကေဝ် ၚုဟ်သၠုၚ်တိုန်ကၠုၚ် ဗ္ဒါဲ (၄) ဆပြၚ်တုဲ ၚုဟ်ဟွံညိၚ်ဝတ်တံလေဝ် က္တဵုဒှ်ဒၟံၚ် အရိုဟ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)