ကာတာ၊ နဝ်ဝေမ်ဗာ (၉)
ပ္ဍဲကာတာ မပလေဝ်ပလေတ်ဒၟံၚ် သွက်ဂွံကၠောန်ဗဒှ် ပေါဲပြိုၚ်သၠိုၚ်ဂၠးကဝ် ဟွံဂွံစိုပ် (၂) သတ္တာဟဏီတံဂှ် ကလုတ်တမာန် သၠိုၚ်ဂၠးကဝ် ကာတာမွဲတၠ ဟိုတ်နူဟီုဂးလဝ် ကဵုအစဳဇန်ရုပ်ရမျာၚ် ဂျာမာန် ZDF တံ ပွမဆက်ဆောံလိၚ် အကြာမၞိဟ်လိၚ်တုပ်ရေၚ်သ္ကအ်တံဂှ်ဝွံ “ခ္ဍဳလ္ၚတ်ဒၟံၚ်ကဵု လ္ပာ်စိုတ်” တေံဂှ်ရ ညးဂမၠိုၚ် ဟွံပေၚ်စိုတ် ဒှ်ကၠုၚ်အိုတ်ရ။
ပ္ဍဲကဵုအေန်တာဗျူ မတက်လဝ် ပ္ဍဲဍုၚ်ဒိုဝ်ဟာမွဲဂှ် မၞိဟ်ဂွံဒုၚ်ရုဲစှ်တြေံ ဍုၚ်ကာတာ ခါလေသ်သာမာန်ဂှ် ပွမဆက်ဆောံလိၚ် အကြာမၞိဟ်လိၚ်တုပ်ရေၚ်သ္ကအ် ပ္ဍဲကာတာဂှ်ဝွံ ဒဒှ်ရဟွံလုပ်သၞောဝ်ဂှ် ဟီုဂးလဝ်ဏီရ။
ကၟိန်ဍုၚ်ဝွံ ဒဒှ်ရစၟဳစလဝ် ကၟုဲထဳကၠုၚ်စိုပ် ဍုၚ်ကာတာ သွက်ပေါဲပြိုၚ်သၠိုၚ်ဂၠးကဝ်တံဂှ် မွဲပြကောဋိကိုဋ်ပြၚ်တုဲ ကုပူဂဵုလဵုမွဲဟွံဟီု မကၠုၚ်စိုပ်ဍုၚ်ကာတာ သွက်ပေါဲပြိုၚ်တံဂှ် ထေက်ကဵုဒးမံၚ် အတိုၚ်စေဝ်ပၞောန်ဍုၚ်ဝွံရောၚ် ညးဟီုဂးလဝ်ရ။
“ဍေံတံဂှ် ဒးဒုၚ်တဲ စေဝ်ပၞောန်ပိုယ်တံဏောၚ်၊ ပွမဆက်ဆောံ အကြာမၞိဟ်လိၚ်တုပ်ဂှ်ဝွံ ဒှ်ဟာရာမ် (အရာမတာဒၞါလဝ်) ရောၚ်” ဂှ် ဟီုဂးလဝ် ပ္ဍဲကဵုအေန်တာဗျူညးရ။
“အဲဂှ် ဒှ်မွဿလေမ် မတေၚ်ဂြတ်မွဲ ဟွံသေၚ်ကီုလေဝ် မူဟိုတ်ဒးဒှ် ဟာရာမ်ဟီုမ္ဂး ဒၟါနူပ္ဍဲစိုတ်တေံ ခ္ဍဳလျတ်လီုလာ်ဒၟံၚ်ရောၚ်” သာ်ဝွံ ညးသှ်လဝ်ကဵုရ။
ကြဴနူဂှ်တုဲ ညးတာလျိုၚ်မပါဗက်ကၠုၚ် မွဲကရောံညးဂှ် ဗဒေါအ်ထောံ အေန်တာဗျူဂှ် လွာဲဂှ်တုဲ သွက်ဂွံကဵုတၚ်စၟတ် ဟီုဂးမွဲမွဲဂှ် ပ္ဍဲအခိၚ်ဆက်စၠောံ ဇရေၚ်ညးစဳဇန် ပေါဲပြိုၚ်သၠိုၚ်ဂၠးကဝ်တံ ကေုာံ FIFA မၞုံကာတာတံဂှ် ညးစဳဇန်ပေါဲဂှ်ဝွံ အပ္ဍဲပေါဲပြိုၚ်သၠိုၚ်ဂၠးကဝ် အပ္ဍဲဍုၚ်ဂှ် ဒဒှ်ရဒုၚ်တၠုၚ်အာ ဇၟာပ်ပ်မၞိဟ်ဂှ် ဟီုဂးကၠုၚ်လဝ် ထပ်ကဵုထပ်ရ။
ပွမဆက်ဆောံလိၚ် အကြာမၞိဟ်လိၚ်တုပ်ရေၚ်သ္ကအ်တံဂှ်ဝွံ ပ္ဍဲကဵုဍုၚ်မွဿလေမ် ကွေတ်ဗိုန်တံဂှ် ဟွံလုပ်သၞောဝ်တုဲ သၟာတေအ်ဗဝ် လ္ၚဵုတံဝွံ သၞောဝ်ဍုၚ်ကာတာတံဏံဂှ် အရာမပါ်ကဆံၚ်တံနွံဂှ် စိုတ်ဂွိၚ်ဂွါဲဒၟံၚ်တံလေဝ် နွံရ။
ပ္ဍဲကဵုပုရိသာတ်အာတရဴ သွက်ပေါဲပြိုၚ်သၠိုၚ်ဂၠးကဝ်ဂှ် ဗွဲတၟေၚ် ဂကောံအခေါၚ်အရာမၞိဟ် LGBT+ တံ၊ မၞိဟ်ဗြဴတံ ဒဒှ်ရစိုတ်ဂွိၚ်ဂွါဲနွံဒၟံၚ်ဂှ်လေဝ် ဟီုဂးလဝ်ကီုရ။
ကာတာဝွံ ၜိုန်ရဒှ်ကၟိန်ဍုၚ် သ္ကုတ်ဗၟံက်လဒေါဝ် ကိုပ်ကၠာအိုတ် မဒုၚ်တဲကၠောန်ဗဒှ် ပေါဲပြိုၚ်သၠိုၚ်ဂၠးကဝ် နဒဒှ်တၠသ္ၚိကီုလေဝ် အပ္ဍဲသၞာံတုဲတုဲကၠုၚ် ဟွံလအ်တံဂှ် ဒၟါနူပွဆက်ဆောံ လ္တူကောန်ကမၠောန် ဍုၚ်သ္အာၚ်တံကဵု သၞောဝ်ဥပဒေ ပရေၚ်မၞိဟ် မတေၚ်ဂြတ်တံဂှ်တုဲ ဒးဆေၚ်ဒၟံၚ်မုက်ကဵု ဇြဟတ်ဂရိုဟ်တံ ဗွဲမသ္ကာတ်မြဟ်ရ။
Ref: CNA