ထဝါဲ၊ နဝ်ဝေမ်ဗာ (၁၀)
နူကဵုအရာပ် (ကြပ်စားပြၚ်) ၊ ဍုၚ်ထဝါဲ၊ ရးဒေသဇၞော်တၞၚ်သဳဂှ် ညးမဒှ်မအံက် ကောန်သ္ဂံၚ် PDF ကိုဝ်အံၚ်ခိုၚ် ဒးဒုၚ်ရပ်ဂစိုတ်လဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုနဝ်ဝေမ်ဗာ စၟတ်တ္ၚဲ(၈) ၜိုတ် (၁၁) နာဍဳဗ္တံဂှ် ဒပ်ကံၚ်ဇြဳပၞာန်ကဵု ဂကောံပျူသဝ်ထဳတံ ကၠုၚ်စိုပ်ရပ်ဒက်ကော်ဏာလဝ် ဥူကျူလွေန် အာယုက် (၆၀) မဒှ်မအံက် ကောန်သ္ဂံၚ် PDF ကိုဝ်အံၚ်ခိုၚ် ပ္ဍဲကဵုသ္ၚိဒၟံၚ်ညးရ။
ပ္ဍဲဂိတုနဝ်ဝေမ်ဗာ (၉) ပယျာံဂယးပြဟ်ဟ်ဂှ် ပ္ဍဲဗ္ဒါဲရေၚ်တၞံတာ လ္ပာ်ဂၠံၚ်ဇၞော်တၟိ၊ အရာပ်ကျံက်မဝ်ဂှ် ကလေၚ်ဂွံဆဵုကေတ် ဥူကျူလွေန် နူကဵုဂကောံပျူသဝ်ထဳတံ ကေုာံ ကံၚ်ဇြဳပၞာန်တံ မရပ်ဒက်ကော်ဏာလဝ်ဂှ် သီုကဵုလမျီုဟွံမွဲရ။
အခိၚ်ကလေၚ်ဆဵုဂှ် ဥူကျူလွေန်ဝွံ ချိုတ်ဒၟံၚ် နကဵုဝပ် မ္ဒးလဝ်ကမ်ပ္ဍဲက္ဍိုပ်ကဵု ကၟာတ်လဝ်မုက် ကဵုယာတ်မွဲမွဲဂှ်ရ။
အတိုၚ်ဂလာန်ညးဒေသတံဂှ်မ္ဂး ဥူကျူလွေန်ဝွံ ဒၟါနူပရေၚ်ထတ်ယုက် ဟွံခိုဟ်တုဲ ဟွံကၠောန်ကလောန်မွဲသာ် ဇူဒၟံၚ်ပ္ဍဲသ္ၚိ ဂၠိုၚ်ကဵုဂိတုရဂှ် သ္ဂးရ။
ဇွ ညးမဒးချိုတ်အာဂှ် ဂကောံရီုဗၚ်ဟံၚ်ပြာ်ပရေၚ်မၞိဟ်တံ ကၠုၚ်စိုပ်ပလံၚ်ဏာလဝ် ဇရေၚ်သ္ၚိဒၟံၚ်ညးဂှ် ဂွံတီကေတ်ရ။
သမ္ဘာဥူကျူလွေန် ဒဝ်ညောအ်လှာၚ်ဂှ်လေဝ် တုဲကၠုၚ် ဂိတုမေ (၂၄) တေံ အခိၚ်သွံဒၟံၚ်ဒူရေန် ပ္ဍဲဖျာဇိုၚ်ၜဳထဝါဲဂှ် သၟာသေနာတ်ဟွံတီယၟုမွဲတၠ ကၠုၚ်စိုပ်ပန်ပှော်လဝ် နကဵုသေနာတ်တုဲ ဒးချိုတ်အာလဝ်ကီုရ။
ပ္ဍဲရးတၞၚ်သဳဂှ် ကြဴနူဒပ်ပၞာန်သီအဝဵုတုဲ ညးဍုၚ်ကွာန်ကောန်အရာပ် ဒးဒုၚ်ဂစိုတ်လဝ်တံ ဗၞတ် (၃၀၀) နွံဂှ် ဂကောံ Southern Monitor လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)