လ္ဂုၚ်၊ နဝ်ဝေမ်ဗာ (၁၀)
ပ္ဍဲဍုၚ်လ္ဂုၚ် မဒှ်ဍုၚ်ပရေၚ်ပိုန်ဒြပ် ကၟိန်ဍုၚ်ဗၟာဂှ် ဒၟါနူပၟတ်ပၠိုတ်တံ သာပရေံကၠုၚ်ဂှ်ရ ကမၠောန်အဇာဍောတ်၊ အဇာလဒေါဝ် SME ဗွဲမဂၠိုၚ် ဒးဆေၚ်ကၠုၚ်မုက်ကဵု အကာဲအရာ ထပ်ဒးဒေါအ်ဇူပၠန်ရဂှ် တၠကမၠောန် SME တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဍုၚ်လ္ဂုၚ်ဂှ် အပ္ဍဲအကြာတ္ၚဲတံဏံ ပၟတ်ဓာတ်လလဳ ပိုတ်ပၠိုတ်တံ က္တဵုဒှ်ကၠုၚ် မွဲဏှမွဲဏှတုဲ ပၟတ်ပၠိုတ်မွဲဝါမ္ဂး နူ (၄) နာဍဳ စဵုကဵု (၅) နာဍဳ အခိၚ်လအ်လေပ်ဂှ်ရ ကမၠောန်အဇာဍောတ် အဇာလဒေါဝ် SME တံ သွက်ဂွံဂေတ်ဂြိပ်ဂှ် ဒးဂဗဒၟံၚ် အခက်အခုဲအိုတ်ရ။
အခိၚ်လၟုဟ်ဂှ် ဒၟါနူပၟတ်ဓာတ်လလဳ ဟွံမှာန်တံကီု၊ ၚုဟ်ကၠေၚ်စက်တံ သာက္ဍၚ်ကၠုၚ်ဒၟံၚ်တံကီု၊ ခရိတ်အိုတ်နာနာ သၠုၚ်တိုန်ဒၟံၚ် ဂၠိုၚ်ကဵုဆကီုဂှ်ရ ကမၠောန် SME လ္ၚဵုတံ စဒေါအ်ဇူကၠုၚ်အိုတ်ရ။
ကမၠောန်မသှ်ေဒၟံၚ်တံဂှ် ၜိုန်ရဒးဂေတ်ဂြိပ်ဒၟံၚ် ကဵုစက်ပၟတ်ကီုလေဝ် ဒၟါနူၚုဟ်ကၠေၚ်စက် က္ဍၚ်ဒၟံၚ်တံဂှ်တုဲ ဍာ်ဇမၠိၚ် သ္ဂောံဆက်တန်တဴအာမာန်ဂှ် ဒးဂဗဒၟံၚ်အခက်အခုဲရောၚ် တၠကမၠောန်မွဲတၠ ဟီုရ။
“ပ္ဍဲလ္ဂုၚ်ဂှ် ပၟတ်ဂှ် ကၠုၚ်မွဲနာဍဳတုဲ လီုဒၟံၚ် ၜိုတ် (၈) နာဍဳဏောၚ်၊ ပိုယ်တံတှ်ေ ကေတ်အေဂျေန် ကွာဲၜဲ စပ်ကဵုဍာ်ကလောံတံဂှ်တုဲ သွံမံၚ်ရ၊ အေဂှ်တှ်ေ ပၟတ်လီုတှ်ေ ဍေံလီုအာဖအိုတ်ရ၊ ဆောံလေၚ်ဂၠိုၚ်တုဲ ဒးကၠဟ်ထောံဖအိုတ်ရ၊ မွဲပၠန်ဂှ် ကၠောန်ဂဇာပသဲ၊ ပါၚ်တြၚ်ပသဲတံတုဲ ဒုၚ်လဝ်တဲ အဝ်ဒါတံရ၊ ပၟတ်ဟွံကၠုၚ်တုဲ ဟွံဂွံကၠောန်ကလောန်ပုဟ်၊ ပံက်စက်ပၟတ်တုဲ ကၠောန်မ္ဂးလေဝ် ၚုဟ်ကၠေၚ်ဂှ် တိုန်ဒၟံၚ်တုဲ ဟွံပြေပြံၚ်ပုဟ်၊ ပၟတ်ကၠုၚ် အခိၚ်ဟွံမှာန်တုဲ ကမၠောန်ကွတ်တဲ၊ ကွတ်စက် အပ္ဍဲသ္ၚိတံဂှ် ဒးဒေါအ်ဇူလဝ်ရ၊ သၟာကမၠောန် မ္ဒးဗ္ဒဗ္ဒါဲဒၟံၚ် လ္တူပိုယ်တံလေဝ် ပၟတ်ကၠုၚ်အခိၚ်ဟွံမှာန်တုဲ ဒးဒှ်အာ ကမၠောန်ကၟိတ်ဟွံမွဲအိုတ်ရ” ဂှ် တၠကမၠောန်အဇာဍောတ် နူပွိုၚ်ဍုၚ် (ရွှေပေါက္ကံ) ဍုၚ်လ္ဂုၚ်မွဲတၠ ဟီုလဴထ္ၜးလဝ်ရ။
ကဝ်ပရေယှေန် တြးဇြဟတ်ဓာတ်လလဳ ဍုၚ်လ္ဂုင် (YESC) ဂှ် ဒၟါနူပၠံၚ်သၟုဟ်ဓာတ်သဘာဝ (ဇောတိက) မပလံၚ်ကဵုဒၟံၚ် ရုၚ်စက်ပရအ်ဇြဟတ်ဓာတ် မသုၚ်စောဲသၟုဟ်ဓာတ်သဘာဝ မၞုံအပ္ဍဲရးဒေသဇၞော်လ္ဂုၚ်တံ က္တဵုဒှ်သၟုဟ်ဓာတ် ဇိမ်တိတ်ဂှ်ကီု၊ တာဝါတိုၚ် စၟတ် (၁၁၀) ကေုာံ စၟတ် (၁၁၁) လာၚ်ဇြဟတ်ဓာတ် (ဘီလူးချောၚ်း−တီကျစ်) (၁၃၂) ကေဝဳတံ ကဝ်လီုလာ်အာတံတုဲ ပွမဗလးကဵုဇြဟတ်ဓာတ် အပ္ဍဲသၞောတ်ဇြဟတ်ဓာတ်တံ ယအ်အာ ဗၞတ် (280) MW ဂှ် လလောၚ်ပ္တိတ်လဝ်ရ။
ဟိုတ်ဂှ်ရ ညံၚ်သၞောတ်ဇြဟတ်ဓာတ် ဂွံညိၚ်ဝတ်ဂှ် သွက်ဂွံရေၚ်တၠုၚ် ကလေၚ်ပလေဝ်ယှအ်ထိၚ် နကဵုအခိၚ်တံဂှ်တုဲ ထပိုတ်အာ ဇြဟတ်ဓာတ်ယာယဳ ပ္ဍဲပွိုၚ်ဍုၚ်လ္ၚဵုလ္ၚဵု နွံအပ္ဍဲရးလ္ဂုၚ်တံရောၚ် တုဲကၠုၚ်ဂိတုနဝ်ဝေမ်ဗာ (၅) တေံ လလောၚ်တြးလဝ်ရ။
တၠကမၠောန်ပရေၚ်ပိုန်ဒြပ်မွဲတၠဂှ် ယဝ်ရပြသၞာပၟတ်ဓာတ်လလဳ အပ္ဍဲဂိတုကၠုၚ်စိုပ်တံဏံ သာပရေံကၠုၚ်မ္ဂး ကမၠောန်အဇာဍောတ်တံ ဒေါအ်ဒေအ်အာ ပေၚ်ၚ်မာန်ဂှ် သ္ၚဳဂၠိပ်လဝ်ရ။
“ကမၠောန်အဇာဍောတ် ကြပ်ဖအိုတ်ဂှ် စကာပၟတ်ဓာတ်လလဳတုဲ ဂေတ်ဂြိပ်ဒၟံၚ်အိုတ်ရ၊ စပ်ကဵုပၟတ်ဓာတ်လလဳ ယောၚ်ယာဂှ်တုဲ ဒးဟီုလညာတ်အဲတှ်ေ လၟုဟ်ဂှ် ခက်ခုဲဒၟံၚ် ၜိုတ်ဏံတှ်ေ သွက်ဂွံအာ စဵုကဵုဂိတုဨပရဴ၊ ဂိတုမေ ဒဵုကဵုအခိၚ်က္ညၚ်တေံဂှ် ဒးချပ်ဗ္စာမ္ဂး သွက်ဂွံတတ်ကၠောံ အပ္ဍဲပွိုၚ်ထပှ်၊ ဒ္စါံဂိတုဏံဂှ် တၚ်ကော်ဆောဏံ ဇၞော်မာန်ဏောၚ်၊ ၚုဟ်ကၠေၚ်စက် သၠုၚ်တိုန်မ္ဂးလေဝ် ခရိတ်ကၠောန်ပ္တိတ်ဗၞိက်တံလေဝ် သၠုၚ်တိုန်အာတုဲ ၚုဟ်ဗွဝ်ဖျာတံ တိုန်ကၠုၚ်ဏောၚ်၊ အရာမဇီုကပိုက်တံဂှ် အပ္ဍဲမွဲဂိတု၊ ၜါဂိတုဏံမ္ဂး တီကၠးကၠုၚ်ဏောၚ်၊ ကမၠောန်အဇာဍောတ် ဒစးဒုၚ်ပလေဝ်ပလေတ်လဝ် ဟွံမာန်တံ ဒေါအ်ဒေၚ်အာဏောၚ်၊ ကမၠောန်အဇာလဒေါဝ်ကဵု အဇာဇၞော်တံဂှ်တှ်ေ ဂၠါဲနဲကဲမွဲမွဲတုဲ သွက်ဂွံဂေတ်ဂြိပ်ဂှ် ဂ္စါန်ကၠုၚ်အိုတ်ဏောၚ် ထေၚ်ရ” ဂှ် တၠကမၠောန်မွဲတၠ ဟီုရ။
ကမၠောန် အဇာဍောတ်၊ အဇာလဒေါဝ် (SME) ပ္ဍဲဍုၚ်ဗၟာတံဝွံ ဒၟါနူယဲကပ်ကဝ်ဝေဒ် ကဵု ပရေၚ်သီအဝဵုတံဂှ်တုဲ နူကဵုဇြဟတ်ဍိုန်လျစှ်ေသိုက်က်ဂှ် ဟိုတ်နူကဵုပရေၚ်ကောပ်ကာဲဖန်ဇန် ကံၚ်ဇြဳပၞာန်တံ ပရေံဂှ်တုဲ လၟုဟ်မ္ဂး ဒးဆေၚ်ဒၟံၚ်မုက်ကဵု အကာဲအရာဒးကၠေံဗ္ဒန်အာ ပေၚ်ၚ်တံရ။
ယဝ်ရကမၠောန်အဇာဍောတ်၊ အဇာလဒေါဝ် SME တံ ဒေါအ်ဇူကၠုၚ်မ္ဂး ပရေၚ်စသုၚ်မံၚ်စံၚ် ကဆံၚ်မၞိဟ်သ္ဇိုၚ် မဒးသ္ပပဓာန်ဒၟံၚ် လ္တူကမၠောန်တံဏံ သာကြေပ်ဂြတ်ကၠုၚ်မာန်ရောၚ် တၠပညာပရေၚ်ပိုန်ဒြပ်တံ သ္ဂးအိုတ်ရ။
ဆ္ဂး က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ်ဂှ် ကမၠောန်အဇာဍောတ်၊ အဇာလဒေါဝ် SME တံ ဂွံဖောအ်ဗြေဝ်ကၠုၚ်ဂှ် ရီုဗၚ်ကဵုအာ ဍိုက်က်ပေၚ်ၚ်ရောၚ် ဟီုဂးလဝ်ကီုလေဝ် နတဲဏံဂှ် သွက်ဂွံဂွံ ပၟတ်ဓာတ်လလဳလၟေၚ်ၚ်ရဂှ် ရီုဗၚ်ကဵုမာန်လဝ် ဟွံမွဲဏီရ။
အလုံမွဲကၟိန်ဍုၚ်ဂှ် ကမၠောန် SME ဂၠိုၚ်ကဵုကိုဋ် နွံဒၟံၚ်ရ၊ ဆ္ဂး ကမၠောန် SME တံဝွံ ဒၟါနူပရေၚ်သီအဝဵုတုဲ ကမၠောန်တံ သွက်ဂွံဆက်ဂေတ်ဂြိပ်ဂှ် ဒးရုန်ဂ္စါန်ဒၟံၚ် တၟာလှ်ေတုဲ ကမၠောန်လ္ၚဵုတံမ္ဂး ကျဗြံဒၟံၚ်တုဲ ကၟာတ်ကၠုၚ်ကမၠောန်အိုတ်ရ။
ပရိုၚ်−သြၚ်လောန်တိုၚ်(မ်)