ပဠဝ်၊ နဝ်ဝေမ်ဗာ (၁၀)
ပ္ဍဲပွိုၚ်ဍုၚ်ပဠဝ်၊ ရးတၞၚ်သဳဂှ် အပ္ဍဲပေါဲဗ္တိုက် အကြာဒပ်ကံၚ်ဇြဳပၞာန်ကဵု ဒပ်စဵုဒၞါညးဍုၚ်ကွာန်တံဂှ် ဒပ်ကံၚ်ဇြဳပၞာန်တံ ကၠောန်သ္ပစံၚ်ပလီုပလာ်ဒၟံၚ် သ္ၚိဌာန်ညးဍုၚ်ကွာန်တံဂှ် ကောန်ဂကောံဒပ်စဵုဒၞါညးဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုနဝ်ဝေမ်ဗာ (၈) တေံ ပ္ဍဲကွာန်(တပို့) ၊ ပွိုၚ်ဍုၚ်ပဠဝ်ဂှ် နူဒပ်စဵုဒၞါညးဍုၚ်ကွာန်ကရေၚ်ပဠဝ် (KPDF) တံ ဗ္တိုဟ်လဝ်မာၚ် ကုကရောၚ်ပၞာန် ကေုာံ ကွဳစက်ကံၚ်ဇြဳပၞာန်တံဂှ်တုဲ ပ္ဍဲဂိတုနဝ်ဝေမ်ဗာ (၉) ဂှ်လေဝ် မွဲလ္ပာ်ကုမွဲလ္ပာ် ထပ်က္တဵုဒှ်လဝ် ပရေၚ်ပန်ပှော် ပ္ဍဲအကြာကွာန် (နန်းပရုပ်) ကဵု ကွာန်(ထမၚ်းမစား) တံဂှ်ရ။
ကြဴနူဂှ်တုဲ ဂကောံဒပ်ကံၚ်ဇြဳပၞာန်တံ ဗပေၚ်ကၠုၚ်ဇြဟတ် ထပ်လုပ်စိုပ်ကၠုၚ် အပ္ဍဲကွာန်တံတုဲ စံၚ်ပလီုပလာ်လဝ် သ္ၚိဒၟံၚ် နူကဵုကွာန် (တပို့ ၊ နန်းတောင်၊ တန်ရှင်၊ ပိတပ်)တံ အပံၚ်လၟိဟ် (၁၀) မနွံဂှ် ဂကောံဒပ်စဵုဒၞါညးဍုၚ်ကွာန်တံ ဟီုရ။
အခိၚ်လၟုဟ်ဂှ် ဒပ်ကံၚ်ဇြဳပၞာန်တံ နကဵုဂၠံၚ်တိုက် ဂၠံၚ်ဍာ်တံဂှ် လုပ်စိုပ်ကၠုၚ် လ္ပာ်ပွိုၚ်ဍုၚ်ပဠဝ်ဂှ်ရ က္တဵုဒှ်ဒၟံၚ်ပန်ပှော် ကုဒပ်စဵုဒၞါညးဍုၚ်ကွာန်တံတုဲ ကံၚ်ဇြဳပၞာန်တံ ကလေၚ်ပန်ပှော်ဒၟံၚ် နကဵုလွဟ်ဇၞော်လွဟ်ဍောတ် လ္ပာ်ကွာန်တံဏံဂှ် ညးတာလျိုၚ် နူဒပ်စဵုဒၞါညးဍုၚ်ကွာန်ကရေၚ်ပဠဝ် (KPDF) ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်ပေါဲဗ္တိုက်ဒေါအ်ဒေၚ်အာမွဲလစုတ်ဂှ် ဒပ်ကံၚ်ဇြဳပၞာန်တံ လုပ်စိုပ်ကၠုၚ် အပ္ဍဲကွာန်တုဲ စံၚ်ပလီုပလာ်သ္ၚိဒၟံၚ် ညးဍုၚ်ကွာန်ဒေသတံ၊ ကၠတ်ဂၠံက်ဏာ ကပေါတ်အရပ်စပ်တံဂှ်လေဝ် ကၠောန်သ္ပလဝ်ရောၚ် သ္ဂးရ။
ဟိုတ်နူပေါဲဗ္တိုက်ၜါလ္ပာ်တံတုဲ မၞိဟ်အာယုက်ဇၞော်ဗျုထဴ မသှ်ေဒၟံၚ်ပ္ဍဲကွာန်တံကဵု ရဲကွာန်လ္ၚဵုလ္ၚဵုတံလေဝ် ထပ်ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံပၠန်ရ။
ပ္ဍဲပွိုၚ်ဍုၚ်ပဠဝ်ဂှ် ဒၟါနူပေါဲဗ္တိုက် မက္တဵုဒှ်လဝ် အပ္ဍဲသတ္တာဟပထမ ဂိတုနဝ်ဝေမ်ဗာတေံဂှ်တုဲ လ္ပာ်ဒပ်ကံၚ်ဇြဳပၞာန်တံ (၁၀) တၠပြၚ်ချိုတ်တုဲ ဇီုကပိုက်ဂွံအာဝပ် ဗွဲမဂၠိုၚ်ဂၠေၚ်နွံတုဲ လ္ပာ်တမ်ဒပ် (၁) ခရိုၚ်ဗိက် ဒပ်စဵုဒၞါညးဍုၚ်ကွာန်ဂှ် ကောန်သ္ဂံၚ်မွဲတၠ ပြဟ်လလုဲအာလဝ်ဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)