ဗာလဳ – နဝ်ဝေမ်ဗာ(၁၃)
က္ဍိုပ်သ္ကိုပ်အမေရိကာန် ကေုာံ ကြုက်တအ်ဂှ် ပ္ဍဲပေါဲကောံသဳကၠဳ ကဆံၚ်လတူ G-20 မကၠောန်ဗဒှ် ပ္ဍဲသတ္တာဟဂတဏံဂှ် ဆဵုဂဗဆေၚ်မုက်အလန်ပထမကိုပ်ကၠာအိုတ်ရောၚ်ဂှ် ဌာနဝန်ဇၞော်ပရေၚ်ဍုၚ်သ္အာၚ်ကြုက် သ္ပလဝ်ဒတန်ရ။
က္ဍိုပ်သ္ကိုပ်ကၟိန်ဍုၚ်ဇြဟတ်ဇၞော်ဂၠးကဝ် ၜါကၟိန်ဍုၚ်တအ်ဂှ် တက်ကျာနကဵုဖုၚ်ဂၠိုၚ်ၚ်ကဵုအလန် နွံကၠုၚ်လဝ်တုဲ ဟိုတ်နူ ဂိုဝ်ဗေတ် ဟိုတ်နူအဆက်ပြသၞာ သမ္မယှဳ ဆက်စပ်ကဵုပရေၚ်အာကၠုၚ်ဍုၚ်သ္အာၚ်တုဲ ဆေဝ်တာလဝ် ပရေၚ်ဆဵုဂဗဆေၚ်မုက်ရ။
ညးတအ်ဂှ် အခိၚ်ကၠောန်သ္ပဒၟံၚ် ကေုာံအခိၚ်သဳကၠဳဒၟံၚ်ကေုာံအမေရိကာန် သွက်ဂွံသၠုၚ်ပတိုန် ပရေၚ်ပံၚ်တောဲရေၚ်တၠုၚ် နွံကဵုဒတုဲဖိုလ်ရၚ်သ္ကအ် ကေုာံ သွက်ဂွံဝေၚ်ပါဲ ပရေၚ်တော်ဆဗၠေတ်မှာဂှ် စဵုဒၞာအာ ဒတုဲဖိုလ်ညးတအ် ခိုၚ်ၚ်ဗိုန်န်ဏောၚ်ဂှ်လေဝ် ဌာနဝန်ဇၞော်ပရေၚ်ဍုၚ်သ္အာၚ်ကြုက် ဟီုကၠုၚ်လဝ်ရ။
ဆက်စပ်ကဵု “ပ္တိတ်အာဇြဟတ် ဂၠံၚ်ဍာန်ဆက်စၠောံ ညံၚ်ဂွံဇြိုဟ်နက်တုဲ ဖန်ဇန်ပြုပြေၚ် ပရေၚ်ပြိုၚ်ပ္ကာန်တအ်တုဲ ညံၚ်ဂွံကိတ်ညဳကဵု ဒတုဲဖိုလ်ပိုဲတအ်ဂှ် ဗီုလဵုကေတ်တာလျိုၚ်ရော” တုဲ ဇဳဇန်လဝ် က္ဍိုပ်သ္ကိုပ်တအ် သွက်ဂွံသဳကၠဳအာနွံမံၚ်ရောၚ်ဂှ် ဟီုဂးကၠုၚ် နူသ္ၚိနန်ဗ္တာၚ်(အိမ်ဖြူတော်)ရ။
ပ္ဍဲဒေသအာယှ – ပသိဖုက် ကော်လဝ်ချဴကဵု ပရေၚ်ပၞာန် ကေုာံ ပရေၚ်အုပ်ဓလီုဩဇာကလုတ် ကၟိန်ဍုၚ်ဇြဟတ်ဇၞော်သီုၜါဍုၚ်တုဲ ဟိုတ်နူပြသၞာ ကိစ္စဆေၚ်ကဵုပရေၚ်ဆက်စၠောံဗၞိက် ညးတအ်ကီု ကိစ္စဖံက်ပ္ကဝ်အခေါၚ်အရာမၞိဟ် ပ္ဍဲဒေသယှေန်ကျာန် ကၟိန်ဍုၚ်ကြုက်ကီု သီုကဵုအကာဲအရာ တ္ကအ်ထာၚ်ဝါန် မဂွံအခေါၚ်ပိုၚ်ပြဳဇကုဇကုကီုတုဲ ပရေၚ်ကြံၚ်မ္ၚိုဟ်တအ် နွံကၠုၚ်ညးသ္ကအ်ရ။
ပရေၚ်ပိုန်ဒြပ်ဂၠးကဝ်ဂှ် ဟိုတ်နူပရေၚ်က္ဍိုက်က္ဍိုပ် အမေရိကာန် ကေုာံကြုက် မဒှ်ဍုၚ် ဇြဟတ်ဇၞော်ၜါဍုၚ်တုဲ ပရေၚ်ပိုန်ဒြပ်ဂၠးကဝ် ဒကးတိတ်အာၜါကရေက်မာန်တုဲ အန္တရာယ်ဇၞော်တိုန်ကၠုၚ်မာန်ဂှ် ညးဇၞော်ကုလ အာန်တိုဝ်နဳ ဂူတာရေတ်သ ကဵုလဝ်သတိ ပ္ဍဲတ္ၚဲသိုက်ဂှ်ရ။
“စေဝ်ပၞောန်တၞဟ်ခြာၜါဂကူ၊ သြန်ဇြဟတ်ခိုဟ်ၜါဂကူ၊ အေန်တာနိတ်ၜါ ကေုာံ ဗျူဟာဒစေၚ်ဗၠေၚ်ၜါဂကူ ဆေၚ်ကဵု ဉာဏ်ပတောံဏံဂှ် ပရေၚ်ပိုန်ဒြပ်ဂၠးကဝ် ဒကးတိတ်အာ ၜါကရေက်တုဲ ညံၚ်ဂွံကလေၚ်ပလန်ကဵု တၚ်ကော်ချဴ ပိုဲဒးဆဵုဂဗမံၚ်လၟုဟ်ဂှ် ဇီုကပိုက်ဒး ဍာ်ဒကေဝ်ဂၠးကဝ်ရောၚ်” ဂှ် ဂူတာရေတ်သ ဟီုလဝ်ရ။
ပ္ဍဲကောန်ကရေတ် ဗော်ကောန်မျူနေတ် မကၠောန်ဗဒှ်ကၠုၚ် ပ္ဍဲဂိတုတုဲကၠုၚ်ဏံ ယှဳဂှ် ၜိုန်ရဟွံဓမံက်လဝ်ယၟု အမေရိကာန်ကီုလေဝ် ကဵုကၠုၚ်လဝ်သတိ စပ်ကဵုပရောပရာသ္ဇိုၚ်တိဍာ် ပရေၚ်ဍုၚ်ကွာန်ဏီရ။
က္ဍိုပ်သ္ကိုပ်အမေရိကာန် ဗိုၚ်ဒေန်ဂှ်တှ်ေ ဂၠာဲဒၟံၚ်ပရေၚ်ပြိုၚ်ပ္ကာန် မဟွံသေၚ်ကဵုပဋိပက္ခရောၚ်ဂှ် စပ်ကဵုပရေၚ်ထာၚ်ဝါန်တုဲ ဟီုကၠုၚ်လဝ်ကဵု သမ္မတယှဳရ။
ကောံဓရီုကဆံၚ်လတူ G-20 ဂှ် ကြဴနူကေတ်ကၠုၚ်တာလျိုၚ် ဒဒှ်သမ္မတ မရနုက်ကဵုပိဝါတုဲ ယှဳကျေန်ဖျေန် ကလေၚ်ရေၚ်တၠုၚ်ကၠုၚ် ပ္ဍဲဗလးပရေၚ်ကလုတ် ရောၚ်ဂှ် ဂွံတီကေတ်ရ။
ဟိုတ်နူဂိုဝ်ဗေတ်တုဲ မံၚ်ကၠုၚ်တၞဟ်ခြာ ကရပ်ပိသၞာံတုဲ ပရေၚ်ကလုတ်ဍုၚ်နာနာဂှ် ဆဵုဂဗအောန်လာၚ်ဟေၚ် ကၠောန်ကၠုၚ်လဝ်တုဲ ကြုက်ဂှ် ဟိုတ်နူ ပေါဲပၞာန်ယူကရုၚ် ပ္ဍဲအခိၚ်ဂၠးကဝ် ပရေၚ်ဟွံညိၚ်ဝတ်ဃောက္တဵုဒှ်ဒၟံၚ်ဏံ သွက်ဂွံသၠုၚ်ပ္တိုန်အသိၚ် မဟာမိတ်ဂၠးကဝ်ညးတအ် ရန်တၟအ်လဝ်နွံဒၟံၚ်ရောၚ်ဂှ် ဂွံတီကေတ်ရ။
Ref: Bangkok Post