မတ်မလီု၊ နဝ်ဝေမ်ဗာ (၁၄)
ဒပ်ပၞာန်သီအဝဵုတုဲ အပ္ဍဲပွိုၚ်ကြပ် (၂) သၞာံဂှ် ဌာနမဆေၚ်စပ်တံဝွံ ပွမရေၚ်တၠုၚ်ဒတုဲဖဵု မ္ဒးကဵုညးဍုၚ်ကွာန်တံဂှ် ကဵုကၠုၚ်ဍိုက်က်ပေၚ်ၚ် ဟွံမွဲရပုဟ်ဂှ် ဂကောံဗွိုၚ်မှာဇန်တံ ကဵု ညးဍုၚ်ကွာန်တံ ဟီုရ။
ဌာနမဆေၚ်စပ် သၟဝ်တဲကံၚ်ဇြဳပၞာန်တံဝွံ ကမၠောန်မ္ဒးရေၚ်တၠုၚ်ကဵု ညးဍုၚ်ကွာန်တံ လၟေၚ်ၚ်ဂမၠိုၚ် မပ္တံကဵု တြးပၟတ်ဓာတ်လလဳတံ၊ တြးဍာ်တံ ကေုာံ သောၚ်ကလးကဵု ပြသၞာအမှုဂဗုတ်တံဂှ် ရေၚ်တၠုၚ်ကဵုဒၟံၚ် ဟွံမွဲအိုတ်ရ။
ညးတံဝွံ ထ္ၜးဟိုတ်ပရေၚ်ဂီုကၠီုတုဲ တၚ်နွံပၟိက်သ္ဇိုၚ် ညးဍုၚ်ကွာန်တံဂှ် ရေၚ်တၠုၚ်ကဵု ဟွံမွဲရတုဲ ထ္ၜးဟိုတ်နာနာသာ်တုဲ အာတ်မိက်ကၠုၚ်သြန်သၠုဲတံကီု၊ ဟွံကဵုသြန်သၠုဲမ္ဂး စဵုကဵုအကာဲအရာ ဂယျာန်ပါဲကၠုၚ် သွက်ဂွံကၠောန်ၜိုတ်ကဵုတံဂှ် ညးဍုၚ်ကွာန်တံ ဒးဆေၚ်ဒၟံၚ်မုက်ရ။
ဒၟါနူဌာနသၟဝ်တဲကံၚ်ဇြဳပၞာန်တံ ရေၚ်တၠုၚ်ကဵု တၚ်နွံပၟိက်သ္ဇိုၚ် ညးဍုၚ်ကွာန်တံ ဍိုက်က်ပေၚ်ၚ် ဟွံမွဲဂှ်ရ ပွမဒးဂိဆောံလေၚ်တံ နွံဒၟံၚ်တုဲ လ္ၚဵုဂှ်မ္ဂး ဗီုဇကုကဵုဇကု ဒးပသောၚ်ကေတ်ဒၟံၚ်ရောၚ်ဂှ် ညးတာလျိုၚ် နူဂကောံဗွိုၚ်မှာဇန်မွဲဂကောံ ဟီုရ။
“ပ္ဍဲဒၞါဲလ္ၚဵုတံဂှ်တှ်ေ ဆောံလေၚ်ဒၟံၚ်တံ နွံရ၊ ပ္ဍဲကဏ္ဍလ္ၚဵုတံမ္ဂး နကဵုတၚ်ထ္ၜးဟိုတ်ပရေၚ်ဂီုကၠီု နာနာသာ်တံဂှ် နွံဒၟံၚ်ဖိုဟ်ရ၊ ဍေံတံ ဟွံကၠောန်ကဵုတံဂှ် နွံဒၟံၚ်ရ၊ လဆောဝ်လဆောဝ် ညးလ္ၚဵုတံ ဒှ်အခက်အခုဲတုဲ ညးဗြဴဒးတိတ်အာ ဍုၚ်သ္အာၚ်တံ နွံတုဲ ကောန်ၚာ်လ္ၚဵုတံမ္ဂးလေဝ် ဘဝလီုအာတံ နွံရ၊ လ္တူတၚ်အခက်အခုဲ လၟုဟ်တံဏံဂှ် ညံၚ်ဂွံပြေပြံၚ် ဒးပသောၚ်ကေတ်ဒၟံၚ် နနဲဇကုကဵုဇကုတံရ” သာ်ဝွံ သ္ဂးရ။
သ္အာၚ်နူဂှ်ပၠန် ညးဍုၚ်ကွာန်တံဝွံ ပွမရေၚ်တၠုၚ်ဒတုဲဖဵု နူကဵုဌာနဆေၚ်စပ်သၟဝ်တဲကံၚ်ဇြဳပၞာန်တံဂှ် ဟွံဂွံလၟေၚ်ၚ်ဂှ်ရ ပရေၚ်ပိုန်ဒြပ်ပရေၚ်မၞိဟ်တံ သာကြေပ်ဂြတ်ကၠုၚ်တုဲ ဒးဆေၚ်ဒၟံၚ်မုက်ကဵု အခက်အခုဲပရေၚ်စသုၚ်မံၚ်စံၚ်တံရ။
ဌာနမဆေၚ်စပ်သၟဝ်တဲကံၚ်ဇြဳပၞာန်တံဝွံ ၜိုန်ရဗက်ဒၟံၚ်အကံက်အခေါန်တံ လၟေၚ်ၚ်ကီုလေဝ် တၚ်နွံပၟိက်သ္ဇိုၚ် ညးဍုၚ်ကွာန်တံဂှ် ရေၚ်တၠုၚ်ကဵုဗီုကၠာတေံ ဟွံမွဲဂှ်ရ ဒးဂဗဒၟံၚ်အခက်ရောၚ် ညးဍုၚ်ကွာန်မွဲတၠ သ္ဂးရ။
“နကဵုညးဍုၚ်ကွာန်တံ ကြဴနူသီအဝဵုတုဲဂှ် ဒးကဵုဒၟံၚ် ၚုဟ်ပၟတ်တံ မွဲဏှမွဲဏှရ၊ မ္ၚးနူ ပၟတ်ဟွံကၠုၚ်မှာန်န်ဂှ် ပၟတ်ပၠိုတ်တံလေဝ် ဂၠိုၚ်နူကၠာတေံဂှ် ဒးဂဗဒၟံၚ်ရ၊ ၚုဟ်မဳတာဍာ်တံလေဝ် ဒးကဵုဒၟံၚ်လၟိုန်၊ ဆ္ဂး ပ္ဍဲအခိၚ်မစၟတ်လဝ်ဂှ် ဍာ်ဟွံကၠုၚ်တံလေဝ် ဒးဂဗဒၟံၚ်ရ၊ ညးဍုၚ်ကွာန်ပိုယ်တံ အာတရဴမ္ဂးလေဝ် ကၠာတေံတှ်ေ အာအတိုၚ်ဏံ ဂွံမံၚ်၊ လၟုဟ်မ္ဂး အာတရဴမ္ဂး စၟတ်တဲညးဇၞော်အရာပ်တံ၊ စၟတ်တဲသ္ကိုပ်ပရေၚ်အုပ်ဓုပ်အရာပ်တံဂှ် ကဵုသၠုဲတုဲ ဒးအာကေတ်ဒၟံၚ်ဏောၚ်” သာ်ဝွံ သ္ဂးရ။
ဌာနမဆေၚ်စပ်သၟဝ်တဲကံၚ်ဇြဳပၞာန်တံဝွံ အာတ်မိက်သြန်သၠုဲ အတေၚ်အဓမ္မတံ၊ ပလှ်ဖျေံထောံ ကဠာမဳတာပၟတ်တံဂှ် ကၠောန်ကၠုၚ် ကုညးဍုၚ်ကွာန်တံတုဲ ညံၚ်ဂွံကြေပ်ဂြတ်ဂၠိုၚ်ဂှ် ကၠောန်ၜိုတ်ဒၟံၚ်ရောၚ် ညးဍုၚ်ကွာန်တံ သ္ဂးရ။
သ္အာၚ်နူဂှ်ပၠန် သၞာဲဒဴနူဌာနမဆေၚ်စပ်တံဝွံ ပံၚ်ကဵုကံၚ်ဇြဳပၞာန်တုဲ ဒၟါနူလုတ်လောန် ဗက်စဒၟံၚ် အဂတိတံဂှ်ရ ဒၞါဲဒးဒုၚ်ရပ်ဒက်ကေတ်အရေဝ်ဂှ် ဒှ်ဒၟံၚ်ဗီုပြၚ် ဂွံဒၟံၚ်အခေါၚ်ဗၠးရောၚ်ဂှ် ညးသ္ၚဳဂၠိပ်တံ ဟီုရ။
ကြဴနူဒပ်ပၞာန်သီအဝဵုတုဲ ကၟိန်ဍုၚ်ဗၟာ ပွမဆုတ်ယုတ်ကၠုၚ်တံ နွံတုဲ ညးဍုၚ်ကွာန်တံဝွံ သွက်ဗ္ဂါပ်ပုၚ်ဂွံမှာန်ဂှ် ဒးရုန်ဂ္စါန်ဒၟံၚ်အိုတ်တုဲ ဒေသလ္ၚဵုတံမ္ဂး စဵုကဵုဒှ်ကၠုၚ် အကာဲအရာဒးဖအောန်စကၠုၚ် ပုၚ်တံယျဂှ် ဂွံတီကေတ်ရ။
ပ္ဍဲလက်ထက်အလဵုအသဳ NLD ကၠာတေံဂှ် သၞာဲဒဴဌာနမဆေၚ်စပ်တံဝွံ အခေါၚ်သ္ဇိုၚ် ညးဍုၚ်ကွာန်တံ သ္ဂောံဂွံဂှ် ဟွံကဵုမွဲသာ် ယဝ်ရဗက်စအဂတိတံ နွံမ္ဂး ပ္ဍဲကမ္မတဳ စပ်ကဵုကၠတ်ထဝ်တွဵုရး ရးဒေသဇၞော်တံဂှ် အာတေၚ်မာန်တုဲ ယဝ်ရအာတေၚ် ပ္ဍဲကမ္မယှေန် ဗ္တိုက်ပလီု ပွမဗက်အဂတိ ကၟိန်ဍုၚ်ဗၟာတံဂှ်မ္ဂး ကေတ်ကၠုၚ်အရေဝ်တံ နွံကၠုၚ် တီတီဒှ်ဒှ်ရ။
ပရိုၚ်−သြၚ်လောန်တိုၚ်(မ်)