ကျာ်မြဟ်၊ နဝ်ဝေမ်ဗာ (၁၄)
ဗ္ဒိုပ်ဗၠာဲသၟိၚ်ကံၚ်ဇြဳပၞာန် မၞုံကွာန်ၜါသွာၚ် ပွိုၚ်ဍုၚ်ကျာ်မြဟ်၊ တွဵုရးဍုၚ်မန်တံဂှ် ပ္ဍဲဂိတုနဝ်ဝေမ်ဗာ (၁၂) ပယျာံဂယးဂှ် ဂကောံဒပ်ပံၚ်ကောံ ပရေၚ်ပၠန်ဂတးတံ လုပ်စိုပ်ဗ္တိုက်လဝ်တုဲ လ္ပာ်ကံၚ်ဇြဳပၞာန် ဗ္တိုက်ကၠုၚ်ကဵုက္ၜၚ်ကျာတံ ဟွံပိုတ်သ္ကုတ်ရဂှ် ညးဒေသတံ ဟီုရ။
ပ္ဍဲဂိတုနဝ်ဝေမ်ဗာ (၁၂) စနူအခိၚ်နူဂယး (၅) နာဍဳဂှ်တုဲ လ္ပာ်ဂကောံဒပ်ပံၚ်ကောံ KNLA တံ လုပ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ် ကံၚ်ဇြဳပၞာန်တံဂှ်ရ က္တဵုဒှ်လဝ် ပေါဲဗ္တိုက်တုဲ ဂကောံဒပ်ပံၚ်ကောံတံ သီဂွံလဝ် ဗ္ဒိုပ်ဗၠာဲသၟိၚ်ဂှ်ရ။
“သီထောံဗ္ဒိုပ်ဗၠာဲသၟိၚ်ၜါသွာၚ် ဗ္ဒါဲဒဒန်ၜါသွာၚ် ဂၠံၚ်အာလှာဒကှ်ဂှ်ယျ၊ ဗၠာဲသၟိၚ်တံလေဝ် ချိုတ်အာတုဲ ကၠုၚ်ထောံလဝ် မခတိုဟ် နကဵုက္ၜၚ်ကျာရ၊ ရမျာၚ်တံဂှ် ထတ်ကွေံကွေံ” သာ်ဝွံ ညးဒေသတံ ဟီုရ။
လ္ပာ်ကံၚ်ဇြဳပၞာန် ဒးဒုၚ်သီထောံ ဗ္ဒိုပ်ဗၠာဲသၟိၚ်ၜါသွာၚ်တုဲဂှ် ဗ္တိုက်ဒၟံၚ်ကဵုက္ၜၚ်ကျာတံ အဆက်က်တုဲ ဒဵုကဵုအခိၚ်လၟုဟ် က္ၜၚ်ကျာပဝ်ဒၟံၚ်တံ နွံဒၟံၚ်ဏီဂှ် ညးဒေသတံ သ္ဂးရ။
အတိုၚ်တၚ်နၚ် နူကဵုသြန်လောန်တိုၚ်(မ်) မကလိဂွံလဝ် တဲကၠာဏံဂှ်မ္ဂး ပ္ဍဲပေါဲဗ္တိုက် သီဗ္ဒိုပ်ၜါသွာၚ်ဂှ် ကောန်ဒပ်ဗၠာဲသၟိၚ် ကံၚ်ဇြဳပၞာန် (၉) တၠ ချိုတ်အာလဝ်ဂှ် ဂွံတီကေတ်ရ။
အခိၚ်လၟုဟ်ဂှ် ဟိုတ်နူကံၚ်ဇြဳပၞာန် ထောံဒၟံၚ်မခတိုဟ် ကဵုက္ၜၚ်ကျာ ဟွံပိုတ်သ္ကုတ်ဂှ်ရ ဒးဂြိပ်ဒဴပါဲဒလေတ်ဒၟံၚ် အလုံကွာန်မွဲရ။
ပရိုၚ်−သြၚ်လောန်တိုၚ်(မ်)