လ္ဂုၚ်၊ နဝ်ဝေမ်ဗာ (၂၂)
ပ္ဍဲကဝ်မယှေန်ပေါဲရုဲမာဲကၟိန်ဍုၚ် UEC ကံၚ်ဇြဳပၞာန်သီအဝဵု မခါန်ကၞက်လဝ်ဂှ် အခေါၚ်ဂွံစၞောန်ပျးသၞောဝ်တၟိ စပ်ကဵုပရေၚ်ပ္တိုန်စရၚ် ဗော်ပရေၚ်ဍုၚ်ကွာန်တံ ဟွံမွဲပုဟ်ဂှ် ဗော်ပရေၚ်ဍုၚ်ကွာန် ဇြဟတ်ဇၞော် ကောန်ဍုၚ်အရၚ်တံ ဟီုဂးလဝ်ရ။
ပ္ဍဲကဵုပေါဲသောၚ်ကလးလိက်ပရိုၚ် ကံၚ်ဇြဳပၞာန် ကၠောန်ဗဒှ်လဝ် ပ္ဍဲနေပျဳဒဝ် ပ္ဍဲဂိတုနဝ်ဝေမ်ဗာ (၁၈) တုဲကၠုၚ်တေံဂှ် ညးမၞုံအခေါၚ်ဟီုဂး UEC ဥူခေန်မာၚ်ဥူဂှ် နကဵုကဝ်မယှေန်ပေါဲရုဲမာဲ ပလေဝ်ပလေတ်ဒၟံၚ် သွက်ဂွံကၠောန်ဗဒှ် ပေါဲရုဲမာဲ ဗၠးၜးဗဗွဲဓဝ်မာန်ဂှ်တုဲ ခြာဟွံလအ်ဏံ သီုကဵုစၞောန်ပျးအာသၞောဝ်တၟိ ပရေၚ်ပ္တိုန်စရၚ် ဗော်ပရေၚ်ဍုၚ်ကွာန်တံရောၚ်ဂှ် ဟီုဂးလဝ်ရ။
ပ္ဍဲကဵုစၞောန်ပျးသၞောဝ်တၟိဂှ် နကဵုဗော်ပရေၚ်ဍုၚ်ကွာန်တံ ကိစ္စအရာမဒးဆက်ရေၚ်တၠုၚ် ဗွဲမသၟဟ်ကဵု သၞောဝ်လၟုဟ်တံဂှ် နွံတုဲ ဗော်ပရေၚ်ဍုၚ်ကွာန်တၟိတၟိတံလေဝ် အာတ်ပ္တိုန် အခေါၚ်ပ္တိုန်စရၚ် ဒက်ပ္တန်တံမာန်ရောၚ်ဂှ် သ္ဂးရ။
ညးအုပ်ကာ ဂအုပ်ဗော်ဒဳမဝ်ကရေဇြဳကောန်ဍုၚ်အရၚ်သေံ (SNLD) သာၚ်လုက်ဂှ် သၞောဝ်ဥပဒေ UEC ကံၚ်ဇြဳပၞာန် မစၞောန်ပျးတၟိဂှ်ဝွံ ယဝ်ရဗၠေတ်အာ နူကဵုသၞောဝ်သ္ဇိုၚ်ဒက်ပ္တန် မွဲမွဲသာ်နွံမ္ဂး အခေါၚ်ကၠောန်ဟွံမွဲပုဟ်ဂှ် ထံက်ထ္ၜးလဝ်ရ။
“ညအ်ဂှ် ဒှ်အာၜါသ္ကုတ်ရဏောၚ်၊ အခေါၚ်ကၠောန် ပ္ဍဲအာယုက်ကာလကာတၟေၚ်ဍေံတံဂှ် အခေါၚ်ဖျေံစၟတ် သၞောဝ်ဥပဒေတံ နွံရ၊ နွံပၟိက်မ္ဂး အခေါၚ်လလောၚ်ပ္တိတ် အမိၚ်တံ နွံရ၊ ၜိုန်ဂှ်ကီုလေဝ် အခေါၚ်ဂွံကလေၚ်ပလေဝ် သၞောဝ်သ္ဇိုၚ်ဒက်ပ္တန်ဂှ် ဟွံမွဲပုဟ်၊ အခေါၚ်ဂွံချူခၞံ သၞောဝ်သ္ဇိုၚ်ဒက်ပ္တန်တၟိဂှ် ဟွံမွဲပုဟ်လေဝ်၊ ဟိုတ်ဂှ်ရ သၞောဝ် UEC တၟိ ဍေံတံ မကၠောန်လၟုဟ်ဂှ်ဝွံ ဗၠေတ်နူကဵု သၞောဝ်သ္ဇိုၚ်ဒက်ပ္တန်တုဲ ယဝ်ရ ဒးကလေၚ်ပလေဝ်ပလေတ်လဝ်၊ ဒးပလီုပါဲလဝ်၊ ဒးချူခၞံလဝ်တၟိ ကုတၚ်စၞောန်ပျးလဝ် ပ္ဍဲသၞောဝ်သ္ဇိုၚ်ဒက်ပ္တန်တံဂှ်မ္ဂး ဣဏံဂှ် ဍေံတံ အခေါၚ်ကၠောန်ဟွံမွဲပုဟ် ဒးဟီုရ” သာ်ဝွံ ဟီုရ။
ကောန်ကမ္မတဳ ကေၚ်ကာဗဟဵု ဗော်ကောန်ဂကူရခေၚ် ဥူထောန်အံၚ်ကျဝ်ဂှ်လေဝ် နကဵုကံၚ်ဇြဳပၞာန် ၜိုန်ရရပ်စပ်လဝ် အဝဵုပိတန် မွဲဒမြိပ်ဓဝ်ကီုလေဝ် ဂကောံအခေါၚ်ချူခၞံသၞောဝ် မၞုံဂှ်ဝွံ ဒှ်ကၠတ်ထဝ်မွဲရဂှ် သ္ဂးရ။
“ကံၚ်ဇြဳပၞာန် ရပ်လဝ် အဝဵုပိတန်မွဲဒမြိပ်ဓဝ်တုဲ ကဵုထောံ အခေါၚ်ချူခၞံသၞောဝ်တံ ကုကဝ်မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန် မဒက်ပ္တန်ကဵုလဝ်တံရောၚ် ဒးကံက်အဓိပ္ပာယ်သာ်ဏံရဟာဂှ် ပိုယ်တံ ဟွံတီပုဟ်၊ ဆ္ဂး ဂကောံအခေါၚ်ချူခၞံသၞောဝ် ဗွဲမကိတ်ညဳကဵု သၞောဝ်ဓဝ် ဍာံဍာံတေံဂှ်တှ်ေ ကၠတ်ထဝ်ဟေၚ် အဝဵုအခေါၚ်ခၞံသၞောဝ် နွံဂှ် ပိုယ်တံ ကၠိုဟ်လဝ်ဗီုဏံရ” သာ်ဝွံ ညးဟီုရ။
ကဝ်မယှေန်ပေါဲရုဲမာဲ ကံၚ်ဇြဳပၞာန် မခါန်ကၞက်လဝ်ဂှ် အကာဲအရာ မကၠောန်ဗဒှ်ပေါဲရုဲမာဲတံ၊ တ္ၚဲဒးပၠောပ် အလံၚ်ညးစၞး မပါလုပ် တၚ်လလောၚ်တြး စပ်ကဵုပေါဲရုဲမာဲတံဂှ် လလောၚ်ပ္တိတ်အာ ဗွဲမဂတာပ်အခိၚ်ရောၚ် သ္ဂးလဝ်ရ။
သ္အာၚ်နူဂှ်ပၠန် သွက်ဂွံကၠောန်ဗဒှ် ပေါဲရုဲမာဲမာန် ပရေၚ်ဂီုကၠီုတံ၊ ပရေၚ်သၞောဝ်ဥပဒေ အုပ်လဒံတံ ကေုာံ ပရေၚ်ၜိုဟ်သြိုဟ်ညိၚ်ဝတ် တိဍာ်ဒေသဆန္ဒမာဲတံဂှ်လေဝ် ပၟိက်ဇၞော်ဒၟံၚ်ဂှ်ရ ရေၚ်တၠုၚ်ပ္ညဳပ္ညပ်အာ ကုဌာနဝန်ဇၞော်ကာစဵုဒၞါ၊ ဌာနဝန်ဇၞော်အပ္ဍဲဍုၚ် ကေုာံ ဂကောံအလဵုအသဳ ရးဒေသ ကေုာံ တွဵုရးတံရောၚ် သ္ဂးလဝ်ရ။
အခိၚ်လၟုဟ်ဂှ် ဗော်ပရေၚ်ဍုၚ်ကွာန် ပ္တိုန်လဝ်စရၚ်ဂှ် (၉၀) ပြၚ်နွံဒၟံၚ်တုဲ ပေါဲရုဲမာဲ ကံၚ်ဇြဳပၞာန် ကၠောန်ဗဒှ် သၞာံဂတဏံဂှ် ဗော် NLD လုပ်စိုပ်ပြိုၚ်ပ္ကာန်အာ ဟွံသေၚ်ရောၚ် လလောၚ်တြးလဝ်ကီုလေဝ် ဗော်မသှ်ေ ဗွဲမဂၠိုၚ်တံ သွက်ဂွံလုပ်ပြိုၚ် နွံ၊ ဟွံမွဲဂှ် လလောၚ်တြးလဝ် ဗွဲမလုပ်သၞောဝ် ဟွံမွဲဏီရ။
ဗော်ဖောအ်ဗြေဝ်ခိုၚ်ကၠိုက် (USDP) ဒပ်ပၞာန်မနွံလက္ကရဴ ဗွဲအဓိကဂှ် သွက်ပေါဲရုဲမာဲဂှ် တုဲကၠုၚ်ဂိတုအံက်တဝ်ဗာမံက်တေံ ကၠောန်သ္ပပြံၚ်လှာဲလဝ် ဌာနန္တရကဆံၚ်လ္ပာ်လ္တူတံတုဲ ကောံဓရီု လၟေၚ်ကမၠောန် အပ္ဍဲဗော်တံဂှ်လေဝ် ကၠောန်ကၠုၚ်ဒၟံၚ် စေအ်အ်ရ။
ပရိုၚ်−သြၚ်လောန်တိုၚ်(မ်)