မတ်မလီု၊ နဝ်ဝေမ်ဗာ (၂၂)
ကမၠောန်ၜဵုစဲတ္ၚဲ အပ္ဍဲတွဵုရးဍုၚ်မန် မဒးဆေၚ်ဒၟံၚ်မုက်ကဵု ကျဟောံ ဟိုတ်နူဗြဲပလီုရာသဳတံဂှ်ဝွံ သၞာံဏံလေဝ် ဒၟါနူဗြဲဂူဟွံသေၚ်ကဵု အခိၚ်တံတုဲ သွက်ဂွံကၠောန်ပ္တိတ်ၜဵုဂှ် ဒးဂဗဒၟံၚ်အခက်ရောၚ် သၟာကၠောန်ၜဵုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၟာကၠောန်ၜဵုစဲတ္ၚဲတံဝွံ သၞာံတုဲကၠုၚ် ၜါသၞာံအဆက်က်တေံဂှ် ရာသဳဥတုဖံက်ပၠန်တုဲ ဒးဂဗလဝ် ဗြဲပလီုခံက်ၜဵုတံဂှ်ကီု၊ ကြဴနူဒပ်ပၞာန်သီအဝဵုတုဲ ၚုဟ်ကၠေၚ်စက် သၠုၚ်တိုန်ကၠုၚ်ကဵုဆဂှ်ကီု၊ ခရိတ်အိုတ်နာနာ ဇၞော်သၠုၚ်တံကီုဂှ်ရ ဒးဆေၚ်လဝ်မုက်ကဵု ကျဟောံတံရ။
အခိၚ်လၟုဟ် သၟာကၠောန်ၜဵုတံဝွံ အပ္ဍဲဂိတုနဝ်ဝေမ်ဗာ သတ္တာဟတတိယဂှ် ဗြဲဂူဆက်ဒၟံၚ်တုဲ ပ္ဍဲရာသဳၜဵုသၞာံဏံ ဒမြိပ်ၜဵုတိတ် ဖေက်အောန်စှ်ေအာတီတီဂှ် ဂွိၚ်ဂွါဲဒၟံၚ်အိုတ်ရ၊ စပ်ကဵုအကာဲအရာဏံတုဲ သ္ၚာကၠောန်ၜဵုမွဲတၠဂှ် ဟီုလဝ်ဗီုလၟုဟ်ရ။
“စိုတ်ဓာတ်စှ်ေဒၟံၚ်ယျ၊ လၟုဟ် ကၠောန်ဒၟံၚ်ကမၠောန် ဂွံၜိုတ်မွဲဂိတုယျ၊ ဗြဲဂူဒၟံၚ် ကၠိုဟ်ဂိတု ဗီုလဵုဂွံပရော၊ ရာသဳဥတု ဖံက်ပၠန်တုဲ စိုတ်ဒးယှုက်ဒၟံၚ်၊ ပိုယ်တံဂှ် စဲအာခံက်ၜဵုတံ၊ ကအ်အာတှ်ေ ကလေၚ်ပၠးပၠန်၊ စိုပ်ဗ္တံတှ်ေ ဗြဲဂှ်ဂူပၠန်၊ တ္ၚဲတှ်ေက္တဴ ဗ္တံတှ်ေဗြဲဂူ၊ သၞာံဏံ ရဲကၠောန်ၜဵုပိုယ်တံ ဂွံဒၟံၚ်ၜဵုဏီဟာ” သာ်ဝွံ သ္ဂးရ။
ပ္ဍဲအကာဲအရာဗီုဏံဂှ် ယဝ်ရဗြဲဂူဆက်ကၠုၚ်မ္ဂး ထပ်ဒးပလေဝ် ခံက်ၜဵုတံပၠန်တံတုဲ ရာသဳၜဵုဏံ အခိၚ်ၜဵုတိတ် လဇုဲမာန်ရောၚ် သၟာကၠောန်ၜဵုတံ သ္ဂးအိုတ်ရ။
တွဵုရးဍုၚ်မန်ဝွံ ၜဵုစဲတ္ၚဲဂှ် လၟေၚ်သၞာံ စကၠောန် ပ္ဍဲဂိတုအံက်တဝ်ဗာလေပ်တုဲ သၞာံဏံဂှ်တှ်ေ ခရိတ်အိုတ် ကပေါတ်တမ်ရိုဟ်တံ သၠုၚ်တိုန်ကၠုၚ်ကဵုဆကီု၊ အခက်အခုဲ ကော်သၟာကမၠောန် ဟွံဂွံတံကီုဂှ်ရ သၟာကၠောန်ၜဵုလ္ၚဵုတံ ဒေါအ်ဇူလဝ် ကမၠောန်အိုတ်ရ။
သၟာကၠောန်ၜဵုမွဲတၠဂှ် သွက်ဂွံကၠောန်ပ္တိတ် ၜဵုစဲတ္ၚဲ အခိၚ်မလေဝ်ပလေတ်ဒၟံၚ် ခံက်ၜဵုဂှ် ဟိုတ်နူဗြဲဂူ ဟွံသေၚ်ကဵုအခိၚ်တံဂှ်ရ ခရိတ်အိုတ်တံ သာသၠုၚ်တိုန်ကၠုၚ်ရဂှ် ဟီုရ။
“ဖအိုတ်သၠုဲ ၜိုတ် (၅၀) ကိုဋ်တုဲ ကၠောန်တှ်ေ ၜိုတ် (၆၀) (၇၀) ကိုဋ်ဂှ် အိုတ်ဏောၚ်၊ ညအ်ဂှ် သၠုဲသၟးရအိုတ်၊ အခိၚ်ဂှ်တှ်ေ အောန်အိုတ်မ္ဂး ဒးကဵု စဵုကဵု (၅) တ္ၚဲရ၊ ဂွံကလေၚ်စိုပ် အကာဲအရာလၟုဟ်ပၠန်တှ်ေ ဒးကလေၚ်စဲတ္ၚဲ ၜိုတ်မသုန်တ္ၚဲပၠန်ရ၊ ဗြဲထပ်ဂူကၠုၚ် မွဲဝါပၠန်မ္ဂး လေၚ်မွဲဝါပၠန်ရ၊ ဒးကၠောန်ကဵုရာသဳတှ်ေ အခက်အခုဲ ဗီုဏံနွံရ” သာ်ဝွံ ဟီုရ။
ပ္ဍဲတွဵုရးဍုၚ်မန်ဂှ် ၜဵုစဲတ္ၚဲဂှ် ကၠောန်ပ္တိတ်ဒၟံၚ် ပ္ဍဲဍုၚ်ပံၚ်၊ ဇြပ်ဗု ကေုာံ ရေဝ်တံ အဓိကတုဲ လၟေၚ်သၞာံ လယိုၚ်တာန်ၜဵု တိတ်ဒၟံၚ် (၄၀,၀၀၀) ပြၚ်ရ။
ဆ္ဂး သၞာံတုဲကၠုၚ်တေံဂှ် ဟိုတ်နူဗြဲပလီုခံက်ၜဵုတံဂှ်ရ လျိုၚ်တာန်ၜဵု တိတ်လဝ် ၜိုတ် (၂၀,၀၀၀) ဓဝ်ရ၊ ၜဵုတိတ်ကၠုၚ်တံဂှ် ပလံၚ်ပ္တိုန်သွံတြးဒၟံၚ် မာန္တလေဝ်၊ လ္ဂုၚ် မပါလုပ် သီုကဵုတွဵုရး ကေုာံ ရးဒေသ အလုံကၟိန်ဍုၚ်ဗၟာမွဲရ။
ပရိုၚ်−သြၚ်လောန်တိုၚ်(မ်)