သဓီု၊ နဝ်ဝေမ်ဗာ (၂၅)
ကောန်ဒပ်ကံၚ်ဇြဳပၞာန် (၂) တၠ နူဒပ်ကံၚ်ဇြဳပၞာန် မဖျေံသ္ဇိုၚ် ပွိုၚ်ဍုၚ်သဓီု၊ တွဵုရးဍုၚ်မန်ဂှ်ဝွံ လုပ်စိုပ်စ္ၜုဲစ္ၜော်ကၠုၚ် ဇရေၚ်ဒပ်မဟာ (၁) KNU ဂှ် ဂွံတီကေတ် နူကမ္မတဳကောပ်ကာဲကေၚ်ကာမိတ် ခရိုၚ်သဓီု KNU ရ။
ပ္ဍဲဂိတုနဝ်ဝေမ်ဗာ (၂၀) တုဲကၠုၚ်တေံဂှ် ကောန်ဒပ်ကံၚ်ဇြဳပၞာန် (၂) တၠ တာန်ဇြဝ်ထောန် ကဵု ထောန်န် နူကဵုဗ္ဒိုပ်ဒပ်မုက်ပၞာန် တမ်ဒပ် ခမရ (၄၀၅) သၟဝ်တဲကံၚ်ဇြဳပၞာန်တံ လုပ်စိုပ်စ္ၜုဲစ္ၜော်ကၠုၚ် ဇရေၚ်ဒပ်မဟာ (၁) KNLA မသက္ကုလွဟ်တံရ။
ကောန်ဒပ်လုပ်စိုပ်စ္ၜုဲစ္ၜော် ဇရေၚ်ဒပ်မဟာ (၁) KNLA တံဂှ် ဆုဲပြံၚ်လဝ် ဒၞါဲဂီုကၠီုတံတုဲ မၚ်မွဲဗ္စဖျုၚ်လဝ်ကဵုရောၚ် ဥက္ကဌကမ္မတဳ ကောပ်ကာဲကေၚ်ကာမိတ် ခရိုၚ်သဓီု KNU သ္ကိုပ်ဗိုလ်သဝ်ကျဝ်ချေတ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္အာၚ်နူဂှ်ပၠန် သွက်ဂွံရပ်စပ်ဂှ် ထံက်ပၚ်ပအပ်ကဵုလဝ် ကုကောန်ဒပ်ကံၚ်ဇြဳပၞာန် မလုပ်စိုပ်စ္ၜုဲစ္ၜော်တံ မွဲမွဲတၠ မွဲကိုဋ်ဒ္ကေဝ်တုဲ လက္ကရဴဏံ ဆက်ရေၚ်တၠုၚ်ကဵုအာ အတိုၚ်ဆန္ဒညးတံပၠန်ရောၚ် သ္ဂးရ။
ကြဴနူဒပ်ပၞာန်သီအဝဵုတုဲ ကောန်ဒပ်ကံၚ်ဇြဳပၞာန်တံ ၊ ကောန်ဂကောံဗၠာဲသၟိၚ်တံ ကေုာံ ကောန်ဇာတ်ညးတံဂမၠိုၚ် မလုပ်စိုပ်စ္ၜုဲစ္ၜော်ကၠုၚ် ဇရေၚ်ဒပ်မဟာ (၁) ခရိုၚ်သဓီု KNU အပံၚ်ဖအိုတ် (၁၅၀) ပြၚ် နွံဒၟံၚ်ယျဂှ် ဂွံတီကေတ်ရ။
အလုံမွဲကၟိန်ဍုၚ်ဂှ် ကြဴနူဒပ်ပၞာန်သီအဝဵုတုဲ ကောန်ဒပ်ကံၚ်ဇြဳပၞာန် ကေုာံ ကောန်ဂကောံဒပ်ဗၠာဲသၟိၚ် ဗ္ဒါဲ (၁၀,၀၀၀) ပြၚ် သ္ပလဝ် CDM ဂှ် အလဵုအသဳညဳသၟဟ်ဂကူ NUG လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)