တၚ်သၟာန်သွဟ် ကေုာံ ကိုဝ်သာန်မေန်ပိုၚ် ညးတာလျိုၚ်ဆက်ဆောံပရေၚ်ဍုၚ်သ္အာၚ် ဇာနှိက်သၟတ်ဗၟာ (ဗလက)

ဇာနှိက်သၟတ်ဗၟာ(ဗလက)ဂှ် ညံၚ်တၠအဝဵုပၞာန်ဂွံကျဗြီုမာန် ပါဲနူဂၠံၚ်တရဴရပ်လွဟ်တုဲ နကဵုနဲကဲဟွံပကီုပရာပ်တအ်လေဝ်  ထ္ၜးဆန္ဒ ဗွဲမၜိုဟ်သြိုဟ်ကီု၊ ဂၠာဲပကောံသြန်ဂအုံတုဲ ဒှ်ဂကောံထံက်ပၚ်ဒၟံၚ် ညးပါလုပ်လုပ်ချဳဒရာၚ်ပ္ဍဲပရေၚ်ပၠန်ဂတးဂမၠိုၚ် နူကဵုသွာၚ် ဇကုသၟဟ်အစောံ မွဲဂကောံရ။ ဟိုတ်ဂှ်ရ ဟိုတ်ဂွံဒးဒက်ပ္တန် ဇာနှိက်သၟတ်ဗၟာ(ဗလက)၊ တၚ်ရန်တၟံဂမၠိုၚ်၊ အခိၚ်လၟုဟ်ဏံ သာ်လဵုရေၚ်တၠုၚ်ကဵုဒၟံၚ် သွက်ပရေၚ်ပၠန်ဂတးရော။ ဒးဆေၚ်မံၚ်မုက်ကဵု တၚ်ကော်ချဴအခက်အခုဲသာ်လဵုရော။ စပ်ကဵုအကာဲအရာဏံတုဲ သၟာန်သွဟ်လဝ် ကေုာံ ကိုဝ်သာန်မေန်ပိုၚ် ညးတာလျိုၚ်ပရေၚ်ဆက်ဆောံဍုၚ်သ္အာၚ်ရ။

-ကိုပ်ကၠာအိုတ်ဏံ ဟိုတ်ဂွံဒးစဒက်ပ္တန် ဇာနှိက်သၟတ်ဗၟာ ကဵုရန်တၟံသာ်လဵုတုဲ ဒက်ပ္တန်လဝ်ရော သောၚ်ထ္ၜးကဵုညိ။

ဇာနှိက်သၟတ်ဗၟာပိုဲဂှ် သောၚ်မံၚ်ရ။ ကိတ်ညဳကဵုအတိုၚ်ယၟုဂှ်ရ သၟတ်နွံပ္ဍဲကၟိန်ဍုၚ်ဗၟာပိုဲဏံ၊ ပိုဲတအ်နွံပၟိက်ဒၟံၚ် ပရေၚ်ဗဗွဲဓဝ်၊ ဒစဵုဒစးအာ ပွဟွံဗဗွဲကဵုဓဝ်ဏောၚ်ဂးတုဲ ဒှ်ဂကောံ သၟတ်ဂမၠိုၚ်ဒက်ပ္တန်လဝ် မွဲဂကောံရ။ ဂကောံဒပ်ပၞာန် မေန်အံၚ်လှာၚ် က္ဍိုက်လဝ်က္ဍိုပ်ဂှ် ထ္ၜးလွဟ်တုဲ သီလဝ်အဝဵုရ။ ဂိတုဖေဖဝ်ဝါရဳ စၟတ်တ္ၚဲ ၁ ဂှ် သီလဝ်အဝဵုရ။ ပ္ဍဲကာလသီအဝဵုဂှ် ပိုဲတိတ်ဗကပ်လဝ် ဗဗေၚ်ရ။ ဒှ်ဂကောံ ဒက်ပ္တန်လဝ် ပ္ဍဲအခိၚ်ဂှ် မွဲဂကောံရ။ ပိုဲတအ်လေဝ် ဟွံပ္ကီုပရာပ်မွဲသာ် ဒစဵုဒစးရ။ ပိုဲထ္ၜးဆန္ဒ ၜိုဟ်ဟ်သြိုဟ်ဟ်ရ။ ဆဂးဂှ် ညးဍုၚ်ကွာန်ပိုဲဂမၠိုၚ်ဂှ် ဒးဒုၚ်ဂစိုတ်ဒၟံၚ် ညံၚ်စာၚ်၊ ညံၚ်အဒါရ။ ဒးဒုၚ်စံၚ်လဝ် သီုကွာန်မွဲ။ ပ္ဍဲအခိၚ်ဆဵုဂဗကၠုၚ် ပရေၚ်ဂစိုတ်ပဠက်ဂကူဂှ် ပါဲနူပၠန်ဂတးရပ်လွဟ်တုဲ နဲကဲတၞဟ်ဟၟဲရဂးတုဲ နကဵုတၚ်ဒုၚ်ဂိုၚ်ကေတ်ပိုဲဂှ် ပိုဲပြံၚ်ကၠောံကၠုၚ် လပါ်ဂၠံၚ်တရဴပၠန်ဂတးရပ်လွဟ်ရ။ ပ္ဍဲကဵုအခိၚ် အသိၚ်ပရေၚ်ပၠန်ဂတးရပ်လွဟ် ဇြဟတ်ခိုဟ်ကၠုၚ်ဂှ် ပိုဲသွက်ဂွံထံၚ်ပလံၚ် အရာနွံပၟိက် လပါ်ပရေၚ်ပၠန်ဂတးရပ်လွဟ်ဂမၠိုၚ်ဂှ် ပိုဲကၠောန်ကၠုၚ် UG မေတ်ယှေန်၊ ဒပ်ဒၠုက်မေတ်ယှေန်တအ်ရ။

ဒဵုကဵုအခိၚ်လၟုဟ် သွက်ဂွံကၠောန် ဗကပ်ဗဗေၚ်ဒၠုက် နူဒၞာဲပိုဲကၠောန်ဂွံဂှ် ကၠောန်သ္ပဒၟံၚ် ခိုဟ်ခိုဟ်ရ။ ဃောကၠောန်ဒၟံၚ် ဗီုပြၚ်ဏံဂှ် သ္ဂံၚ်ပိုဲစိုပ်အာပ္ဍဲတေံ သ္ဂံၚ်နူကဵု ဇာနှိက်သၟတ်ဗၟာ ဟွံသေၚ် သ္ဂံၚ်ဗစပ်တၞဟ်ခြာဂမၠိုၚ်ဂှ် ၜိုတ်သၟဟ်အ​စောန်မာန် ဒးကလေၚ်ပလံၚ်ဒၟံၚ် လုပ်ဆဵုကောန်ထံၚ်လေဝ် နွံရ။ တၚ်ရန်တၟံဂကောံပိုဲဂှ် ဗိုလ်မေန်အံၚ်လှာၚ် ကဵုဂကောံပၞာန် ဂစိုတ်ဒၟံၚ် ကောန်ညးဍုၚ်ကွာန်ပိုဲ ညံၚ်စာၚ် ညံၚ်အဒါ လွဟ် အဝဵု သြန်နွံတှ်ေ ဗီုမိက်ဂွံကၠောန် ကၠောန်သ္ပမံၚ်ဂှ် ပိုဲပျုတ်ဗ္ဒေက်ဟီုဂရိုဟ်အာ ပေၚ်ၚ်ရ။

ပ္ဍဲကဵုခေတ်ပိုဲ ပိုဲဒးဆဵုဂဗလဝ်ကဵု သၞောတ်ပညာဍိက်ဂၠုဲပၞာန်ရ၊ ပိုဲဒးဆောံလေၚ်လဝ် အခေါၚ်ဗၠးၜး ဘဝသၟတ်ရ။ ပိုဲဒးဒုၚ်ဖံက်ပ္ကဝ်လဝ် အခေါၚ်အရာမၞိဟ်ဂၠိုၚ်ဂၠေၚ်ရ။ အရာတအ်ဏံဂှ် ဟွံမိက်ဆက်စၠောံဏာကဵု အဆက်သၟတ်အနာဂတ် လကြဴတေံရ။ အရာတအ်ဏံဂှ် ဒးပဒေါံကၟိုၚ်ထောံ ပ္ဍဲခေတ်ပိုဲဏံရ။ ပိုဲဒးပဠက်ထောံရ။ နကဵုတၚ်ရန်တၟံဗီုဏံ က္ဍိုက်က္ဍိုပ်ဂကောံပိုဲတုဲ ကၠောန်ရေၚ်တၠုၚ်ကၠုၚ် စဵုကဵုစိုပ်တ္ၚဲဏံ အခိၚ်ပွိုၚ်မွဲသၞာံပြၚ်၊ စိုပ်ကၠုၚ်လဝ်ပွိုၚ်ၜါသၞာံရ။

စဵုကဵုတ္ၚဲဏံ တြးစွံလဝ် ဒၞာဲစုၚ်တုဲ ကၠောန်သ္ပဒၟံၚ် ညံၚ်ဂွံခိုဟ်ဂှ်ရ ကေတ်ဒၟံၚ်ဂုဏ်စရာဲ သွက်သ္ဂံၚ်ပိုဲရ။ ဇာနှိက်သၟတ်ဗၟာပိုဲဂှ် ဇၟာပ်သၟတ်နွံပ္ဍဲကၟိန်ဍုၚ်ဗၟာ ပံၚ်တောဲတုဲ ပါလုပ်ကၠောန် ရေၚ်တၠုၚ်မာန်ရ။ မူဝါဒပိုဲဂှ် သောၚ်ၚ်ရ။ နွံပၟိက်ကဵုဗဗွဲဓဝ်။ ဒစဵုဒစးကဵု ပွဟွံဗဗွဲဓဝ်ရ။ ညံၚ်သၞောတ်တၠအဝဵုပၞာန် ရိုဟ်ကၞက်ဂွံပိုတ်သ္ကုတ်ဒေါံကၟိုၚ်အာဂှ် ပိုဲကၠောန်အာမွဲကရောံမွဲစွံ ဂွံမံၚ်။ ကၠုၚ်စိုပ်ပံၚ်တောဲကဵုပိုဲ ဂွံမံၚ်။ နကဵုပရေၚ်ပၠဂတး လညာတ်ညာဏ်မွဲတန်မ္ဂး လွဟ် အဝဵု သြန်နွံတှ်ေ မုမိက်ဂွံကၠောန် ကၠောန်ဂွံမံၚ်ဂးတုဲ စိုတ်ဓာတ်ဗီုဏံဂှ် ဒးဂစိုတ်ဏောၚ်။ ကေုာံမၞိဟ်ဂစိုတ်ကဠက်လဝ်ဗီုဂှ်ဟေၚ်မှ ဂွံအာဍာ်ဇမၠိၚ်ကရောံ သ္ဂံၚ်ဇာနှိက်သၟတ်ဗၟာပိုဲမာန်တုဲ ကၠောန်အာ ကမၠောန်ပရေၚ်ပၠန်ဂတးမာန်ဏောၚ်ဂှ် မိက်ဂွံဟီုရ။

-နကဵုဇာနှိက်သၟတ်ဗၟာ ပ္ဍဲအခိၚ်လၟုဟ်ဏံ အရာလဵု သ္ပအဓိကတုဲ ကၠောန်သ္ပဒၟံၚ် သွက်ပရေၚ်ပၠန်ဂတးရော။

ယွံ။ ဇာနှိက်သၟတ်ဗၟာပိုဲဂှ် အခိၚ်လၟုဟ်ဏံ ပ္ဍဲပရေၚ်ပၠန်ဂတး စွံအဓိကကဵုမုတုဲ ကၠောန်သ္ပမံၚ်ရောဟီုတှ်ေ ဟိုတ်တၞံပိုဲ နွံဒၟံၚ် မွဲဓဝ် ဟွံသေၚ်ရ။ နူကဵုဒၞာဲကၠောန်ဂွံဂှ် ယိုက်ဂၠေၚ်တာလျိုၚ်ကၠုၚ်စိုပ်တုဲ ညံၚ်သၞောတ်တၠအဝဵုပၞာန် ရိုဟ်ကၞက်ဂွံပိုတ် ဂွံဒေါံကၟိုၚ်အာ ၜိုတ်ပိုဲသ္ပမာန် ဂစာန်ဓရိုဟ်၊ ပၠန်ဂတးဏောၚ်တှ်ေ သာတုဲဍာံဏောၚ်။ မုဟိုတ် ပိုဲဒးဟီုဗီုဏံရောတှ်ေ ပ္ဍဲဇာနှိက်သၟတ်ဗၟာပိုဲဂှ် သ္ဂံၚ် နူလပါ်ဂကောံဇြဟတ်ပရေၚ်ဍုၚ်ကွာန်လေဝ် နွံမံၚ်။ ပ္ဍဲဗလးမုက်ပၞာန်၊ ပ္ဍဲအကြာဂြိုပ်ဒဵု၊ ပ္ဍဲဒပ်မဟာဂမၠိုၚ်၊ သ္ဂံၚ်ပၠန်ဂတးဒၟံၚ်ကဵုသၞောတ်တၠအဝဵုပၞာန် နကဵုဂၠံၚ်တရဴရပ်လွဟ်လေဝ်နွံမံၚ်။ စဵုကဵုလၟုဟ် ပ္ဍဲဗလးတိ သ္ဂံၚ်တိတ်ဗကပ်ဒၟံၚ်ဗဗေၚ်လေဝ် နွံမံၚ်။ ရုဲစှ်ဂၠံၚ်တရဴဒၠုက်တုဲ သ္ဂံၚ်ကၠောန်ဒၟံၚ်မေတ်ယှေန် ပ္ဍဲဍုၚ်ဇၞော်လေဝ် နွံမံၚ်။ မွဲလပါ်ပၠန်ဂှ်လေဝ် ပိုဲကၠောန်သ္ပဒၟံၚ် ကမၠောန်လုပ်ဆဵုကဵုကောန်ထံၚ်တအ် လေဝ်နွံရ။ ပရၚ်တဲနၚ်ဇဳ Rose gift လေဝ်နွံရ။

သြန်ဂွံနၚ်နူဂှ်တအ်ဂှ် မဟာမိတ်ပိုဲ၊ ဒပ်ပၞာန်ဂမၠိုၚ် ကၠောန်သ္ပဒၟံၚ် ညံၚ်ရိုဟ်ကၞက်တၠအဝဵုပၞာန် ဂွံပိုတ်ဒေါံအာ အလုံမွဲကၟိန်ဍုၚ်ဗၟာ နွံပၟိက်ဒၟံက်ဍာံဍာံဂှ် ပိုဲဇွောဝ်ပၠုပ်ဒၟံၚ်နကဵုစရၚ်ချိုတ်တ်ပၠိုတ်တ် နွံရ။ ဟီုတှ်ေ ပိုဲဂှ် ကၠောန်ဒၟံၚ် ညံၚ်ရိုဟ်ကၞက်တၠအဝဵုပၞာန် ဂွံပိုတ်သ္ကုတ်အာ နူလပါ်ဇကုကၠောန်မာန် ယဝ်ရဟီုတှ်ေ သာတုဲဍာံဏောၚ်။

-နကဵုဇာနှိက်သၟတ်ဗၟာ ပါဲနူမၞိဟ်ဒးဒုၚ်ရပ်တုဲ ပ္ဍဲပရေၚ်ပၠန်ဂတး ဗီုပြၚ်လဵု ကၠောန်ဒၟံၚ်ပရေၚ်ရီုဗၚ်ထံက်ပၚ်ရော။

ပိုဲကၠောန်ဒၟံၚ် ကမၠောန်ပလံၚ်ဆဵုကောန်ထံၚ် ကုသ္ဂံၚ်စိုပ်အာ လကြဴဒပ်ပသဲတအ်ရ။ သြန်နွံပၟိက် သွက်ဂကောံဇြဟတ်ရပ်လွဟ်ဂမၠိုၚ်ဂှ် ဂၠာဲနူ ပရၚ်တဲနၚ်ဇဳ Rose gift တုဲ ကၠောန်ရေၚ်တၠုၚ်ဒၟံၚ်ရ။ ပ္ဍဲလတူဍုၚ်ဇၞော်တအ်ဂှ် ညံၚ်ဂွံဆက်ဗကပ်အာဗဗေၚ်မာန် ကၠောန်ရေၚ်တၠုၚ်ဒၟံၚ် ကမၠောန်ပူဗိုၚ်ပံၚ်ကောံ ပ္ဍဲကဝ်မတဳဗလးတိဗဗေၚ် နွံရ။ မေတ်ယှေန်ဒၠုက်ပိုဲ နွံရ။

ဗီုဟီုလဝ်နူကၠာဂှ်ရ အဓိကဟီုဂှ် ဟၟဲပုဟ်။ ပိုဲဂှ် ဒၞာဲကၠောန်ဂွံ ဒၞာဲတာလျိုၚ်ကၠုၚ်စိုပ် ယိုက်ဂၠေၚ်တုဲ ၜိုတ်ပိုဲကၠောန်ဂွံသီုဖအိုတ် ဂိုတ်ဂစာန်ရေၚ်တၠုၚ်ဒၟံၚ် ယဝ်ဟီုတှ်ေ သာတုဲဍာံဏောၚ်။

-ဟီုတှ်ေ ကိုဝ်သာန်မေၚ်ပိုၚ်ဂှ် ကၠာတေံ ဒှ်သၟတ် Rapper မွဲတၠ ဂွံတီလဝ်ရ။ မုဟိုတ်ဂွံပြံၚ်စိုပ်အာဘဝ ကောန်ဒပ်ထံက်ပလံၚ်ရော။ တုဲပၠန် လၟုဟ်ဏံ ဒးဆေၚ်ဒၟံၚ်မုက်ကဵု အခက်အခုဲဗီုလဵုရော။

အဲဂှ် ကၠာတေံတှ်ေ ဒးစိုတ် ပရေၚ်ဗၠးၜး၊ သတိုၚ်ပရေၚ်ဗၠးၜးဂှ်ရ စိုပ်အာသ္ကုတ်လပါ်ဂှ်။ သ္ဍိုက်မၠိုက်မံၚ် အခေါၚ်ဗၠးၜး၊ သ္ဍိုက်မၠိုၚ်ဒၟံၚ် အခေါၚ်ဗၠးၜးသၟတ်ရ။ မံၚ်ကဵုသတိုၚ် ဗၠးဗၠးၜးၜးရ။ ပ္ဍဲမွဲအာယုက်မံၚ်ကၠုၚ်လဝ် ဗီုပြၚ်ဏံဂှ် ပ္ဍဲဂိတုဖေဖဝ်ဝါရဳ စၟတ်တ္ၚဲ ၁ ဂှ် ဂကောံပၞာန်သီအဝဵုရ။ ပြံၚ်ကၠုၚ်ဗီုပြၚ်သဏ္ဌာန် အုပ်ဓုပ်ပၞာန်ရ။ ဟွံဗဗွဲဓဝ်ပုဟ်ဂှ် ကၠးတီမံၚ်ပ္ဍဲစိုတ်ရ။ ပ္ဍဲဝၚ်လေဝ် ပိုဲကေၚ်ဆဵုဂဗနွံရ။ တုဲပၠန် ညးဍုၚ်ကွာန်ပိုဲဂှ် ဗီုဟီုတုဲကၠုၚ်ဂှ်ရ ဒးဒုၚ်ပန်ပြိုက်ဂစိုတ်ရ။ ကောန်ညးဍုၚ်ကွာန်ပိုဲ ဆၜိုတ်တၞိၚ်မွဲတၞုၚ်ဟၟဲဂှ် ပန်ပှော် ကဵုလွဟ်ရ။ ပရောဒဒှ်ပန်ပှော် ဗီုပြၚ်ဏံဂှ် ပိုဲဟီုဂရိုဟ်ပျုတ်ဗဒေက်ရ။ ပိုဲဒးပၠန်ဂတးမှ ဂွံဏောၚ်။ ပရေၚ်အုပ်ဓုပ်ပၞာန် ပရေံကၠုၚ်လဝ်ပ္ဍဲဝၚ်ဂှ် ဣဏံရဏောၚ်။ ပိုဲဆဵုဂဗလဝ်ကဵု သၞောတ်ပညာ ဍိက်ဂၠုဲပၞာန် ဗွဲမဂၠိုၚ်ဂှ်ရ ဟွံမိက်ဆက်စၠောံဏာ အဆက်ကောန်အဆက်စဴရ။ ပိုဲပါလုပ်ကၠုၚ်ရ။ ဃောပါလုပ်ကၠုၚ်ဂှ်ရ သ္ဂံၚ်နွံဇိုၚ်ကရပ်ပိုဲ တိုန်ကွတ်ပၞာန် ပ္ဍဲဂြိုပ်ဂၞိၚ်ရ။ ပိုဲကၠောန်ရေၚ်တၠုၚ် မေတ်ယှေန်ရ။ ဒးဒုၚ်ရပ်ရ။ စိုပ်အာပ္ဍဲတေံရ။ ဒးဒုၚ်စသိုၚ်ပရေၚ်ဍဵုဍိုက်ပျဲပျာံ ဗီုဏံပရေံရေံရ။ အရာဏံဂှ် ပိုဲဒးကလေၚ်ကၠောန်ဏောၚ်၊ ကလေၚ်ပါလုပ်ဂွံမံၚ်ဏီဂးတုဲ ကလေၚ်တိတ်ကၠုၚ် လပါ်မ္ၚးဏံရ။ ပ္ဍဲအခိၚ်ကလေၚ်တိတ်ကၠုၚ် ဒဵုစိုပ်အခိၚ်လၟုဟ်ဏံ ပ္ဍဲဂကောံဇြဟတ်ပရေၚ်ပၠန်ဂတးကီု။ ဂကောံဇြဟတ်ပရေၚ်ဍုၚ်ကွာန်ကီု ပိုဲနွံအာဒၟံၚ်ဏီ။ လတူနူအရာပိုဲကၠောန်သ္ပမာန်ဂှ် ပါလုပ် ရေၚ်တၠုၚ်ပ္ဍဲအခန်ကဏ္ဍသာတုဲရေၚ်တၠုၚ်မာန်ဂှ်ဏီရ။

-အလန်လကြဴအိုတ်ဏံ မုမိက်ဂွံဟီု ကုညးဍုၚ်ကွာန် ကေုာံ ဂကောံဇြဟတ်ပရေၚ်ပၠန်ဂတးတအ် နွံရော။

အခိၚ်လၟုဟ်ဏံ ပရေၚ်ပၠန်ဂတးနွေဥူပိုဲ၊ ပ္ဍဲပေါဲဗတိုက်ညံၚ်တၠအဝဵုပၞာန်ဂွံပြဟ်ဒတုံစှ်ေဂှ် ဒၞာဲ၊ ဒေသဂမၠိုၚ် ဟွံတုပ်။ ဂကူဂမၠိုၚ် ဟွံတုပ်။ မူဝါဒဂမၠိုၚ် ဟွံတုပ်မွဲသာ် ပိုဲတအ် ပၠန်ဂတးဒၟံၚ်ကဵု တၠအဝဵုပၞာန် နကဵုမူဝါဒဒတန်ကဝ်ဏံရ။ ပ္ဍဲလတူပၠန်ဂတးဂှ် မုဟိုတ် ဂွံဒးပၠန်ဂတးရောတှ်ေ သွက်ဂွံရီုဗၚ် ညးဍုၚ်ကွာန် ဒးစၚ်လဝ်ကဵု ပၠံၚ်လွဟ်တုဲ ဒးဒုၚ်ဍဵုဍိုက်မံၚ်ဂှ် ပိုဲကၠောန်ဒၟံၚ်ဒတုဲဖိုလ် ညးဍုၚ်ကွာန်ရ။ သ္ဂံၚ်ပိုဲပါလုပ်သီုအဲ သီုဖအိုတ်ဂှ် ဒုၚ်ဂိုၚ်ကေတ်လဝ် ဇာနှိက်သၟတ်ဗၟာဟီုမ္ဂး ဗော်ပိုဲကဵုဒှ်၊ သမဂ္ဂကွးဘာကဵုဒှ်၊ ဂကောံကဵုဒှ်၊ အလဵုအသဳကဵုဒှ်၊ ဂကောံရပ်လွဟ်ကဵုဒှ် ပိုဲသီုညးဖအိုတ်ဂှ်  ကၠောန်ကမၠောန်ဒတုဲဖိုလ် ညးဍုၚ်ကွာန်ဏောၚ်ဟီုတုဲ ဟိုတ်နူဒက်ပ္တန်ကၠုၚ်လဝ်ဂှ်ရ ဂကောံပိုဲဂှ် ဒှ်ဇုတ်ဓရံၚ်ညးဍုၚ်ကွာန် သမဂ္ဂသီုဖအိုတ်ရ။

ယဝ်ဒးဟီုဥပမာတှ်ေ ကံၚ်ဇြဳပၞာန် ပန်ဗတိုက်ကၠုၚ်ကဵု သၞာဲဒဴ သ္ပလဝ် CDM တအ်ရ။ ပိုဲဂကောံဇြဟတ်ပရေၚ်ပၠန်ဂတးတအ်ဂှ် ကၠောန်သ္ပကၠုၚ် SOCIAL PUNISHMENT တုဲ ဗတိုက်ကၠုၚ် သၟာဟွံသ္ပ CDM တအ်ဂှ် ဒှ်ဒၟံၚ် ညံၚ်ကဵုကလေၚ်ကဵုဒၟံၚ် ဒဒိုက် ကုကောန်ညးဍုၚ်ကွာန် တုပ်ပ်ရဂှ် ပိုဲသ္ၚဳဂၠိပ်လဝ်ရ။ တုဲပၠန် အခိၚ်လၟုဟ်ဏံ ပ္ဍဲပရေၚ်ပၠန်ဂတးပိုဲဂှ် ပိုဲတအ် ဒှ်လပါ်ဂကောံဇြဟတ်ပရေၚ်ဍုၚ်ကွာန်ရ။ လပါ်က္ဍိုပ်သ္ကိုပ်ပိုဲ ဟၟဲကဵုပရေၚ်ဍုၚ်ကွာန်ယျဵုလ္ဂူတအ်၊ ဟိုတ်နူထိၚ်ဒက်လဝ် ကသပ်ညာဏ် လညာတ်ညးဍုၚ်ကွာန်တအ်တုဲ ဒးဆဵုဂဗကၠုၚ်ဒၟံၚ် တၚ်ခက်ခုဲဗွဲမဂၠိုၚ်ရ။ တုဲပၠန် ပ္ဍဲကဵုဂကောံဂလိုၚ်ဂှ်တှ်ေ တၚ်ဒုၚ်ဂိုၚ်ကေတ် ညးမွဲကဵုညးမွဲ ဟိုတ်နူဟွံတုပ်သၟဟ်၊ မူဝါဒဟွံတုပ်သၟဟ် ဓဝ်က္ဍုဟ်ဂမၠိုၚ် ဂျိုၚ်တန်တဴဒၟံၚ်ဂှ်ရ ပရေၚ်ပၠန်ဂတးပိုဲဂှ် ဂွံစိုပ်တရဴဍာ်ဇမၠိၚ်မာန် အခိၚ်လအ်လမာန်ဏီရ။ ယဝ်ခါရ ပိုဲတအ် ပံၚ်ပကောံ နဒဒှ်ဒပ်ပံၚ်ကောံ နွံဒၟံၚ်လၟုဟ်ဏံမွဲ ညဳညဳမာန်ဏောၚ်ဟီုတှ်ေ ပရေၚ်ပၠန်ဂတးလၟုဟ် ညံၚ်ရိုဟ်ကၞက်တၠအဝဵုပၞာန် ဂွံပိုတ်ဒကုတ်အာမာန်ဂှ် ဆက်အာမံၚ်ဂတတေံ နကဵုအသိၚ်ခိုဟ်ဟ်မာန် ဏောၚ်လေဝ်။ ယဝ်ရဒှ်မာန်တှ်ေ သီုဖအိုတ်ဂှ် ထေက်ကဵုဒးတန်တဴ နဒဒှ်ဒပ်ပံၚ်ကောံမွဲရ။ ခက်ခုဲဟီုဂှ်လေဝ် နွံဏောၚ်၊ ဆဂးဂှ် လပါ်ပိုဲတအ်လေဝ် က္ဍိုပ်သ္ကိုပ်တအ်၊ သဳနဳယျာပိုဲတအ် အလဵုဇကုပိုဲလေဝ် ပ္တိတ်ဒၟံၚ်ဇြဟတ် သွက်ပရေၚ်ပံၚ်ပကောံမဟာမိတ်ရဂှ် နကဵုညးဍုၚ်ကွာန်တအ်ကီု၊ နကဵုပရေၚ်ပၠန်ဂတးကီု အရာဏံဂှ် သွက်ပရေၚ်ဗၠးၜး ကောန်ညးဍုၚ်ကွာန်ပိုဲ သီုညးဖအိုတ် ဒးရုန်ဂစာန်အာ ပရေၚ်ပၠန်ဂတးမွဲစွံဂှ်ရ ညးဍုၚ်ကွာန်သီုဖအိုတ် ပါလုပ်ဟေၚ်မှ တရဴပိုဲအာဂှ် ဂွံစိုပ်ပြဟ်ဏောၚ်။ အဲမိက်ဂွံဟီုဏာ ဆၜိုတ်ဏံရ။

ပရိုၚ် – သြၚ်လောန်တိုၚ်(မ်)