မတ်မလီု၊ နဝ်ဝေမ်ဗာ (၂၅)
ဟိုတ်နူ စက် X-Ray ကံၚ်ဇြဳပၞာန် မစုတ်စၟဳစၟတ်ဒၟံၚ် ပ္ဍဲကဵုဗ္ဒါဲကွာန် (ညောၚ်ခါးရှည်) တိတ်နူတွဵုရးဍုၚ်မန် ဂၠံၚ်လုပ်ဗဂေါဂှ်တုဲ တရဴလအ်လတံ နွံဒၟံၚ်ဂှ်ရ မၞိဟ်ဍိုက်ဗက်ယာန်ကွဳစက်တံ အောန်ကၠုၚ်တုဲ ဒးဖအောန်ဖျေံလဝ် ပရေၚ်ဓဇက်ဂြိပ် လာၚ်ကွဳစက်တရဴဇမ္ၚောဲတံ ဗ္ဒါဲကဝက်ရဂှ် တၠကမၠောန်လာၚ်ယာန်ကွဳစက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်သီအဝဵုဝွံ နကဵုတၚ်ထ္ၜးဟိုတ် ပရေၚ်ဂီုကၠီုဂှ် စုတ်လဝ်စက် X-Ray လ္တူဂၠံၚ်ဇၞော် မတ်မလီု−လ္ဂုၚ်ဂှ်တုဲ အခိၚ်ဗွဲမလအ်လ ရေၚ်စၟဳစၟတ်ဒၟံၚ် လာၚ်ကွဳစက်ယာန်တံဂှ် ကၠောန်ၜိုတ်ဒၟံၚ်ရ။
မွဲလ္ပာ်ပၠန်ဂှ် ကောန်ဒပ်ကံၚ်ဇြဳပၞာန်တံဝွံ သီုကဵုစၟဳစၟတ်ဒၟံၚ် ရဲအာတရဴတံ မွဲတုဲမွဲ ဗွဲလစှ်ေဂှ်ရ မၞိဟ်ဍိုက်လာၚ်ကွဳစက်ဓရိပ်တရဴဇမ္ၚောဲတံ သာအောန်စှ်ေကၠုၚ်ရ။
ဟိုတ်နူကလိဂွံမၞိဟ်အာတရဴ အောန်ကၠုၚ်ဂှ်ရ လာၚ်ယာန်ကွဳစက် ဗွဲမဂၠိုၚ်ဒးဆေၚ်ဒၟံၚ်မုက်ကဵု ကျဟောံတံတုဲ ဒးဖအောန်ဖျေံကၠုၚ် ပရေၚ်ဓဇက်ဂြိပ်ကွဳစက်ယာန်တံ ဗ္ဒါဲကဝက်ပြၚ်ရဂှ် တၠကမၠောန်လာၚ်ကွဳစက်မွဲတၠ ဟီုရ။
“နူစစၟဳစၟတ်ကဵု X-Ray ဏံဟီုဂှ် ပိုယ်တံ ဒးဆေၚ်ဒၟံၚ်မုက်ကဵု အခက်အခုဲတံ ဒဵုကဵုလၟုဟ်ရ၊ ကွဳစက်တံ ကပေါတ်ဗၞိက်တံ ဟွံစိုပ်လ္ဂုၚ် အခိၚ်မှာန်န်ဂှ်ရ ညးအာတရဴတံ Customer တံဂှ် ဒှ်ဒၟံၚ်အခက်အခုဲညိညရ၊ လာၚ်ကွဳစက်ဂှ်တှ်ေ ဖအောန်ဖျေံလဝ်နွံရ၊ ပြဟ်ဟ်ဏံ အခိၚ်ဓဇက်ဂြိပ်ဒၟံၚ် ပ္ဍဲပိုယ်တံ နူ (၄) အခိၚ်ဂှ် ဖအောန်ဖျေံလဝ် ၜိုတ်ကဝက် (၂) အခိၚ်ရ၊ ပိုယ်တံဓဇက်ဂြိပ် သီု(၄) အခိၚ်တှ်ေ ကဵုၚုဟ်ကၠေၚ်ဏံ၊ ကဵုရဲအာတရဴအောန်တံဂှ်ကဵု ဒၟါနူစက် X-Ray ဏံတုဲ အခိၚ်လအ်လဂှ်ရ ရဲအာတရဴတံ ဟွံအာဂှ် ဂၠိုၚ်ဒၟံၚ်၊ ပ္ဍဲပိုယ်တံဂှ် လဇုဲလဇတုဲ ဟွံဂွံမၞိဟ်တှ်ေ လာၚ်ကွဳစက်ပိုယ်တံ ကျဂှ်ရ ဒးကလေၚ်ဖအောန်ဖျေံလဝ်ရ” သာ်ဝွံ သ္ဂးရ။
သ္အာၚ်နူဂှ်ပၠန် လာၚ်ကွဳစက်ဓဇက်ဂြိပ်တရဴဇမ္ၚောဲ မဖ္ဍိုက်ရဲအာတရဴတံဂှ်ဝွံ သွက်ဂွံဒုၚ်စၟဳစၟတ်ကဵု စက် X-Ray ဂှ် ဒးမၚ်ဒၟံၚ် အောန်အိုတ် နူ (၂) နာဍဳ စဵုကဵု (၄) နာဍဳပြၚ်ဂှ်ရ လၟေၚ်တရဴတံ အခိၚ်မှာန်န်ဟွံမွဲရတုဲ ဂွံခယျကေတ် အခိၚ်စိုပ်မာန် ဗီုကၠာတေံဂှ်လေဝ် ဝါတ်ဂါတ်ကၠုၚ်ရဂှ် သ္ဂးရ။
ညးဍုၚ်ကွာန်အာရဴမွဲတၠဂှ်လေဝ် ယဝ်ရအာတရဴ ကဵုကွဳစက်တံမ္ဂး လ္ပာ်ကံၚ်ဇြဳပၞာန်တံ ထ္ၜးဟိုတ်ပရေၚ်ဂီုကၠီုတုဲ ပ္ဍဲအရာစၟဳစၟတ်ကဵု စက် X-Ray တံဂှ် အခိၚ်လအ်လတံ နွံဒၟံၚ်ဂှ်ရ သုၚ်စောဲကၠုၚ် ကွဳပၟတ်တံ ဂၠိုၚ်ကၠုၚ်ရဂှ် ဟီုရ။
“X-Ray ဂှ်တှ်ေ လအ်ကွေံကွေံ၊ X-Ray ဂှ် ဍေံတံစၟဳစၟတ်ကွဳစက်အာတရဴတံလအ်တှ်ေ အောန်အိုတ်ဂှ် ၜိုတ် (၄) နာဍဳရ၊ အကြာ (၄) နာဍဳ (၆) နာဍဳနွံရ၊ ကွဳပၟတ်တိတ် (၉) နာဍဳမ္ဂး (၇) နာဍဳဂှ် စိုပ်လ္ဂုၚ်ယျ၊ ကွဳပၟတ်ဂှ်တှ်ေ သာသာရ၊ လၟုဟ်ဂှ် ပ္ဍဲသၞေဟ်ကွဳပၟတ်ဇၞော်မွဲဟီုတှ်ေ စၟဳစၟတ်တၞးကာဒ်ကောန်ဍုၚ် ကဵု စၟတ်တဲကွဳပၟတ်တံတှ်ေ တုဲရ၊ သှ်ေနူဂှ် မုမှ ဟွံစၟဳစၟတ်ပုဟ်” သာ်ဝွံ သ္ဂးရ။
အခိၚ်လၟုဟ်ဂှ် ပ္ဍဲကဵုစက် X-Ray ကံၚ်ဇြဳပၞာန် မပံက်လဝ်တံဂှ် လၟိဟ်ကွဳစက်ဂၠိုၚ်ကဵုဖ္ဍိုက် ကၟာတ်ဆိုအ်ဒၟံၚ်ဂှ်ရ ဒးမၚ်ဒၟံၚ် အခိၚ်ဗွဲမလအ်လသၟးဟွံက စၟဳစၟတ်တုဲ စိုပ်အာအခိၚ်ဗ္တံပၠန်မ္ဂးလေဝ် ဟိုတ်နူအမိၚ်ကံၚ်ဇြဳပၞာန် တိတ်ဗ္တံဟွံဂွံတံဂှ်ရ နကဵုညးအာတရဴတံ ဒးတိက်ဇူဒၟံၚ် လ္တူဂၠံၚ်တံကဵု ပ္ဍဲဒၞါဲမကြပ်တံဂှ်ရ။
ကံၚ်ဇြဳပၞာန်ဂှ် ဟိုတ်နူစက် X-Ray မပံက်လဝ် နကဵုတၚ်ထ္ၜးဟိုတ် ပရေၚ်ဂီုကၠီုဂှ်ရ အခိၚ်အာကၠုၚ်တရဴတံကဵု ပ္ဍဲဒၞါဲပလံၚ်ကပေါတ်ဗၞိက်တံဂှ် အခိၚ်လအ်လတံ က္တဵုဒှ်ဒၟံၚ်ဂှ်ရ ဗီုကၠာတေံ တရဴဟွံမြက်ဇက်ရတုဲ နကဵုညးအာတရဴတံ ကိစ္စဒးအာကလောန် ဟွံဒေါအ်ဟွံဂွံနွံမှ အာကၠုၚ်အိုတ်ရ။
ဒၞါဲစုတ်လဝ် စက် X-Ray ဂှ်ဝွံ ဟိုတ်နူနွံဒၟံၚ် ပ္ဍဲဂၠံၚ် ဒၞါဲပလံၚ်ကပေါတ်ဗၞိက် ကေုာံ ရဲအာတရဴ နူကဵုဒေသမန်၊ ကရေၚ် ကေုာံ ရးတၞၚ်သဳတံဂှ်ရ လအ်လကၠုၚ်ဗီုဏံနွံဂှ်ဝွံ မၞိဟ်အာကၠုၚ်တရဴဗီုကၠာတေံ ဟွံမွဲရတုဲ ကပေါတ်ဗၞိက်တံ ဂေတ်ဂြိပ်လေဝ် ယအ်စှ်ေကၠုၚ်ဂှ် ဂွံတီကေတ်ရ။
ပ္ဍဲတွဵုရးဍုၚ်မန်ဂှ် လာၚ်ကွဳစက်ဓရိပ်တရဴဇမ္ၚောဲတံ မၞုံဒၟံၚ် ဟွံအောန်နူကဵု (၇၃) လာၚ်တုဲ ကြဴနူဒပ်ပၞာန်သီအဝဵုတုဲဂှ် လာၚ်ယာန်ကွဳစက်ဓရိပ်တရဴဇမ္ၚောဲတံဝွံ ဂွံကၠုၚ်ရဲအာတရဴတံကဵု ကပေါတ်ဗၞိက်တံ အောန်စှ်ေကၠုၚ်ကီု၊ ဟိုတ်နူတၚ်ဗၞတ်ဗ္ၜတ် ကံၚ်ဇြဳပၞာန်တံတုဲ သွက်ဂွံဆက်ဒတူလိုၚ်ဂှ် ဒးဂဗဒၟံၚ်အခက်အခုဲတံရ။
ပရိုၚ်−သြၚ်လောန်တိုၚ်(မ်)