တာကာ၊ နဝ်ဝေမ်ဗာ (၂၄)
ပ္ဍဲဍုၚ်ဗေန်ဂလာဒေတ် မၞိဟ်တြုံ (၂) တၠ ဟိုတ်နူဂစိုတ်လဝ် blogger မွဲတၠတုဲ မဒးဒုၚ်ဖျေံလဝ်ဒဏ်ဂစိုတ်တုဲ မၞိဟ်တၠဒုဟ် (၂) တၠဏံဝွံ နူကဵုရုၚ်သၞောဝ်ဓဝ် ဒၞါဲမၞိဟ်ဂၠိုၚ် မၞုံဍုၚ်တာကာမွဲဂှ် ဂြိပ်တိတ်ဗၠးအာလဝ်ရ။
ကောန်ဍုၚ်အမေရိကာန် ဇာတိဗေန်ဂလာဒေတ် အာဝေတ်ဂျဳရိၚ်ဝွံ ပ္ဍဲသၞာံ ၂၀၁၅ ဂိတုဖေဖဝ်ဝါရဳ အခိၚ်မစဴကၠုၚ်သ္ၚိ နူကဵုပေါဲသွံဖျာလိက် တာကာ မွဲကရောံကဵုသမ္ဘာညးဂှ် ဒးဒုၚ်ဗာ်ဂစိုတ်လဝ် နကဵုမြရ။
သမ္ဘာညးလေဝ် ဒှ် blogger မွဲတၠရတုဲ ပ္ဍဲကဵုမဒးဒုၚ်ဗ္တိုက်ဏံဂှ် ကလိဂွံအာဝပ် ပ္ဍဲက္ဍိုပ် ဗွဲမသ္ကာတ်မြဟ်တုဲ ဒးဆောံလေၚ်အာ ၝောံတဲမွဲတၞုၚ်ရ။
ဟိုတ်နူလၟေၚ်ဒဒှ်ဏံတုဲ သၞာံတုဲကၠုၚ်တေံ ဖျေံလဝ်ဒဏ်ဂစိုတ် ကုကောန်ဂကောံမွဿလေမ်ရပ်လွဟ် (၅) တၠဂှ်တုဲ မွဲတၠဂှ်တှ်ေ ဖျေံလဝ်ဒဏ်ထံၚ်မွဲအာယုက်ရ။
မၞိဟ်ဍိုက်ကွဳလိုန်ဓာတ် မွဲဂကောံဏံဂှ်ဝွံ ပက်လဝ် ကုဂကောံဒပ်ဗၠာဲသၟိၚ်တံ နကဵုဂဥုဲဓာတုတံတုဲ ကော်ပ္တိတ်ဏာ မၞိဟ်တၠဒုဟ်တံဂှ်ရ ပ္ဍဲကဵုညးမဒးဒုၚ် ကဵုဒဏ်ဂစိုတ် (၂) တၠဂှ်ဝွံ တုဲကၠုၚ်တ္ၚဲအဒိုတ်တေံ ဂြိပ်တိတ်ဗၠးအာလဝ်ရောၚ် ဒပ်ဗၠာဲသၟိၚ်တံ ဟီုရ။
“သွက်ဂွံရပ်ဍေံတံကီု၊ မၞိဟ်မကဵုလဝ်အရီုဗၚ် သွက်ဍေံတံဂွံဂြိပ်တိတ်မာန်တံကီုဂှ် စလဝ် ပရေၚ်ဂၠိုၚ်ဂၠါဲဇၞော်ဇၞော်မွဲယျ” သာ်ဝွံ ဝန်ဇၞော်အပ္ဍဲဍုၚ် ဟီုဂးလဝ်ကဵု အ္စာပရိုၚ်တံရ။
ဂြိပ်တိတ်နူကဵုအပ္ဍဲဍုၚ်မာန်ဂှ်ရ သွက်ဂွံတာဒၞါဲမၞိဟ်တံဏံမာန်ဂှ် ကဵုလဝ်သမ္တီ ဆဝ်မ္ၚုဟ်လဝ် ကုသၞာဲဒဴ ပရေၚ်ဂီုကၠီုပယျဵုတံရဂှ် ဝန်ဇၞော်ဆက်ဟီုဂးလဝ်ရ။
သွက်ဂွံဗက်ဒၞါဲဇိုၚ် မၞိဟ်မကလိလောန်လဝ်ဒုဟ်ဒဏ်တံဂှ် သုၚ်စောဲအာ ဒဝ်ဠာ ဗ္ဒါဲ (၂) ဠက်ပြၚ်ရောၚ်ဂှ်လေဝ် ဒပ်ဗၠာဲသၟိၚ်တံ လလောၚ်တြးလဝ်ရ။
ညးမဒးဒုၚ်ဖျေံ ဒုဟ်ဒဏ်တံဝွံ ဒှ်ကောန်ဂကောံ Ansarullah Bangla အေဝ်(လ်)ကာၚ်တာ ကဵုဓတ်ဖ္တိုက်ဖ္အောဝ်လဝ်ဂှ်တုဲ ဂကောံဏံဝွံ ပ္ဍဲကဵုလက္ကရဴ ပရေၚ်ဂစိုတ်ဂယိုၚ် ညးမချဳဒရာၚ်ကတိုၚ်ကၟဟ် ပရေၚ်လောကဳတံကဵု blogger မွဲဒါဇြိန်ပြင်တံဂှ် ဒှ်ရဲမၞုံဒၟံၚ်လက္ကရဴတံ ရပ်လဝ်ဇုက်တံရောၚ်ဂှ် ဗၠာဲသၟိၚ်တံ ဟီုရ။
ပ္ဍဲဍုၚ်ဗေန်ဂလာဒေတ် ဒၞါဲမွဿလေမ်ဗွဲမဂၠိုၚ် မံၚ်တန်တဴဂၠိုၚ်ဂှ် (ISIS) ၊ အေဝ်ကာၚ်တာ ဂကောံမဟာမိတ်တံဝွံ ပ္ဍဲသၞာံ ၂၀၁၃ ကဵု ၂၀၁၆တံဂှ် သ္ကဵုက္တဵုဒှ် ပရေၚ်ဗ္တိုက် ကု blogger တံ၊ ညးမချဳဒရာၚ်ကတိုၚ်ကၟဟ် ပရေၚ်လောကဳတံ ကေုာံ ဂကောံမၞိဟ်အောန် ပရေၚ်ဘာသာ မပ္တဝ်အာက္ဍိုပ်ကဵု ပရေၚ်ချိုတ်ဂျိုၚ်ဂၠိုၚ်တံဂှ်ရ။
Ref: Aljazeera