လာန်ဒါန် – နဝ်ဝေမ်ဗာ (၂၅)
ကြဴနူပရေၚ်ၜက်ကၠောံရုယှာတုဲ ဗျိတုၚ်ဂှ် ပလံၚ်ဗစိုပ်ကဵုယူကရုၚ် က္ၜၚ်ကျာသၞေၚ်ဝဲ အလန်ပထမရောၚ်ဂှ် ဌာနဝန်ဇၞော်ပရေၚ်စဵုဒၞာ ဗျိတုၚ် ဟီုသ္ဂးလဝ်ရ။
သၞဴဒဴယူကရုၚ်ကေုာံ ဒပ်အေန်ဂျေန်နဳယာ (၁၀)တၠဂှ် ကၠောန်လဝ်အဇဳအဇန် ပရေၚ်ပ္ကတ်ပ္ကေၚ် ပ္ဍဲယူကေ ပွိုၚ် တြဴသတ္တာဟတုဲရဂှ် ဌာနဝန်ဇၞော်ပရေၚ်စဵုဒၞာ ကဵုကၠုၚ်သမ္တီရ။
ပါဲနူက္ၜၚ်ကျာသၞေၚ်ဝဲ Sea King ဒပ်ပၞာန်ဗျိတုၚ် ပိဖ္ဍိုက် မစိုပ်ကၠုၚ်အလန်ပထမဂှ် ထပ်တုဲထံက်ပၚ်အာ ကမ်မၠံက်(၁) လက်ရောၚ် ဂွံတီကေတ်ရ။
“ပရေၚ်ထံက်ပၚ်ရီုဗၚ်ပိုဲ သွက်ယူကရုၚ်ဂှ် ဟွံချဳဒစေၚ်မွဲသာ် နွံဒၟံၚ်ရ။ ပါဲနူဏံလေဝ် ကမ်မၠံက်တအ်ဂှ် သ္ပကဵု တိဍာ်ကလေၚ်သီဂွံလဝ် နူရုယှာ ပ္ဍဲသတ္တာဟတုဲကၠုၚ်ဟွံလအ်ဏံဂှ် ပရေၚ်ဂီုကၠီုမာန်ဏောၚ်”ဂှ် ဝန်ဇၞော်ပရေၚ်စဵုဒၞာ် ဘာန်ဝေါလ်လေတ်သ် ဟီုသ္ဂးလဝ်ရ။
သ္ကိုပ်ဝန်ဇၞော်ဗျိတုၚ် သွောန်နေတ်ဂှ် သွက်ဂွံပလန်တဲကဵုဒရုန် အဳရာန်ထံက်ပၚ်လဝ်ကဵုရုယှာမာန်ဂှ် လွဟ်ပန်က္ၜၚ်ကျာ (၁၂၅) ဒကိုဟ်ကီု သီုကပေါတ်ကြိယာပါလုပ် သွက်အထံက်အရီုပရေၚ်ဂီုကၠီုဂှ် ပံၚ် (၅၀) တာန် သွက်ဂွံကဵုအရီုအဗၚ်ဂှ် အာစိုပ်လဝ်ဍုၚ်ဇၞော် ယူကရုၚ်ဏီရ။
ဒၞာဲဒပ်ပၞာန်ရုယှာသီကေတ်လဝ်တအ်ဂှ် ညံၚ်ဂွံကလေၚ်သီကေတ်မာန် ကောန်ဒပ်ယူကရုၚ် လုပ်ဒၟံၚ်ပေါဲဗတိုက်တအ်ဂှ် ဒၟာနူစိုပ်ကၠုၚ်ရာသဳမုဟ်ကျာဂှ်ရ ဒးဆေၚ်မံၚ်မုက်ကဵု လၟုဟ်ဂမ္တဴအောန်စှ်ေကၠုၚ်ဒၟံၚ်ရ။
ဟိုတ်ဂှ်ရ ဗျိတုၚ်ဂှ် ထံက်ပၚ်အာကဵု ဒပ်ယူကရုၚ် ကြိယာအထံက်အရံၚ်မုဟ်ကျာရောၚ်ဂှ် ဂွံတီကေတ်ရ။
သွက်ကောံဓရီုဝန်ဇၞော်ပရေၚ်ဂီုကၠီု သ္ကုတ်သၟဝ်ကျာ ပ္ဍဲအခိၚ်ဝန်ဇၞော်ပရေၚ်စဵုဒၞာဗျိတုၚ်အာစိုပ်နဝ်ဝေဂှ် တၚ်လလောၚ်တြးဏံ မံက်တိတ်ကၠု ပ္ဍဲက္ၜၚ်ပ္ဍိုက်က္ၜၚ်ကျာယူကေ HMS Queen Elizabeth ရ။
ဂကောံသ္ကုတ်သၟဝ်ကျာ ပါလုပ်(၁၂) ဂကောံဂှ် ဒှ်စပတမ်ကၠုၚ် နူဗျိတုၚ် မရန်လဝ်သွက်ဂွံသၠုၚ်ပတိုန် ပရေၚ်ပံၚ်တောဲရေၚ်တၠုၚ် စပ်ကဵုပရေၚ်စဵုဒၞာ ကေုာံပရေၚ်ဂီုကၠီု ပ္ဍဲသ္ကုတ်ဥရောပရသၟဝ်ကျာ။
ပ္ဍဲဂကောံသ္ကုတ်သၟဝ်ကျာဂှ် ဒုၚ်မေတ်၊ သေဿတိုဝ်နဳယျာ၊ ဖေန်လာန်၊ ဂျာမနဳ၊ အိုက်သ်လာန်၊ လေတ်ဗဳယျာ၊ လေတ်တိုဝ်နဳယျာ၊ နေဝ်တာလာန်၊ နဝ်ဝေ၊ ပိုဝ်လာန်၊ ကေုာံသွဳဒေန်တအ် ပါလုပ်ရ။
သ္ကိုပ်ဝန်ဇၞော်ဗျိတုၚ်တြေံ ဗဝ်ရေတ်ဂျောတ်သေန်ဂှ် ဒှ်မဟာမိတ်ယူကရုၚ် ခိုၚ်ဗိုန်မွဲတၠတုဲ အာစိုပ်လဝ်ဍုၚ်ကိယျေတ်ဗ် (၃)အလန်တုဲ ကပေါတ်ကြိယာစက် စပ်ကဵုသွာၚ်ပၞာန်ဂမၠိုၚ်၊ သြန်ဂအုံ ကေုာံ တမ်ရိုဟ်ပရေၚ်ပ္ကတ်ပ္ကေၚ်တအ် ရနုက်ဗပေၚ်ထံက်ပၚ်ဒၟံၚ်ရောၚ် ဂွံတီကေတ်လဝ်ရ။
Ref: CNA