လ္ဂုၚ်၊ နဝ်ဝေမ်ဗာ (၂၆)
ဒပ်ကံၚ်ဇြဳပၞာန်ဝွံ ဟိုတ်နူလုတ်လောန်လဝ် အမှုရာဇာဝတ်ပၞာန် လ္တူညးဗြဴတံ၊ အမှုရာဇာဝတ် မကလိလောန်လဝ် လ္တူဂကူမၞိဟ်တံဂှ်ရ ဇီုကပိုက်ဒၟံၚ်ကဵု လ္တူပရေၚ်ထတ်ယုက် ကေုာံ လ္တူပရေၚ်ဂီုကၠီု ညးဗြဴတံရောၚ် ဂကောံအခေါၚ်အရာမၞိဟ်ကရေၚ် KHRG လလောၚ်ပ္တိတ်လဝ် လစွံစိုတ် ပ္ဍဲတ္ၚဲထပိုတ်ရိုဟ်ကၞက် ပွပကီုပရာပ် လ္တူညးဗြဴဂၠးကဝ် တ္ၚဲဂိတုနဝ်ဝေမ်ဗာ (၂၅) ဂှ်ရ။
ဂကောံအခေါၚ်အရာမၞိဟ်ကရေၚ် KHRG ဂှ် ပွပကီုပရာပ် စပ်ကဵုစိုတ်ကီု၊ ရုပ်ကီု ကေုာံ သီုကဵုလိၚ် ဒပ်ကံၚ်ဇြဳပၞာန်တံ မကလိလောန်ဒၟံၚ် လ္တူညးဗြဴတံဂှ် နွံပၟိက်ဒၟံၚ် သွက်ဂွံဗ္တိုက်ပလီု ဗွဲမပြဟ်ဂှ်တုဲ ညးဗြဴနူဒေသသ္ကုတ်ဗၟံက်သၠုၚ်ကျာ ကၟိန်ဍုၚ်ဗမာတံဝွံ ဒးဆေၚ်ဒၟံၚ်မုက်ကဵု ပွပကီုပရာပ် မဒုၚ်သ္ဇိုၚ်ကဵု လိၚ် တြုံ၊ဗြဴနာနာသာ်တံရောၚ် သာ်ဝွံ ပါလုပ် ပ္ဍဲတၚ်လလောၚ်တြးဂှ်ရ။
ကြဴနူဒပ်ပၞာန်သီအဝဵု သၞာံ ၂၀၂၁ တုဲဂှ် ကံၚ်ဇြဳပၞာန်ဝွံ ဟၟဲကဵုသၞောဝ် ဂစိုတ်ဂယိုၚ်ဒၟံၚ်ဂှ်ကီု၊ ရပ်ဒက်ဖျေံထံၚ်၊ ဍဵုဍိုက်ပျဲပျာံ၊ စံၚ်ပလီုကွာန်၊ ကၠတ်ဂၠံက်ပၠံၚ်ၜး ကပေါတ်ဒြပ်ရတ်ညးဍုၚ်ကွာန်ပိုၚ်တံ ၊ ရပ်စပ်စကာကောန်ကွာန်တံ နဒဒှ်ဇွောံစဵုဒၞါပၞာန်တံသၟးဟွံက သီုကဵုကၟာတ်တာဒၞါ ညံၚ်ဂွိုအ်ကလိဂွံ အရီုဗၚ်ပရေၚ်ဗ္စာရဏာမၞိဟ်တံ ကေုာံ ပရေၚ်ရေၚ်တၠုၚ်သ္ဇိုၚ်တံဂှ် ကလိလောန်လဝ်ရောၚ် KHRG ဟီုရ။
ကြဴနူဒပ်ပၞာန်သီအဝဵုတုဲ လၟိဟ်ညးဒးဂြိပ်ဒဴပါဲဒဴဘဲပၞာန်အပ္ဍဲဍုၚ် သ္ကုတ်ဗၟံက်သၠုၚ်ကျာကၟိန်ဍုၚ်ဗၟာဂှ် မၞုံကၠုၚ် စဵုကဵု (၃၀၀,၀၀၀) တုဲ ညးဗြဴဗွဲမဂၠိုၚ်ဂှ်ဝွံ ဒးဂြိပ်ဒဴပါဲဒလေတ်ဒၟံၚ် သီုကဵုကောန်ၚာ်သၟတ်တံကီု၊ ကေတ်အရီုဗၚ်မ္ၚးတံတုဲ ဒးမၚ်မွဲစဵုဒၞါမံၚ် ကောန်ၚာ်တံရောၚ်ဂှ် KHRG ဟီုရ။
သ္အာၚ်နူဂှ်ပၠန် ညးဗြဴတံဝွံ အခိၚ်ဒးဂြိပ်ဒဴပါဲဒလေတ်ဒၟံၚ်တံဂှ် ဒးမံၚ်တန်တဴဒၟံၚ် ပရေံပရေံတံတုဲ ပရေၚ်ရေၚ်တၠုၚ် ပရေၚ်ထတ်ယုက် သွက်ဍာ်လွပ်ဍာ်သုၚ်၊ သွက်ပရေၚ်ထတ်ယုက် မိကေုာံကောန်ၚာ်တံဂှ် ကလိဂွံဟွံမာန်ဏီတုဲ ညးဗြဴမၞုံဒၟံၚ် အပ္ဍဲကွာန်တံဂှ်လေဝ် ဒးဆေၚ်ဒၟံၚ်မုက်ကဵု ကံၚ်ဇြဳပၞာန်တံ မဗ္တိုက်ကၠုၚ်ကဵုတရဴကျာတံ၊ မဗ္တိုက်ကၠုၚ် နနဲတၞဟ်သ္အာၚ်တံဂှ်တုဲ သွက်ဂွံကလိဂွံစၞစ ကေုာံ ဂဥုဲဇဗတံဂှ် ဒးဒုၚ်ကၟာတ်ဒၞါဒၟံၚ်ရောၚ် သ္ဂးလဝ် ပ္ဍဲတၚ်လလောၚ်တြးဂှ်ရ။
ဗွိုၚ်ဍုၚ်သ္အာၚ်တံဂှ်လေဝ် အရာမဟီုဂးလဝ်တံဂှ် သွက်ဂွံကၠောန်သ္ပကဵု နတဲစှ်ေစှ်ေဂှ်ကီု၊ သွက်ဂွံရီုဗၚ်ထံက်ပၚ်ကဵု ကမၠောန်ဂကောံမှာဇန်တံကီု၊ သွက်ဂွံကေတ်ကဵုအရေဝ် ဗွဲမစိုပ်တရဴမာန် လ္တူပွပကီုပရာပ် စပ်ကဵုလိၚ်တံ ကေုာံ ပွပကီုပရာပ်တၞဟ်သ္အာၚ် ကံၚ်ဇြဳပၞာန်တံ မဝးပ္ကဝ်ဒၟံၚ်တံတံဂှ်ကီု ကေုာံ သွက်ဂွံဒက်ပ္တန်သၞောတ် မရပ်စပ်သောၚ်ကလးမွဲဂှ် ဂကောံအခေါၚ်အရာမၞိဟ်ကရေၚ် KHRG ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)