မတ်မလီု၊ နဝ်ဝေမ်ဗာ(၂၇)
ပ္ဍဲတွဵုရးဍုၚ်မန် ကြဴနူဒပ်ပၞာန်သီအဝဵုတုဲ ဟိုတ်နူအကာဲအရာ ပရေၚ်ဂီုကၠီုတုဲ ဟွံဂံၚ်တိတ်ၜှ်ဇဗၠုကီု သီုကဵုညးတဵုလွဳဇဗၠုတအ် အောန်ကြဳစှ်ေကၠုၚ်ကီုဂှ်ရ ၚုဟ်ဇဗၠုတၞး က္ဍၚ်တိုန်ကၠုၚ် ကရပ် ၃ ဂအုမ်ရဂှ် ဒေၚ်သွံရာန်ဗၠုတၞးဂမၠိုၚ် ဟီုကဵုဌာန် ပရိုၚ်သြၚ်လောန်တိုၚ်(မ်)ရ။
ၚုဟ်မးဇဗၠုဂှ် ပ္ဍဲဂိတုတုဲကၠုၚ်တေံ မွဲပသာမ္ဂး နွံအကြာ (၂၅၀၀)ဒကေဝ် နွံမံၚ်တုဲ ပ္ဍဲဂိတုနဝ်ဝေမ်ဗာ သတ္တာဟ လကြဴအိုတ်ဏံဂှ် ဆက်တိုန်အာစဵုကဵုအကြာ (၇၀၀၀)ဒကေဝ်ရ။
ၚုဟ်ဇဗၠုတၞးဂှ် အတိုၚ်အကာဲအရာ ပရေၚ်ဂီုကၠီု ဟိုတ်နူဟွံဂံၚ်ၜှ်ပလှ် တၞးဇဗၠုပ္ဍဲကၠအ်နွံဒၟံၚ် အကြာဂြိုပ်တအ်တုဲ တၞးဇဗၠုတိတ်အောန်ကြဳစှ်ေကၠုၚ်ဒၟံၚ်ကီု ကာလလၟုဟ်ဏံလေဝ် ဒှ်အခိၚ်ဇဗၠုတၞးတိတ်အောန်ဂှ်ရ ၚုဟ်မးက္ဍၚ်တိုန်ကၠုၚ် နူအခိၚ်ကၠာတေံရ။
စပ်ကဵုအကာဲအရာ ၚုဟ်မးဇဗၠုတၞး က္ဍၚ်တိုန်ကၠုၚ်ကရပ် ၃ ဂအုမ်တုဲ ဒေၚ်သွံရာန်ဇဗၠုမွဲတၠဂှ် ဟီုဂးကၠုၚ်သာ်ဏံရ။
“အကာဲအရာဟွံညိၚ်ဝတ် ဒှ်ဒၟံၚ်တှ်ေ ဟွံဂံၚ်ၜှ်ပလှ် ပ္ဍဲကၠအ်ဂြိုပ်ရပုဟ်လေဝ်။ ဒၟာနူဂှ်ရ ကၠအ်ပ္ဍဲဂြိုပ်လ္ၚဵုဂှ် မဒးလဝ်ကျာ ဃောကသီုတုဲကၠုၚ် သရိုဟ်လဝ်ဂှ်လေဝ် ဟွံဂွံကလေၚ်ပလေဝ်လဝ်ရ။ ဖေက်မံၚ်ညးသ္ကအ်ရ။ ဂုဏ်နူဂှ်ရ ဇဗၠုဂှ် ၜိုတ်ကရပ်ဇိုၚ်ကွာန်ရ ဂွံၜှ်ဏောၚ်ဟီုတှ်ေ ဇဗၠုဂှ် အောန်အာကွေံကွေံရ။ ဨဂှ်တှ်ေ ၚုဟ်တိုန်အာညိညိရ။ ဟွံတိတ်ဗီုကဵု အရိုဟ်ဟ်တွဵုဏီ၊ အခိၚ်ဏံ တိတ်အောန်မံၚ်ရ။ လၟုဟ်မှ ဆဂွံလုပ်ဂိတုမြေက္ကသဵုညိကီုဂှ်။ မာ်လောန်အာတုဲတှ်ေ အခိၚ်ဍေံတိတ်ဂၠိုၚ်ရ။ ကၠာတေံ နူကဵု (၂၅၀၀)ဂှ် ဒှ်(၅၀၀၀)။ နူကဵု(၅၀၀၀)ဂှ် ဒှ်အာ(၆၄၀၀)၊ လၟုဟ်ဏံဂှ် ဒှ်အာၜိုတ်(၇၀၀၀) ရ။ ၚုဟ်တၞးဇဗၠု တိုန်ဂှ် တိုန်အာကွေံကွေံဟဂှ်ရ” ဂှ် ဟီုလဝ်ရ။
ပါဲနူဏံပၠန် ၜိုန်ရၚုဟ်ဇဗၠုတၞး ဆက်တိုန်ကၠုၚ်မံၚ်ကီုလေဝ် သၟာၜှ်ဇဗၠုပ္ဍဲကဵုကွာန်တအ်ဂှ် ဟိုတ်နူအောန်စှ်ေကၠုၚ်တုဲ ၜိုတ်နွံပၟိက် ၜိုန်ရၜှ်သွံ ဟွံမာန်ကီုလေဝ် ပ္ဍဲဗွဝ်ဖျာဂှ် ဟိုတ်နူမၞိဟ်သုၚ်စောဲဇဗၠု ဂၠိုၚ်ဒၟံၚ်တုဲ ဇြဟတ်ရာန်ဂှ် သၠုၚ်ဒၟံၚ်ရောၚ် ဂွံတီကေတ်ရ။
မွဲလပါ်ပၠန်ဂှ် ညးတဵုလွဳဇဗၠုတအ်ဂှ် ကြဴနူဒပ်ပၞာန်သီအဝဵုတုဲ ဝါဲဓာတ်ဒးစုတ်ကီု သီုကဵုၚုဟ်မးကၠေၚ်စက် က္ဍၚ်တိုန်ကၠုၚ်မံၚ် ဂၠိုၚ်ကဵုချတုဲ ညးတဵုလွဳတအ် အောန်စှ်ေကၠုၚ်ရ။
ပ္ဍဲတွဵုရးဍုၚ်မန်ဂှ် တဵုလွဳဒၟံၚ်ဇဗၠု ပ္ဍဲပွိုၚ်ဍုၚ်ကျာ်ထောဝ် ကဵု ပွိုၚ်ဍုၚ်ၜဳကလေၚ် အဓိကတုဲ ဇဗၠုတိတ်ကၠုၚ်ဂှ် ပလံၚ်ဗစိုပ်သွံတြးဒၟံၚ် ပ္ဍဲရး ကေုာံပွိုၚ်ဍုၚ်လ္ၚဵုတအ်ရ။
ပရိုၚ် – သြၚ်လောန်တိုၚ်(မ်)