မတ်မလီု၊ နဝ်ဝေမ်ဗာ(၂၇)
ကံၚ်ဇြဳပၞာန်သီအဝဵုဂှ် ညံၚ်ကမၠောန်ပရေၚ်ပိုန်ဒြပ် အဇာဍောတ်၊ အဇာဍောတ် ကေုာံ အဇာလဒေါဝ်(MSME) ကဏ္ဍပံၚ်နှဴ ဂွံဖောအ်ဗြေဝ်တဴတက် ပရေၚ်ရေၚ်တၠုၚ်ဒၟံၚ်ဂှ် ဟိုတ်နူတၞဟ်ခြာမံၚ်ကဵု အကာဲအရာပ္ဍဲဗလးတိတုဲ ဟွံဒှ်ကမၠောန်ရဂှ် တၠပညာပရေၚ်ပိုန်ဒြပ် ကေုာံ ညးတၠကမၠောန်ဂမၠိုၚ် ပါ်ပါဲကၠုၚ်ရ။
သွက်ဂွံသၠုၚ်ပတိုန် ပရေၚ်ပိုန်ဒြပ်ကၟိန်ဍုၚ် ဒက်ပတဴလဝ်ကဵု သြန် ၄၀၀ ဗဳလဳယျာန်ဒကေဝ်တုဲ ပ္ဍဲတုဲကၠုၚ် အခိၚ်ဟွံလအ်ဏံဂှ် ထပ်ဒက်ပတဴအာ သြန်ဂအုံပရေၚ်ဖောအ်ဗြေဝ်တဴတက် ကမၠောန်အဇာဍောတ်၊ အဇာဍောတ် ကေုာံ အဇာလဒေါဝ်ရောၚ်ဂှ် တုဲကၠုၚ်ဂိတု နဝ်ဝေမ်ဗာ ပ္ဍဲစၟတ်တ္ၚဲ (၂၄) ဂှ် ကံၚ်ဇြဳပၞာန် ဟီုသ္ဂးကၠုၚ် ပ္ဍဲကောံဓရီုကဝ်မယှေန်ဘဏ္ဍာ မကၠောန်ဗဒှ် ပ္ဍဲနေပျဳတဝ်ဂှ်ရ။
က္ဍိုပ်သ္ကိုပ်ကံၚ်ဇြဳပၞာန်ဂှ် ညံၚ်သ္ဂောံက္လိဂွံ သြန်လုပ်ကၟိန်ဍုၚ် ဒးကဵုဇြဟတ်ရေၚ်တၠုၚ်အာ ကမၠောန်ပရေၚ်ပိုန်ဒြပ် သ္ပသ္ဇိုၚ်ကဵုပရေၚ်ကၠောန်ပ္တိတ်ဗၞိက်တုဲ နူကဵုဒဒှ်ဗၞိက်ပၠုပ် ကပေါတ်သုၚ်စောဲသ္ဇိုၚ်မၞိဟ် ဒှ်တၚ်နွံပၟိက်ပ္ဍဲဍုၚ်ဂှ် ကၠောန်ပ္တိတ် ညံၚ်တၚ်နွံပၟိက် ပ္ဍဲဍုၚ် ဂွံပေၚ်မာန်တုဲ စဵုကဵုစိုပ်ဒဒှ် ဗၞိက်ပလံၚ်မာန် ဒးရုန်ဂစာန်ရေၚ်တၠုၚ်အာရောၚ် သ္ဂးလဝ်ရ။
က္ဍိုပ်သ္ကိုပ်ကံၚ်ဇြဳပၞာန်ဂှ် ကပေါတ်ဗၞိက် တိတ်ကၠုၚ်နူကမၠောန် MSME ဂှ် သွက်ဂွံရေၚ်တၠုၚ် ညံၚ်ဂွံပလံၚ်ပတိတ် ဍုၚ်သ္အာၚ်မာန် ၜိုန်ရဟီုသ္ဂးမံၚ်ကီုလေဝ် ပ္ဍဲဗလးတိဂှ် ၜိုတ်ပၟတ်ဓာတ်လလဳဟေၚ် ကဵုကၠုၚ် ပ္ဍဲအခိၚ်ဍာံဍာံဟွံမာန်ဏီရ။
ညးတၠကမၠောန်ဇိၚ်ဂတှ်ေမွဲတၠဂှ် ကြဴနူဒပ်ပၞာန်သီအဝဵုတုဲ ပၟတ်အခိၚ်ဟွံဍာံကီု၊ ၚုဟ်မးဗၞိက်အပြောံ က္ဍၚ်တိုန်ကၠုၚ်မံၚ် ဂၠိုၚ်ကဵုချကီုဂှ်ရ သွက်ကမၠောန်ဂွံဆက်အာ ဒးရုန်ဂစာန်ဒၟံၚ် အိုတ်အစောန်ရဂှ် ဟီုသ္ဂးလဝ်ရ။
“ပၟတ်ဟွံကၠုၚ်တှ်ေ ကမၠောန်လအ်လ နွံကၠုၚ်ရ။ မွဲလပါ်ပၠန်လေဝ် ၚုဟ်မးဗၞိက်ဂှ် တိုန်ကၠုၚ်၊ ပၟတ်လေဝ် ပိုတ်ကၠုၚ်ဟီုတှ်ေ စက်ပၟတ်ကဵု ၚုဟ်ဗၞိက်ပံၚ်တုဲ ဍဵုဍိုက်မံၚ် သက်ဂွံဟွံမွဲရ။ ပၟတ်ပိုတ်ဒၟံၚ်ကီု၊ ၚုဟ်မးဗၞိက်က္ဍၚ်တိုန်ကီု ပရဲဂှ် အောန်စှ်ေကၠုၚ် ကွေံကွေံရ။ ၜိုတ်လဵုဒှ်ကၠုၚ်ရောတှ်ေ ဂိတုလ္ၚဵုဂှ် ညံၚ်ကမၠောန်ဂွံဒတူလာၚ်အာမာန် ဒးရုန်ဂစာန်တၟာကလှ်ေရ။ ညံၚ်ဂွံကဵု သြန်ဂိတုကဵု သၟာကမၠောန်မာန် ညံၚ်ကမၠောန်ဂွံဂေတ်အာမာန် ဒရုန်ဂစာန်မံၚ်အိုတ်အစောန်ရ” ဂှ် ညးဟီုလဝ်ရ။
ပ္ဍဲကၟိန်ဍုၚ်ဗၟာ ကြဴနူဒပ်ပၞာန်သီအဝဵုတုဲ ပရေၚ်ပၟတ်လလဳပိုတ် က္တဵုဒှ်ဒၟံၚ် ကၠေတ်ကၠုၚ်တုဲ ပ္ဍဲပွိုၚ် ၂၄ နာဍဳဂှ် နူကဵုက္လိဂွံမံၚ်ပၟတ် ပွိုၚ် ၅ နာဍဳဓဝ်ဂှ် လၟုဟ်ဏံ မွဲတ္ၚဲမ္ဂး က္လိဂွံမံၚ် အကြာပွိုၚ်ၜိုတ် ၂ နာဍဳကဵု ၃ နာဍဳဟေၚ်ရ။
သ္အာၚ်နူဏံပၠန် ဟိုတ်နူပရေၚ်သြန်ဖောဝ် မဒှ်ဖိုလ်အဆက် ပရေၚ်သီအဝဵုတုဲ ဟိုတ်နူဒဏ် ကၠေၚ်စက်ကီု သီုကဵုၚုဟ်မးဗွဝ်ဖျာ က္ဍၚ်တိုန်ကၠုၚ်တုဲ ကမၠောန် MSME ဂမၠိုၚ် စိုပ်ဒၟံၚ်အကာဲအရာ ကလေၚ်ဗြေဝ်တိုန်ဟွံမာန်ရ။
ညးတၠကမၠောန် ပရေၚ်လွဳလွတ်မွဲတၠဂှ်မ္ဂး ပ္ဍဲအကြာအကြေပ်အဂြတ် ပရေၚ်ဍုၚ်ကွာန် ဟိုတ်နူပရေၚ်ပိုန်ဒြပ် ဟွံပြေပြံၚ် နွံကၠုၚ်ဒၟံၚ်တုဲ ပ္ဍဲပရေၚ်ဓလိုက်တမ်ရိုဟ် ဟိုတ်တၚ်နွံပၟိက် နွံကၠုၚ်ဒၟံၚ်ဂှ်ရ ယဝ်ရဂွံကၠုၚ်ပရေၚ်ထံက်ပၚ် နူကဵုကၟိန်ဍုၚ်မ္ဂး ခိုဟ်တိုန်ကၠုၚ်မာန်ဏောၚ် သ္ဂးရ။
“တၚ်ခက်ခုဲဂှ် နွံဖအိုတ်ရလေဝ်။ မုဒှ်ဒှ်ရ ကၠောန်မှ၊ ပတိတ်ဇြဟတ်ညးသ္ကအ်မှ အလဵုအသဳ ဂွံကဵုကၠုၚ် ပရေၚ်ဓလိုက်တမ်ရိုဟ် မာန်ဏောၚ်ဟီုတှ်ေ အလဵုအသဳလဵုတိုန်န်ရ။ ပရေၚ်ဓလိုက်တမ်ရိုဟ် ပ္ဍဲသ္ဇိုၚ်သၟဝ်ဂှ် ဟွံဇၞော်မောဝ်ဒၟံၚ် ညံၚ်ကဵုကၟိန်ဍုၚ်ညးတၞဟ်ဂှ်ရ အလဵုအသဳလဵုတိုန်န် ထံက်ပၚ်ကဵု တၚ်နွံပၟိက်ဂှ်ဏောၚ်တှ်ေ တၠကမၠောန်ဍောတ်တ်တအ်လေဝ် ဂွံကၠုၚ်ဇြဟတ်ညိညကီုရ။ ယဝ်ရဂွံမာန်တှ်ေ ခိုဟ်ရလေဝ်” ဗီုဏံ ညးဟီုလဝ်ရ။
က္ဍိုပ်သ္ကိုပ်ပၞာန်ဂှ် ပ္ဍဲသၞာံဘဏ္ဍာ ၂၀၂၂-၂၀၂၃ ကေုာံ သၞာံဘဏ္ဍာ ၂၀၂၃-၂၀၂၄ ကၠုၚ်စိုပ်ဏံ သွက်ဘဝပရေၚ်မၞိဟ် ပရေၚ်ပိုန်ဒြပ် ညးဍုၚ်ကွာန်တအ် ဂွံကလေၚ်ဇၞော်မောဝ် တဴတက်တိုန်ကၠုၚ်ပြဟ်ဟ်မာန် ဒးကဵုဇြဟတ်သၠုၚ်ပတိုန်အာ ပရေၚ်တဵုလွဳ ကေုာံကမၠောန်ပရေၚ်ဖောအ်ဗြေဝ်တဴတက် ဒေသကွာန်ရးရောၚ် ဟီုသ္ဂးကၠုၚ်ပၠန်ရ။
တၠပညာပရေၚ်ပိုန်ဒြပ်မွဲတၠဂှ် ညံၚ်ကမၠောန်MSME ဂမၠိုၚ် ဂွံကလေၚ်ဖောအ်ဗြေဝ်ကၠုၚ်ဟီုတှ်ေ ဟွံစဵုဒၞာကဵုပဝ်လသဳတုဲ ညံၚ်ပရေၚ်ဍုၚ်ကွာန် ဂွံညိၚ်ဝတ် ထေက်ကဵုဒးရေၚ်တၠုၚ် ကၠာရောၚ်ဂှ် ထံက်ထ္ၜးလဝ်ရ။
“ဍာံဍာံတေံ အရာကဵုဖျုန်တုဲဒးကၠောန်ဂှ် ပရေၚ်ညိၚ်ဝတ်ပ္ဍဲဗလးတိ ကဵုဖျုန်ကၠာအိုတ်တုဲ ဒးကၠောန်ကဵုဏောၚ်။ သှ်ေနူဂှ်ဂှ် ယဝ်ဟွံကဵုကၠုၚ် ပရေၚ်ပလာပ်ပထုဲတှ်ေ ဂွံရ။ မုလေဝ် သွက်ဂွံဒးဖအုံကဵု ရုံရုံဂပ်ပ် ပၟိက်ဟၟဲပုဟ်။ မုဒှ်ရောတှ်ေ ဗွဝ်ဖျာဂှ် ဘာသာဍေံကဵုဍေံ ကၠောန်အာကေတ်တ်ရ။ ဘာသာဍေံ ဍေံဂၠာဲအာကေတ်ရ။ ယဝ်ရအလဵုအသဳ ထ္ၜၚ်ပတိုန်ကဵု ပဝ်လသဳမာန်တှ်ေလေဝ် သာတုဲခိုဟ်ရ။ ဟီုတှ်ေ သွာၚ်ပဝ်လသဳဏံ ပၟိက်ဇၞော်မံၚ်ရ။ ဆဂးဂှ် ပၟိက်ဇၞော်လတူနူဂှ်ဂှ် အကာဲအရာလၟုဟ် ကဵုဖျုန်တုဲ ဒးကၠောန်ကဵုပရေၚ်ညိၚ်ဝတ်ဏောၚ်။ ပရေၚ်ညိၚ်ဝတ်ဟွံမွဲတှ်ေ ညးလဵုလေဝ် ဟွံဂံၚ်ကၠောန် ပရေၚ်ပိုန်ဒြပ်ပေၚ်ၚ်ပုဟ်။ ဒှ်မံၚ် ဗီုပြၚ်ဏံရ” ဂှ် ညးဟီုလဝ်ရ။
ပ္ဍဲကၟိန်ဍုၚ်ဗၟာဂှ် အတိုၚ်သၞောဝ်ဥပဒေ ကမၠောန်ကွတ်စက်ပုဂ္ဂလိက ပ္ဍဲကဵုကမၠောန်ပတိုန်လဝ်အခေါၚ် ဂမၠိုၚ်ဂှ် ကိတ်ညဳကဵု တၚ်စၟတ်သမ္တီကမၠောန် MSME ဂမၠိုၚ်ဂှ် ၄၅၀၀၀ ပြၚ်နွံတုဲ ကမၠောန်ပတိုန်လဝ်အခေါၚ် ပ္ဍဲဌာနဝန်ဇၞော်တၞဟ်သ္အာၚ် ၂၅၀,၀၀၀ ပြၚ်လေဝ် နွံဒၟံၚ်ဏီရ။
ဆဂးဂှ် ကြဴနူဒပ်ပၞာန်သီအဝဵုတုဲ ကမၠောန် MSME တအ်ဂှ် သွက်ဂွံဗ္ဂေတ်အာ ကမၠောန်မာန်ကီု သွက်ဂွံဆက်တန်တဴအာ ဍာ်ဇမၠိၚ်မာန်ကီုတုဲ ပရေၚ်ထံက်ပၚ် သွက်သြန်ဂၠေံလဝ်ကီု သီုကဵုတၚ်နွံပၟိက်တၞဟ်သ္အာၚ်လေဝ် နွံဒၟံၚ်ပၟိက်ရဂှ် တၠပညာ ပရေၚ်ပိုန်ဒြပ်ဂမၠိုၚ် ထံက်ထ္ၜးလဝ်ရ။
ပရိုၚ် – သြၚ်လောန်တိုၚ်(မ်)