မတ်မလီု၊ နဝ်ဝေမ်ဗာ (၂၈)
ဗွဲကြဴဒပ်ပၞာန်သီအဝဵု ကၟိန်ဍုၚ်ဗၟာတုဲ ညးမကလိလောန်လဝ် ဂဗုတ်ပလီုကောန်သမ္ဘာဂစိုတ်လဝ် ကုကောန်ၚာ်သၟတ်တံ မပါလုပ် သီုညးဗြဴတံဂှ် ဒးဒုၚ်ကဵုဒုဟ် ကေတ်အရေဝ် ဟွံမွဲဏီပုဟ်ဂှ် ကံၚ်ဇြဳကဵုကသပ်ဂၞန်ညဳသၟဟ်ဂကူ NUCC လလောၚ်ပ္တိတ်လဝ်ပရိုၚ်ရ။
စနူဂိတုနဝ်ဝေမ်ဗာ (၂၅) တုဲကၠုၚ်တေံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ် နဒဒှ်တ္ၚဲချဳဒရာၚ် ထပိုတ်ရိုဟ်ကၞက် ပွပကီုပရာပ် ဒုၚ်သ္ဇိုၚ် လ္တူတြုံ၊ ဗြဴ ပွိုၚ် (၁၆) တ္ၚဲရ။
နကဵုဂကောံဇြဟတ်ပၠန်ဂတးတံ ဗ္တိုက်ပ္တိတ် သီုသၞောတ်တၠအဝဵုပၞာန် ဝါဒကၟက်မအုပ်ဓလီုဒၟံၚ်ဂှ်ကီု သီုကဵုဇၟာပ်ပ်သၞောတ်တၠအဝဵုတံဂှ်တုဲ သွက်ဂွံဒက်ပ္တန်အာ သၞောဝ်ဖေဝ်ဒရာ မဒုၚ်လျိုၚ်ကဵု ကဆံၚ်တုပ်သၟဟ်မာန်ဂှ် ပရေၚ်ပါလုပ်သ္ကိုပ်သ္က ညးဗြဴတံဂှ် NUCC ရှ်ေသှ်ေသ္ပသမ္တီဂှ် လလောၚ်ပ္တိတ်လဝ်ရ။
ပ္ဍဲတၚ်လလောၚ်တြး NUCC ဂှ် အလုံကၟိန်ဍုၚ်မွဲ ဒဵုကဵုအခိၚ်လၟုဟ် ဒပ်ပၞာန်တံ ကလိလောန်ဒၟံၚ် ဂဗုတ်ပလီုကောန်သမ္ဘာ မပါလုပ် သီုကဵုပွပကီုပရာပ် စပ်ကဵုလိၚ် လ္တူညးဗြဴ ကေုာံ ကောန်ၚာ်သၟတ်တံ နဒဒှ်လွဟ်လက်နက်မွဲသာ်ဂှ် ထ္မံက်ထ္ၜးလဝ်ရ။
သ္အာၚ်နူဂှ်ပၠန် ကံၚ်ဇြဳပၞာန် မကလိလောန်ဒၟံၚ် ဒုဟ်ဒဏ်တံဝွံ ဟိုတ်နူကလိဂွံဒၟံၚ် အခေါၚ်ဗၠးနူဒုဟ်ဒဏ်ဂှ်ရ နကဵုဂကောံဗွိုၚ်ဍုၚ်သ္အာၚ်တံလေဝ် သွက်ဂွံကေတ်ကဵုအရေဝ်ဂှ် အာတ်မိက်ရောၚ် သ္ဂးရ။
ဂကောံဂအုပ်ညးဗြဴဂမၠိုၚ် (ဍုၚ်ဗၟာ) WOMEN’S LEAGUE OF BURMA (WLB) ဂှ် ကြဴနူဒပ်ပၞာန်သီအဝဵုတုဲ စဵုကဵုဂိတုနဝ်ဝေမ်ဗာ (၂၅) ဏံဂှ် ဂဗုတ်ပကီုပရာပ် အပ္ဍဲသ္ၚိ (၁၁) ဂဗုတ်၊ ဂဗုတ်ပလီုကောန်သမ္ဘာ ကောန်အရာပ် မကလိလောန်တံဂှ် (၁၄) ဂဗုတ် ကေုာံ ဂဗုတ်ပလီုကောန်သမ္ဘာ ဒပ်ပၞာန် မကလိလောန်လဝ်တံဂှ် ဟွံအောန်နူကဵု (၁၆) ဂဗုတ် နွံရောၚ် လလောၚ်ပ္တိတ်လဝ်ရ။
အပ္ဍဲအခိၚ်ကာလသီအဝဵုဂှ် ကံၚ်ဇြဳပၞာန် ဂစိုတ်လဝ် ညးဗြဴ (၃၀၈) တၠတုဲ ညးဗြဴ (၃၄၃၄) တၠဂှ်လဝ် ရပ်ဒက်လဝ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)