တၚ်သၟာန်သွဟ်ကေုာံ ကိုဝ်မျေတ်သဵု ညးနွံအခေါၚ်ဟီုဂး ဌာန်ကောံသၟတ်မန် (MYF)

ဌာန်ကောံသၟတ်မန်(MYF) ဂှ် ပရေၚ်ဍုၚ်ကွာန်၊ ပရေၚ်ပညာ၊ ပရေၚ်လိက်ပတ်ယေန်သၞာၚ်၊ တန်ဗ္တောန်ပွမသၠုၚ်ပတိုန် စရာဲဍာ်ဒကေဝ် သၟတ်မန်ပ္ဍဲဒေသတအ်ကီု သီုဒှ်ဂကောံ ကၠောန်ဗဒှ်ဒၟံၚ် ညံၚ်ဂွံဓမံက်ရုပ်ရဴ မူဝါဒသၟတ်မွဲဂကောံရ။ ဟိုတ်ဂှ်ရ ကြဴနူဒပ်ပၞာန်သီအဝဵုတုဲ ပ္ဍဲအရာရေၚ်တၠုၚ် ကိစ္စဆေၚ်စပ်ကဵုသၟတ်ဂှ် သာ်လဵုဒးဆေၚ်ဒၟံၚ်မုက်ကဵု တၚ်ခက်ခုဲသာ်လဵု။ နူလပါ်ကံၚ်ဇြဳပၞာန် ကၠုၚ်စိုပ်ဗဒေါံတာဒၞာကၠုၚ် နွံဒၟံၚ်ကီုဟာ။ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ် ကေုာံကိုဝ်မျေတ်သဵု ညးနွံအခေါၚ်ဟီုဂး ဌာန်ကောံသၟတ်မန် (MYF) ရ။

-ကၠာအိုတ်ဏံ အခိၚ်လၟုဟ် နကဵုဌာန်ကောံသၟတ်မန် (MYF) မုကၠောန်ရေၚ်တၠုၚ်ဒၟံၚ်ကမၠောန် သာ်လဵုရော။

သၟတ်မန် နွံပ္ဍဲပွိုၚ်ဍုၚ်တအ် ညံၚ်ဇြဟတ်ဂွံခိုဟ်တိုန် ခိုဟ်တိုန်ဟီုဂှ် နွံၜါကဏ္ဍရ။ ပ္ဍဲပွိုၚ်ဍုၚ်လ္ၚဵုတအ်ဂှ်တှ်ေ ဂကောံသၟတ်ကဆံၚ်ပွိုၚ်ဍုၚ် ဟၟဲဏီလေဝ် နွံရ။ ညံၚ်ဂွံနွံကၠုၚ် ပိုဲစန်ဒက်တုဲ ဒက်ပ္တန်ကဵုတၟိလေဝ် နွံ။ ပ္ဍဲပွိုၚ်ဍုၚ်လ္ၚဵုဂှ်တှ်ေ နွံဒၟံၚ်တုဲတုဲဂှ် ညးတအ်ဒှ်ဒၟံၚ် ညံၚ်ကလေၚ်ပြးအာညးသ္ကအ် နွံမံၚ်ရ။ ဗီုဏံတှ်ေ ကလေၚ်ပကောံကဵုရ။ ညံၚ်ဂွံကလေၚ်စိုပ် အကာဲအရာ ဗီုအခိၚ်ကၠာတေံမာန် စန်ဒက်ကဵု ညးတအ်ရ။ ဒက်ပ္တန်ကဵုလေဝ် နွံရ။ ပ္ဍဲပွိုၚ်ဍုၚ်လ္ၚဵု နွံမံၚ်ဂှ် ဂကောံသၟတ်ကဆံၚ်ပွိုၚ်ဍုၚ် နွံမံၚ်။ ပံၚ်တောဲကဵု ဂကောံနွံမံၚ်ဂှ်တုဲ ဓမံက်ရုပ်ရဴ ရေၚ်တၠုၚ်ဒၟံၚ်မွဲစွံလေဝ် နွံရ။ ပိုဲအာဒၟံၚ် နကဵုဗီုပြၚ်ဏံရ။

-ပ္ဍဲအရာရေၚ်တၠုၚ်ကိစ္စပရေၚ်သၟတ်မန်ဂှ် ဒးဆေၚ်ဒၟံၚ်မုက်ကဵု တၚ်ခက်ခုဲ ဗီုလဵုရော။ တုဲပၠန် ပ္ဍဲလတူကံၚ်ဇြဳပၞာန် ခၞံဗဒှ်ကၠုၚ် သၞောဝ်သွက်ဂွံ ပတိုန်စရၚ်စၟတ်သမ္တီဂကောံတုဲ ဗီုလဵုဒးဆဵုဂဗဒၟံၚ်ကဵု ခက်ခုဲရော။

စပ်ကဵု ပရေၚ်ပတိုန်စရၚ်ဂကောံဍေံတအ်တုဲ ယဝ်ရအာ အတိုၚ်ဂၠံၚ်တရဴလုပ်သၞောဝ်ဍေံတအ်တှ်ေ ခက်ခုဲဇၞော်ကဵုဇြဟတ် နွံရ။ ကိစ္စပတိုန်စရၚ်ဂကောံဂှ်တှ်ေ ပိုဲသဳကၠဳဖျေံလဝ်သ္ဂုတ်သွာတ် ဟၟဲဏီရ။ လကြဴတှ်ေ ဗီုလဵုကၠုၚ်ပၠန်ရောဂှ် ဟွံတီရ။ ပ္ဍဲမွဲကာလ စှ်ေပရေၚ်စန်ဒက်ဏံဂှ် သ္ပဂရုတုဲ ဒးအာဒၟံၚ်ရ။ မုဒှ်ရောတှ်ေ ပိုဲဂှ် ပါလုပ်လပါ်စကစလေဝ်ဟွံသေၚ် ပိုဲပံၚ်တောဲကဵု ဂကောံတၞဟ်တုဲ ထံက်ပၚ်တုဲ ကၠောန်သ္ပဒၟံၚ်ဟွံသေၚ်ပုဟ်။ ပိုဲကၠောန်ဒၟံၚ်အဓိကဂှ် ဒှ်လၟေၚ်ကမၠောန်အဓိက သွက်တွဵုရး ဍုၚ်မန်ပိုဲဟေၚ်ရ။ မ္ၚးနူဏံကိစ္စဆေၚ်ကဵု ပရေၚ်ဂီုကၠီုတုဲ မုလေဝ်ပိုဲရေၚ်တၠုၚ်ကၠုၚ်လဝ်ဟၟဲရ။ ဗီုလဵုဂွံပရော။ တၚ်ခက်ခုဲ ဒၞာဲဏံဂှ်တှ်ေ ပ္ဍဲကဵုအကာဲအရာ ဗီုလၟုဟ်ဏံဂှ် ဒးအာဒးကၠုၚ်မံၚ်ဂှ် ဒှ်တၚ်ကော်ချဴ သွက်သၟတ်ပိုဲဒးဆဵုဂဗ ဇၞော်ကဵုဇြဟတ်မာန်ရဂှ် အဲညာတ်ကေတ်ရ။ ပိုဲ ပါလုပ်ဆေၚ်ဆက်မံၚ်ကဵု ဍေံတအ်တၞဟ်သ္အာၚ်ဂှ်တှ်ေ မုဟၟဲပုဟ်။ ဍေံတအ်ကၠုၚ်စိုပ် ကဵုကၠုၚ်ပိုဲပရိုၚ်ဂှ် ဟၟဲလဝ်ဏီရ။ အရၚ်ဏံဂှ် ပိုဲလေဝ် ချပ်ဇန်လဝ် ဟၟဲလဝ်ဏီရ။

-ပ္ဍဲအရာရေၚ်တၠုၚ် ကိစ္စပရေၚ်သၟတ်ဂှ် နူလပါ်ကံၚ်ဇြဳပၞာန်ကၠုၚ်စိုပ် ဆေဝ်ဒဝ်တာဒၞာကၠုၚ် နွံကီုဟာ။ ဒးဆေၚ်ဒၟံၚ်မုက်ကဵု အကာဲအရာဗီုလဵုရော။

ပ္ဍဲပိုဲဂှ်တှ်ေ ဟၟဲပုဟ်။ ပိုဲပံၚ်တောဲ ကၠောန်ရေၚ်တၠုၚ်ဒၟံၚ်ရ။ ဂကောံသၟတ် နူပွိုၚ်ဍုၚ်ဏံဂှ် ပံၚ်တောဲကဵု ဂကောံမဆေၚ်စပ်တေံတုဲ ကၠောန်မံၚ်ရ။ ကဵုစကစဂှ် ပိုဲပတိုန်ထ္ၜးလဝ် ကၠုၚ်စိုပ် သၟာန်သၟုက်လဝ်ပိုဲဂှ် ဟၟဲဏီရ။

-တုဲပၠန် ကြဴနူဒပ်ပၞာန်သီအဝဵုတုဲ ပ္ဍဲအရာရေၚ်တၠုၚ် ကိစ္စဆေၚ်စပ်ကဵုသၟတ်ဂှ် ဒးဆဵုဂဗဒၟံၚ်ကဵု တၚ်ကော်ချဴဗီုလဵုရော။

တော်ကဵု အခိၚ်ကၠာတေံတှ်ေ ပရေၚ်ပြိုၚ်ပ္ကာန်ပိုဲ နွံကၠုၚ်ဗွဲမဂၠိုၚ်ရ။ မုဒှ်ရောဟီုတှ်ေ လ္ၚဵုဂှ် ဆၜိုတ်ဖန်ဇန်ပြုပြေၚ် ပရေၚ်သြန်ဓဝ်ရဂှ် ပကောံမၞိဟ်ဟွံဂွံကီု ဒၞာဲအာကၠုၚ်လောဲ ဗီုမိက်ဂွံကၠောန်ဂှ် ဟွံဂွံကၠောန်ရ။ ရံၚ်ကဵုပရေၚ်ဂီုကၠီုသၟတ်တုဲ ပ္ဍဲတိဍာ် ပရေၚ်ဂီုကၠီုနွံဂှ်ရ ပိုဲဂွံကၠောန်ကမၠောန်ရ။ တော်ကဵုကၠာတေံတှ်ေ တၚ်ကော်ချဴသွက်ပိုဲ အခိၚ်ဟွံရုဲ နွံကၠုၚ်မာန်မံၚ်။ တော်ကဵုအခိၚ်ကၠာတေံတှ်ေ တၚ်ခက်ခုဲပိုဲနွံဒၟံၚ်ရ။

-ပ္ဍဲအခိၚ်လကြဴဏံ တွဵုရးဍုၚ်မန်ကီု သီုကဵုဒေသ ကောန်ဂကူမန်တအ် နွံဒၟံၚ်လ္ၚဵုဂှ် ပေါဲဗတိုက်က္တဵုဒှ်ကၠုၚ်နွံတုဲ ဗီုပြၚ်လဵု ရေၚ်တၠုၚ်မံၚ်ကိစ္စ ဆေၚ်ကဵုပရေၚ်သၟတ်တအ်ရော။

ရံၚ်ကဵုအကာဲအရာတုဲ အခိၚ်စဒှ်ပေါဲဗတိုက်တှ်ေ ပိုဲပါဲဓလေတ်ရ။ အခိၚ်သှ်ေနူဂှ်တှ်ေ ဟွံပါဲရ မုဟိုတ်ရောတှ်ေ ရံၚ်ကဵုပရေၚ်ဇၞော်မောဝ်သၟတ် ကမၠောန်ပိုဲ ထေက်ကဵုဒးကၠောန်ဂှ်တုဲ ပရေၚ်စန်ဒက် ဒေါံဟွံဂွံတုဲ ဒးကၠောန်ကဵုဒှ် အဇဳဇန်သၠုၚ်ပ္တိုန် စရာဲဍာ်ဒကေဝ်ညးတအ် ဒေါံဟွံဂွံဒးကၠောန်ရ။ ပ္ဍဲအခိၚ်ပိုဲဓမံက်ဒၟံၚ်ရုပ်ရဴဂှ် ယဝ်ရပေါဲဗတိုက် ဒှ်ကၠုၚ်ဏောၚ်တှ်ေ ဒးဒေါံဇူလဝ်ရ။ ပြံၚ်ကၠောံအာ ဒေသတၞဟ်ထေက်တှ်ေ ဒးပြံၚ်ဏောၚ်။ အဇဳအဇန်ဂှ်တှ်ေ ဟွံပလီုထောံပုဟ်။ ၜိုတ်ကၠောန်ဂွံဂှ်တှ်ေ ကၠောန်အာဏောၚ်။ ညံၚ်ဂွံဇီုကပိုက် လပါ်လဵုလေဝ် ဟွံကၠောန်ပုဟ်။ ဗီုပြၚ်စကစကၠောန်မံၚ်ကီု ကမၠောန်ဂကောံပၠန်ဂတးတအ် ကၠောန်မံၚ်ကီု ပိုဲဟွံဒစဵုဒစးပုဟ်။ ဗီုပြၚ်ဍေံတအ်ကၠောန်ဂှ် ကဵုဍေံတအ်ကၠောန်။ ကမၠောန် သွာၚ်ပိုဲကၠောန်ထေက်ဂှ်ရ ပိုဲအာမံၚ်ရ။ ဆဂးဂှ် လတူပရေၚ်ဂီုကၠီုတှ်ေ ရံၚ်အကာဲအရာမွဲတုဲ ကၠောန်ရေၚ်တၠုၚ်မံၚ်ရ။ ဆဂးဂှ်လေဝ် ဒေသလဵု ပသှ်ေစွံလဝ်ဟၟဲပုဟ်။ လၟုဟ်ဏံကၠောန်ဒၟံၚ် ဒၞာဲဒေသ သၟတ်မန်တအ်နွံဂှ်ရ။ ပရေၚ်ကၠောန်သ္ပဒၟံၚ်တၞဟ်လေဝ် နွံရ။ ချူဓဇက်လဝ် မူသ္ဇိုၚ်လေဝ်နွံရ။

-အလန်လကြဴအိုတ်ဏံတှ်ေ ကြဴနူသီအဝဵုတုဲ အကာဲအရာပရေၚ်ပံၚ်တောဲသၟတ်မန် ပ္ဍဲကဏ္ဍလဵု ဆက်နွံဒၟံၚ်ရော။

အရာဏံဂှ် ဒှ်အတိုၚ်ပကတိရ။ ဗွဲအစောံပိုဲတဴရူကဵု ပရေၚ်ညဳသၟဟ်သၟတ်ဂမၠိုၚ် ချိုတ်တ်ပၠိုတ်တ်ဂှ် အခိၚ်ဒးကၠောန် နကဵုတၚ်ရန်တၟံဂှ်တှ်ေ ပရေၚ်ပံၚ်တောဲသၟတ်ဒေသဂမၠိုၚ် ဇြဟတ်ခိုဟ်ဒၟံၚ်ရ။ ဆဂးဂှ် ဒှ်ဒၟံၚ်အကာဲအရာ ပိုဲအာတုဲမှ ဒးပံၚ်တောဲနွံရ။ ပိုဲကဵုတန်ဗ္တောန်မွဲမွဲတှ်ေ ဍုၚ်မတ်မလီုကဵုဒှ် ဒၞာဲအာကၠုၚ်လောဲတၞဟ်ကဵုဒှ် ပ္ဍဲညးတအ် အကာဲအရာကၠုၚ်စိုပ် ဇရေၚ်ပိုဲမာန် နွံမံၚ်ရ။ အကာဲအရာလၟုဟ်ဏံဂှ်တှ်ေ ဗီုဏံဂှ် အကာဲအရာပြံၚ်အာယျ။ ဒှ်ကၠုၚ်အကာဲအရာပိုဲဒးအာ ပ္ဍဲကဵုညးတအ်။ ဇြဟတ်ပရေၚ်ပံၚ်တောဲ ပါလုပ်ဂှ် ဟွံအောန် နူအခိၚ်ကၠာတေံရ။ ပိုဲဂှ် နကဵုက္ဍိုပ် ပရေၚ်ကောံကလောံညဳသၟဟ် အတိုၚ်တြေံဂှ်ရ ဆက်တုဲ စန်ဒက်ဒၟံၚ်ရ။ ဇြဟတ်ပရေၚ်ပါလုပ် ပံၚ်တောဲညးတအ်လေဝ် နွံမံၚ်အကာဲအရာခိုဟ်ဒၟံၚ်ရ။