ဟိုတ်နူတၚ်စၞောန် တိုက်သြန်ဗဟဵုကံၚ်ဇြဳပၞာန် သြန်ဂွံနူဗၞိက်ပလံၚ် (၆၅)တၟံကၠံ ဒးသၠာဲအတိုၚ်ၚုဟ်မးစၟတ်သမ္တီလဝ် အပ္ဍဲတ္ၚဲကၠောန်ကမၠောန် ပွိုၚ်မွဲတ္ၚဲဂှ်တုဲ ပရေၚ်ဇီုကပိုက် လတူၚုဟ်ဗွဝ်ဖျာခၜိုတ် ပ္ဍဲတွဵုရးဍုၚ်မန်ဂှ် ဇၞော်ကၠုၚ်ဒၟံၚ်ရ။ ဟိုတ်နူ တၚ်စၞောန်ကံၚ်ဇြဳပၞာန်တုဲ ၚုဟ်ခၜိုဟ် ဆုတ်ကလေၚ်စှ်ေ မွဲလစုတ်ဓဝ်ကီု ပရေၚ်ပလံၚ်ဗစိုပ်ဍုၚ်သ္အာၚ်လေဝ် က္တဵုဒှ်ကၠုၚ် စဵုကဵုကြပ်ဒးဒေါံဇူအာကီုရ။ ဟိုတ်ဂှ်ရ ကဏ္ဍခၜိုတ် ပ္ဍဲတွဵုရးဍုၚ်မန်ဂှ် အကာဲသာ်လဵု က္တဵုဒှ်ကၠုၚ်မာန်ရော။ ဟိုတ်နူတၚ်စၞောန် ကံၚ်ဇြဳပၞာန်တုဲ ပ္ဍဲလတူကဏ္ဍခၜိုတ် ကဆံၚ်လဵု ဒးဇီုကပိုက်ကၠုၚ်လဝ်ရော။ ကြဴနူပရေၚ်သီအဝဵုတုဲ စပ်ကဵုတၚ်ခက်ခုဲ ဒးဆေၚ်ဒၟံၚ်မုက် ပ္ဍဲကဏ္ဍခၜိုတ်တုဲ သၟာန်သွဟ်လဝ် ကေုာံတၠကမၠောန်ခၜိုတ် မွဲတၠရ။
-ကၠာအိုတ်ဏံ ဟိုတ်နူတၚ်စၞောန် တိုက်သြန်ဗဟဵု ကံၚ်ဇြဳပၞာန် သြန်က္လိဂွံနူဗၞိက်ပလံၚ် (၆၅)တၟံကၠံဂှ် ဒးသၠာဲပ္ဍဲပွိုၚ်တ္ၚဲကၠောန်ကမၠောန် (၁)တ္ၚဲဂှ်ရ ပ္ဍဲကဏ္ဍခၜိုတ် အကာဲအရာဗီုလဵု ဆက်က္တဵုဒှ်ကၠုၚ်ရော။
ရုၚ်စက်ပိုဲဂှ် နွံဒၟံၚ်အကာဲအရာ သာ်လဵုဟွံဂွံသွံရ။ စဵုကဵုကဝက်တၟံကၠံဂှ် ပရေၚ်သွံရာန် ဟွံဒှ်ရ။ မုဒှ်ရောတှ်ေ တအ်ဏံဂှ် ညးရာန်ကြုက်တအ်၊ ညးရာန်မလေဝ်တအ် ဍေံတအ်ရာန်မှ ဗွဝ်ဖျာ RSS(1) ပိုဲ ဂွံမံက်ကၠုၚ်ရ။ ဍေံတအ်ဟွံရာန်တှ်ေ ကၠောန်လဝ်လေဝ် ဒှ်သၟးသၟးရ။ ဟွံကိတ်ညဳကဵု ဍေံတအ်ပုဟ်ဟီုတှ်ေ ဍေံဟွံရာန်ရ။ ဒှ်ကၠုၚ်အကာဲအရာဏံရ။
-ဟိုတ်နူတၚ်စၞောန်ဗီုလၟုဟ်ဏံတုဲ အလဵုသၟာကၠအ်ခၜိုတ်တအ် ၜိုတ်လဵုဒးဆဵုဂဗကဵု တၚ်ခက်ခုဲမာန်ရော။
သၟာတဵုလွဳခၜိုတ်တအ်ဂှ်တှ်ေ ပ္ဍဲအခိၚ်ကာလ ၚုဟ်မးသီုဖအိုတ် နွံမံၚ်လ္ပာ်ဏံဂှ် စွံထောံရ – ဥပမာဍေံ။ ကောန်ကမၠောန်၊ ၚုဟ်ဝါဲ အရာအိုဿီု အခိၚ်ၚုဟ်တိုန်ဒၟံၚ်ဂှ် ခၜိုတ်မွဲဂကူဓဝ်ရ ၚုဟ်စှ်ေဂတးဒၟံၚ် စဵုကဵုသၟဝ်တေံဏောၚ်တှ်ေ သၟာတဵုလွဳတအ် ဒးဂိၜါဝါရ။ သီုညးဖအိုတ်ရ ဒးဒုၚ်စဒၟံၚ်သိုၚ်။ ခၜိုတ်ဂှ်ဒှ်ကမၠောန် အဓိကပ္ဍဲဍုၚ်မန်ဏံဂှ်ရ ကျဟောံလေဝ် ဒးကၠောန်ခၜိုတ်ဏံရ။ ပရဲတိတ်လေဝ် ဒှ်ဒၟံၚ် ဒးကၠောန်ခၜိုတ်ဏံရ။ ဒးအာမံၚ်ကဵုဣဏံ အဆက်အဆက်ဂှ်ရ ကျဟောံလေဝ် ဒးဒုၚ်ရေက်ဂၞိၚ်ရ။ ဗီုလဵုသ္ပလေဝ် အကာဲအရာဖန်ဗဒှ်ကေတ်ဂွံ ဟၟဲပုဟ်။ သၟာကၠအ်တအ်ဂှ် ဒးဒုၚ်စဒၟံၚ်သိုၚ်အဓိကရ။ အဓိကညးတအ်ဂှ် ဒးဒုၚ်ဇီုကပိုက်ဒၟံၚ် တိုက်ရိုက်ရ။
-သီအဝဵုတုဲကဵု ကၠာဟွံဂွံသီအဝဵုဏီ စပ်ကဵုအကာဲအရာ ကဏ္ဍခၜိုတ်တုဲ ယဝ်ဒးၜတ်ရံၚ်တှ်ေ အကာဲအရာဗီုလဵု ဂွံညာတ်ကေတ်ဒၟံၚ်ရော။
ရာသဳခၜိုတ် သၞာံတုဲကၠုၚ်တေံဟီုတှ်ေ ခၜိုတ်ဂှ် အတိုၚ်အကာဲအရာၚုဟ်ဗွဝ်ဖျာဂၠးကဝ်ကီု၊ အကာဲအရာဇြဟတ်ရာန်ကီု နွံဒၟံၚ်ပ္ဍဲလတူဂၠံၚ်ပကတိရ။ ပရေၚ်သွံရာန်ဂှ် ဒှ်ဒၟံၚ်အတိုၚ်ပကတိရ။ သၞာံဏံဂှ် ဟွံဒှ်အတိုၚ်ပကတိတုဲ ၚုဟ်လေဝ်စှ်ေကၠုၚ်ရ။ အခိၚ်ညးတၞဟ်ၚုဟ်တိုန်ဂှ် ဇကုစှ်ေဒၟံၚ်။ ပ္ဍဲပံက်ၚုဟ်ခၜိုတ်ဂှ် စှ်ေကၠုၚ်ၜိုတ်ထေက်ကြိုက်ရ။ ဆဂးဂှ် ယဝ်ဟွံဒးလွိုက် ၆၅ ဏံတှ်ေ ဒဵုကဆံၚ်ဏံ ဟွံဒးဂိပုဟ်။ လၟုဟ်ဏံ အာခက်ကဵုဣဏံတုဲ ညးရာန်လေဝ်ဟၟဲပၠန်တှ်ေ ခၜိုတ်ဂှ် ယာက္ဍိုပ်ဟွံမာန်ရ။
-မွဲတၚ်ပၠန်ဂှ် စပ်ကဵုတၠုၚ်လအာ ကဏ္ဍခၜိုတ်တုဲ ဗီုလဵုညာတ်ကေတ်ရော။
လၟုဟ်ဏံ ယဝ်အာအတိုၚ်ဗ္ဒပ်ဏံရတှ်ေ အဓိကဂှ် သၟာကၠအ်တအ်ရ။ သၟာဗၞိက်ဂှ်တှ်ေ ဂုဏ်ဖိုလ်နွံမှ ဍေံတအ်ကၠောန်ဏောၚ်။ သၟာကၠအ်တအ်ဂှ် ဒးဒုၚ်ရေက်ဂၞိၚ်ဏောၚ်။ ၚုဟ်စှ်ေလေဝ် သၟာကၠအ်ရဒးဒုၚ်။ သၟာဗၞိက်ဂှ် ဂြပ်ဍေံကဵုဍေံ ဂေတ်အာမာန်မံၚ်။ ဟွံကိတ်ညဳကဵုဍေံတှ်ေ ဍေံတအ်ဟွံရာန်ပုဟ်။ သၟာကၠအ်ဂှ် ဒးပတှ်ေမံၚ်ခၜိုတ်မွဲဏံရ။ GDP မန်တအ်၊ မုတအ်သီုဖအိုတ်ဂှ် ခၜိုတ်ရ ဒှ်ဒၟံၚ်သၠုၚ်အိုတ်။ ဟီုတှ်ေ သရောပ်ထောံ ကဏ္ဍခၜိုတ်ဏံသီုဖအိုတ်တုဲ ယဝ်ရဒးဟီုတှ်ေ ၆၅၊ ၃၅ ဏံ ယဝ်ဟွံယှအ်ဖျေံကဵုတှ်ေ သၟာကၠအ်တအ်ဏံ ဒးဒုၚ်ရေက်ဂၞိၚ်တွဵုရ။ ဒၟာနူဂှ်ရ အဓိကဍေံဂှ် သ္ဇိုၚ်ဝန်ဇၞော်ဏံ ကၠုၚ်ဍိုက်ဂွံဒၟံၚ် သၟာကၠအ်တအ်ရ။ တၠကၠအ်ဍောတ်တ်တအ်ဂှ်တှ်ေ တၠကၠအ်လ္ၚဵုဂှ် တီမံၚ်ရ။ ညးတအ်ဂှ် ဂွံဒၟံၚ်ဗီုပြၚ် ၚုဟ်လိၚ်တ္ၚဲကီုရ။ တၠကၠအ်ဇၞော်ဇၞော်ဂှ်တှ်ေ ဂွံဆၜိုတ်ဗီုပြၚ် ကမၠောန်ဓဝ်ရ။ တၠကၠအ်ပိုဲဂှ် ထံက်ရံၚ်ကဵုကောန်ကမၠောန်တုဲ ဟၟဲလေဝ် ဒးစကာလဝ် ကောန်ကမၠောန်ဏံရ။ သွက်ဍေံတအ်ဂွံတှ်ေ တုဲရဂးတုဲ နွံမံၚ်အကာဲအရာ အာမာန်ဒၟံၚ်ဗီုပြၚ်ဏံရ။ တၠကၠအ်ဍောတ်တ်တအ်ဂှ် သွက်ပရေၚ်စသုၚ်မံၚ်စံၚ်ညးတအ် အလဵုညးတအ်ခွာတ်ကေတ်ကေတ်၊ ခွာတ်ကေတ်ဟီုတှ်ေ အကာဲအရာဗ္ဂေတ်မာန်ရ။ ပရဲဂှ်တှ်ေ နွံမံၚ်ဏောၚ် ဟီုဟွံဂွံပုဟ်။ ဂွံဆၜိုတ်အရၚ်ဂွံစရ။
-ညံၚ်ကဏ္ဍခၜိုတ်သီုဖအိုတ် ဂွံကလေၚ်ဗြေဝ်တိုန်ကၠုၚ်မာန်ဟီုတှ်ေ ပရေၚ်ရေၚ်တၠုၚ်သာ်လဵု နွံဒၟံၚ်ပၟိက်ရော။ ပ္ဍဲလတူဏံဟီုပါ်ပါဲကဵုညိ။
ၚုဟ်ဗွဝ်ဖျာခၜိုတ်ဂှ် ကၟိန်ဍုၚ်ဟွံထိၚ်ဒက်လဝ်ပုဟ်။ ကဵုလဝ်အခေါန်သွံရာန် ဗၠးဗၠးၜးၜးရ။ ၜိုန်ဂှ်လေဝ် လတူဗၞိက်ပတိတ်ဍုၚ်မ္ၚး ပ္ဍဲလတူတၟံကၠံတိုန် ၆၅၊ ၃၅ ဂှ် ဍေံတအ်ကုတ်ဖျေံထောံဂၠိုၚ်လောန်အာတုဲ ဟွံပြေပြံၚ်ကၠုၚ်ရ။ ညံၚ်ဂွံဂေတ်အာ အတိုၚ်ပကတိတှ်ေ သၞောတ်တိုက်သြန်ဗဟဵု ၆၅၊ ၃၅ ဂှ်တှ်ေ ဒးယှအ်ဖျေံထေက်ဏောၚ် အဲညာတ်ကေတ်ရ။
-အလန်လကြဴအိုတ်ဏံ စပ်ကဵုအကာဲအရာခၜိုတ် ပ္ဍဲတွဵုရးဍုၚ်မန်တုဲ မုမိက်ဂွံထပ်ဟီု ဗပေၚ်နွံဏီရော။
အဓိကဂှ်တှ်ေ ပိုဲဂၠာဲဒၟံၚ်ဗွဝ်ဖျာရ။ ညံၚ်သၟာကၠအ်တအ် ဂွံဒှ်ဖိုလ်ဍာံဍာံတှ်ေ တုဲဒၟံၚ်ကဵုကဏ္ဍရုၚ်စက်ကဵု ပရေၚ်ကူသာန်ဗၞိက်ရ။ ရုၚ်စက်ပိုဲလေဝ် ပိုဲဂွံကၠုၚ်ပရဲဗက်ဂှ် ပိုဲကဵုသၟာကၠအ်တအ် ဂၠိုၚ်တိုန်ရ။ ကဵုဂလိုၚ်ပတိုန်ဏောၚ်တှ်ေ သၟာကၠအ်တအ် တော်စကိတ်ကၠုၚ်ရ။ ၚုဟ်ဗွဝ်ဖျာဟၟဲတှ်ေ ကဵုဂလိုၚ်ပတိုန် သၟာကၠအ်တအ်ဟွံမာန်ကၠုၚ်တှ်ေ သၟာတဵုလွဳကၠအ်တအ် လျိုၚ်ဇြိုၚ်ကၠုၚ်ရ။ ရုၚ်စက်ပိုဲဂှ် ပ္ဍဲဂကောံကမၠောန်ခၜိုတ်လေဝ် ပါလုပ်ဒၟံၚ်ရ။ တၚ်ရန်တၟံပိုဲဒက်လဝ်ဂကောံဏံဂှ် ခၜိုတ်သီုဖအိုတ်ဂှ် သွက်ဂွံကၠောန်ပ္တိတ်အာ ခၜိုတ်ကဆံၚ်သၠုၚ်ဂှ် ရန်လဝ်ရ။ အခိၚ်သၟာဗၞိက်ဍုၚ်သ္အာၚ်ကၠုၚ်စိုပ်ဂှ် ညံၚ်ဂွံကဵုအာ ဍိုက်က်ပေၚ်ၚ်မာန် ပိုဲက္ဍိုက်ကဵုက္ဍိုပ်ရ။ ကဏ္ဍပရေၚ်က္ဍိုက်က္ဍိုပ်လေဝ် သွက်ဒတုဲဖိုလ်ညးတအ်ဟေၚ်ရ။ ပြဟ်ဟ်ဏံဂှ် ဂုဏ်နူဗွဝ်ဖျာဟၟဲတုဲ ဇြဟတ်လေဝ်ဟၟဲကၠုၚ်ရ။ သွက်ကဏ္ဍခၜိုတ် ဍုၚ်ဗၟာဂွံဒတူလာၚ်အာမာန်ဂှ် ဒှ်ဗွဝ်ဖျာရ။ ယဝ်ရဖအောန်ယှအ်ဖျေံကဵု မူဝါဒတိုက်သြန်ဗဟဵု ၆၅၊ ၃၅၊ ဗၠးဗၠးၜးၜးဏောၚ်တှ်ေ ကမၠောန်ခၜိုတ် ကၟိန်ဍုၚ်ဗၟာပိုဲကီု၊ သွက်ကမၠောန်ဂွံဂေတ်အာကီု ကလိတ်ကလောတ်အာသီုဖအိုတ်ဏောၚ်ဂှ် အဲပတှ်ေကေတ်လဝ်ရ။
sanlontai