လဂုၚ်၊ ဒဳဇြေန်ဗာ(၂၂)
ပ္ဍဲသၞာံ ၂၀၂၁ ဂိတုဒဳဇြေန်ဗာ စၟတ်တ္ၚဲ (၅) ဃောကေတ်ဒၟံၚ်ပရိုၚ်ပေါဲထ္ၜးဆန္ဒ ပ္ဍဲဍာန်ဇၞော်ပါန် ပွိုၚ်ဍုၚ်ကျိမျေန်တိုၚ် ဍုၚ်လဂုၚ်ဂှ် သၟာပရိုၚ်ဗီုဓာတ် ကိုဝ်ကောၚ်သေတ်လေန် ကေုာံသၟာပရိုၚ်ရုပ်ဒမျိုၚ် မမှူယျတနာခေတ်မိုအ်မိုအထောန် ကံၚ်ဇြဳပၞာန် ဇီုကဵုကွဳစက်တုဲ ဒးဒုၚ်ရပ်လဝ်ဂှ် စောတ်စောဲလဝ် နကဵုရာဇသာတ် ဆေၚ်ကဵုပရေၚ်ဆဝ်ပ္ၚုဟ်ကလိုက်ကၟဵုကၟိန်ဍုၚ်နကဵုၝောံပိုဒ် ၅၀၅ (က) ပ္ဍဲတ္ၚဲဏံတုဲ ဖျေံလဝ်ဒဏ်ထံက် ပွိုၚ်ပိသၞာံဇဳရဂှ် ဂွံတီကေတ်လဝ် ဇရေၚ်ညးစုက်လုက်ကဵု တွဳဗွိုၚ်ဂှ်ရ။
“အပါကိုဝ်ကောၚ်တအ် ဆက်နၚ်ဖုၚ်ကဵုအဲရ။ မၞိဟ်ဒးဒုၚ်ရပ်လဝ် ပ္ဍဲတ္ၚဲဂှ်မွဲစွံ သီုဖအိုတ်ဂှ် ဖျေံလဝ် ၅၀၅(က) သီုဖအိုတ်ရ။ မမှူဂှ်တှ်ေ အရၚ်ဂွံဆက်ဖျေံ ဂဗုတ်ဆက်တောဲ သှ်ေမံၚ်ဏီ ဂွံတီလဝ်ရ” ဂှ် သၟာပရိုၚ်ဖျေံသ္ဇိုၚ် ပ္ဍဲဍုၚ်လဂုၚ် ဟီုကဵု ဌာန်ပရိုၚ် သြၚ်လောန်တိုၚ်(မ်)ရ။
ကိုဝ်ကောၚ်သေတ်လေန် ကေုာံမမှူယျတနာခေတ်မိုအ်မိုအ်ထောန်တအ်ဂှ် ဒှ်သၟာပရိုၚ် နူကဵုဌာန်ပရိုၚ် Myanmar Press Photo Agency (MPA)ရ။ အခိၚ်ကိုဝ်ကောၚ်သေတ်လေန် ဒးဒုၚ်ရပ်ဂှ် ဒးဒုၚ်ဇီုလဝ်ကဵု ကွဳစက်ပၞာန်တုဲ ဇုတ်ဂၞိၚ်ကဝ်အာ က္လိဂွံလဝ်ဘဲဝပ် ပ္ဍဲမတ်ကဵု ပ္ဍဲက္ဍိုပ်ရ။
မမှူယျတနာခေတ်မိုအ်မိုအ်ထောန်ဂှ်မ္ဂး ပ္ဍဲကဵုက္ဍိုပ်ကီု သီုပ္ဍဲဇကု ၜိုတ် ၈၀ တၟအ်ကၠံ က္လိဂွံလဝ်ဘဲဝပ်သ္ကာတ်မြဟ်တုဲ ဒးဆဵုဂဗလဝ် အန္တရာယ် ဒးဒှ်ဓဝိၚ်ကဵုလမျီုရ။ ညးဂှ် ကံၚ်ဇြဳပၞာန် စောဲလဝ်ဂဗုတ် နကဵုၝောံပိုဒ် ပါဲနူ- ၅၀၅(က)တုဲ သီုကဵု ၝောံပိုဒ် ၅၀၅(ည) ဏီရ။
သၟာပရိုၚ်ကံၚ်ဇြဳပၞာန်ရပ်ဒက်လဝ်တုဲ စောဲလဝ်ဂဗုတ်ဂှ် ကၠာသၞာံဏီဟွံအိုတ်ဏီ သွက်ဂွံဖျေံအာ အသံပၟိၚ်လအိတ်နွံဒၟံၚ်ရဂှ် တၠပညာသၞောဝ်ဥပဒေဂမၠိုၚ် သ္ၚဳဂၠိပ်လဝ်အိုတ်ရ။
ဂကောံသ္ၚိကၟိန်အိန်ထံၚ် သၟာပရိုၚ်ဒးဒုၚ်ရပ်လဝ်တအ်ဂှ် ယဝ်ရဖျေံအသံပၟိၚ်လအိတ် ဗီုလၟုဟ်ဏံမ္ဂး သွက်ဂွံပါလုပ်မၚ်စၟဳ ပ္ဍဲအခေါၚ်ဗၠးသက်သာဂမၠိုၚ် ဂွံမာန်ရဂှ် ဟီုသ္ဂးလဝ်အိုတ်ရ။
ကဆံၚ်အခေါၚ်ဗၠးၜး မဳဒဳယာကၟိန်ဍုၚ်ဗၟာ ကၠာနူပၞာန် ဟွံဂွံသီအဝဵုဏီဂှ် နွံဒၟံၚ် ပ္ဍဲကဆံၚ် (၁၃၉) တုဲ ကြဴနူပၞာန်သီအဝဵုတုဲ ပ္ဍဲကဵုအခိၚ်လၟုဟ်ဏံ စှ်ေကၠုၚ်နွံဒၟံၚ် ကဆံၚ် စဵုကဵု(၁၇၆) ရဂှ် ဂွံတီကေတ်လဝ် နူတၚ်လလောၚ်တြး ဂကောံသၟာပရိုၚ်ဟွံပိုၚ်ခြာပယျဵုဒၞက်ရ။
သၟာပရိုၚ်မဳဒဳယာ ဒးဒုၚ်ရပ်လဝ်လဝ် ကြဴနူသ္ကုတ်သီအဝဵုတုဲဂှ် နွံဒၟံၚ်ဗွိုၚ် (၁၅၀)တၠတုဲ ညးကလေၚ်ဗၠးတိတ်လဝ် နွံ (၉၄) တၠတုဲ ပန်တၠဒးဒုၚ်ပြိုက်ဂစိုတ်လဝ်ရ။ ညးဒးဒုၚ်ချိုတ်လဝ် ပ္ဍဲအခိၚ်ဒးဒုၚ်ရပ်ဂှ် မၞုံဒၟံၚ် စဵုကဵုပိတၠရ။ ညးကလေၚ်ဗၠးတိတ်ကၠုၚ် ကြဴနူဒးဒုၚ်ရပ်တုဲဂှ် (၉၄)တၠမၞုံတုဲ ဟိုတ်နူဝရာန်ရပ်ဂှ် သၟာပရိုၚ်ဒးဓလေတ်ပါဲဒဴဒၟံၚ် ၜိုတ်(၃၀)တၠ နွံဒၟံၚ်ရဂှ် ဂွံတီကေတ်လဝ် အတိုၚ်တၚ်ဂၞၚ်ကံက်ဂိုၚ်ကေတ်လဝ်ဂှ်ရ။
ပရိုၚ် – သြၚ်လောန်တိုၚ်(မ်)