သေတ်တွေ-ဂျာန္နဝါရဳ(၃)
ပံၚ်တောဲကဵု ဂကောံပၠန်ဂတး ကလိဂွံလဝ်ပရေၚ်ထံက်ဂလာန်ညးဍုၚ်ကွာန်တအ်တုဲ သွက်ဂွံဗတိုက်သရိုဟ်အာ သၞောတ်တၠအဝဵုပၞာန်မာန် အရာထေက်ကဵုဒးကၠောန် ကၠောန်သ္ပအာရောၚ်ဂှ် ဂကောံကောဒေံမဟာမိတ် သၟဝ်ကျာ (၃)ဂကောံ ဟီုသ္ဂးလဝ်ရ။
ပ္ဍဲဂိတုဂျာန္နဝါရဳ စၟတ်တ္ၚဲ (၁)ဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂကောံ ဒပ်ပၞာန်ရခိုၚ်(AA)၊ ဒပ်ပၞာဗၠးၜးကောန်ဂကူတအာၚ်(TNLA) ကေုာံ ဒပ်ပၞာန်ဒဳမဝ်ကရေတ်တေတ်ကောန်ဂကူဗၟာ (MNDAA)တအ်ရ။
ဟိုတ်နူပရေၚ်ပ္ဍဲဍုၚ်၊ ပရေၚ်ဍုၚ်ကွာန် ကေုာံပရေၚ်ပၞာန် ဟွံညိၚ်ဝတ် က္တဵုဒှ်ကၠုၚ် ဟိုတ်နူပရေၚ်ပၞာန်သီအဝဵုတုဲ ကၠိုဟ်ကေတ်ဒၟံၚ် တၚ်ဒုၚ်စသိုၚ် ကောန်ညးဍုၚ်ကွာန် အလုံကၟိန်ဍုၚ်ဗၟာရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် သွက်ဂွံသောၚ်ကလး ပၟတ်ပၞာန်ပ္ဍဲဍုၚ်မာန်ဂှ် နကဵုကောန်ညးဍုၚ်ကွာန် နွံတန်တဴဒၟံၚ် ပ္ဍဲကၟိန်ဍုၚ်ဗၟာကီု သီုကဵုဂကောံပၠန်ဂတး ဗတိုက်သရိုဟ်ဒၟံၚ် သၞောတ်တၠအဝဵုပၞာန်တအ်ဂမၠိုၚ် သွက်ဂွံကၠောန်အာ ကမၠောန်ညဳညဳသာသာဂှ်လေဝ် ဟီုဗတိုက်ဖ္အောဝ်လဝ်ရ။
နကဵုဂကောံ ကောဒေံမဟာမိတ် (၃)ဂကောံဂှ် ပ္ဍဲကဵုဂကောံပၠန်ဂတး ဍတ်ပါ်တိတ်ကၠုၚ် ပ္ဍဲပရေၚ်ပၠန်ဂတးက္ညၚ်ဂှ် ပံၚ်တောဲကဵု ဂကောံပၠန်ဂတးဇေတ်တ် ကလိဂွံလဝ်ပရေၚ်ထံက်ဂလာန် ညးဍုၚ်ကွာန်လ္ၚဵုလ္ၚဵုတအ်တုဲ သွက်တၚ်ရန်တၟံ ကောန်ညးဍုၚ်ကွာန် ဂွံဍိုက်ပေၚ်မာန် ပတိတ်ဇြဟတ်လွဳပရာဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အလဵုအသဳပရေၚ်ညဳသၟဟ်ကောန်ဂကူဂှ် သၞာံ ၂၀၂၃ ဏံ ဒှ်သၞာံ ကဵုသ္ဂုတ်သွာတ်ပရေၚ်ပၠန်ဂတးက္ညၚ်ရဂှ် ဟီုသ္ဂးလဝ်တုဲ ပံၚ်တောဲရေၚ်တၠုၚ်ဒၟံၚ်ကဵု ဂကောံပၠန်ဂတးကောန်ဍုၚ်တအ်ရဂှ် ကဵုလဝ်သမ္တီ ကုညးဍုၚ်ကွာန်ဂမၠိုၚ်ရ။
ပရိုၚ်-သြၚ်လောန်တိုၚ်(မ်)