လံၚ်လုၚ်-ဂျာန္နဝါရဳ(၇)
ပ္ဍဲရးဒေသဇၞော်တၞၚ်သဳ၊ ပွိုၚ်ဍုၚ်လံၚ်လုၚ်၊ ကွာန်တကျေတ်တဝ် ဂိတုဂျာန္နဝါရဳ စၟတ်တ္ၚဲ (၆) ပ္ဍဲအခိၚ်နူဂယးဂှ် ဗၠာဲသၟိၚ်ကၠုၚ်ရာန်ဍာ်တာ (၂)တၠ ဒးဒုၚ်ပန်ဂစိုတ်လဝ်တုဲဂှ် ဗၠာဲသၟိၚ်တအ် စံၚ်ပလီုလဝ်တာဲတာ သီုကဵုသ္ၚိဒၟံၚ်ရတအ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဏံ ပ္ဍဲအခိၚ်နူဂယး ၜိုတ် (၈) နာဍဳဂှ် ပ္ဍဲဆေၚ်ဍာ်တာ မၞုံပ္ဍဲတၞုၚ်ကွာန်တကျေတ်တဝ်ဂှ် ဃောဗၠာဲသၟိၚ် နူကဵုဗ္ဒပ်ကွာန်တကျေတ်တဝ် (၂)တၠ ကၠုၚ်ရာန်ဒၟံၚ်ဍာ်တာဂှ် ဒးဒုၚ်ဗတိုက်ပန်လဝ်ကဵု ဂကောံပရေၚ်စဵုဒၞာညးဍုၚ်ကွာန်တအ်ရ။
ကြဴနူဗၠာဲသၟိၚ် (၂) တၠ ဒးဒုၚ်ဗတိုက်လဝ်တုဲဂှ် ကောန်ဒပ်ဗၠာဲသၟိၚ်တကျေတ်တဝ် စိုပ်ကၠုၚ်တုဲ ကၠောန်သ္ပကၠုၚ် ပရေၚ်စံၚ်သ္ၚိဒၟံၚ် မၞုံဇိုၚ်ကရပ်တာဲတာဂှ်ကီု သီုဗက်ပန်မံၚ်ပြးဇးရ။
ဟိုတ်နူပရေၚ်ဒပ်ဗၠာဲသၟိၚ်စံၚ်လဝ်တုဲ တာဲတာဆေၚ်ဍာ်တာ ကေုာံသ္ၚိဒၟံၚ်မွဲမ တူပၟတ်လီုလာ်အာလဝ်ကီု ဟိုတ်နူဗက်ပန်ဒၟံၚ်ပြးဇးတုဲ သ္ၚိဒၟံၚ်ညးဒေသဂမၠိုၚ် ဟွံအောန်နူ (၃) မ ဒးဇီုကပိုက်လီုလာ်လဝ်ရဂှ် ညးဒေသဂမၠိုၚ် ဟီုသ္ဂးလဝ်ရ။
ပ္ဍဲကဵုပရေၚ်ကောန်ဒပ်ဗၠာဲသၟိၚ် သၟဝ်တဲကံၚ်ဇြဳပၞာန် ဒးဒုၚ်ဗတိုက်ပန်လဝ်ဂှ် ချိုတ်အာလဝ်မွဲတၠတုဲ မွဲတၠဂှ် ဂွံလဝ်ဘဲဝပ်ရ။ ကောန်ဒပ်ဗၠာဲသၟိၚ်ဇီုကပိုက် ဒးချိုတ်အာလဝ်မွဲတၠဂှ်မ္ဂး ကောန်ဒပ်ဗၠာဲသၟိၚ်ကံၚ်ဇြဳပၞာန်တအ် ကလေၚ်ဖျဴဏာလဝ် ဗ္ဒပ်တကျေတ်တဝ်ရဂှ် ဂွံတီကေတ်ရ။
ကြဴနူဒပ်ပၞာန်သီအဝဵုတုဲ ပ္ဍဲဍုၚ်လံၚ်လုၚ် ရေၚ်ကွဳစက်ကံၚ်ဇြဳပၞာန်၊ ဗ္ဒပ်ဗၠာဲသၟိၚ် ကေုာံကရောၚ်ပၞာန်တအ်ဂှ် ဒးဒုၚ်ဗတိုက်ဒၟံၚ် မွဲခနမွဲခနတုဲ ပရေၚ်ဇီုကပိုက်ချိုတ်ဒၟံၚ်တအ် နွံကၠုၚ်ဒၟံၚ်ရ။
ပရိုၚ်-သြၚ်လောန်တိုၚ်(မ်)