ပေကျေန်၊ ဂျာန္နဝါရဳ(၈)
ကုမ္ပဏဳကြုက် CanSino Biologics ဂှ် သွက်ဂဥုဲစဵုဒၞာ သၠုၚ်ဇြဟတ် ဂိုဝ်ဝေတ် -၁၉ mRNA ဂှ် စကၠုၚ်လဝ် ကဆံၚ်စမ်ၜတ်ကၠောန်ပ္တိတ်ရဂှ် ဓမံက်ထ္ၜးလဝ် ကြဴနူ ဂိတုဂျာန္နဝါရဳ စၟတ်တ္ၚဲ (၅) ပ္ဍဲအကံက်မဳဒဳယာပရေၚ်မၞိဟ် ကုမ္ပဏဳဂှ်ရ။
ဂဥုဲစဵုဒၞာ ပြာဒၟံၚ်ညံၚ်ကဵု CS-2034 ဏံဂှ် နူကဵုဂိတုတုဲကၠုၚ်တေံ စတမ်တုဲ စနူအခိၚ်သီရုပ်ကၠုၚ် ပရေၚ်ထိၚ်ဒက်စဵုဒၞာ ဂိုဝ်ဝေတ် – ၁၉ တုဲဂှ် ပ္တဝ်လဝ်ကဵု ဂကူအိုဝ်မဳခရောန်ပါ်တိတ်တၟိ က္တဵုဗဒှ်ကဵုလဝ် ပရေၚ်ကၠောံထၞာန် အလုံမွဲကၟိန်ဍုၚ်ကြုက်ရဂှ် ဟီုသ္ဂးလဝ်ရ။
စဵုကဵုလၟုဟ်ဏံ သွက်ဂွံသုၚ်စောဲပ္ဍဲဍုၚ်ကြုက် ၜိုန်ရဒးနိဿဲဗ္ဒာဲဒလာဲဒၟံၚ်ကဵု ဂဥုဲစဵုဒၞာဂိုဝ်ဝေတ်-၁၉ ကၠောန်ပ္တိတ်ပ္ဍဲဍုၚ် သ္ပလဝ်ဒ္တန် (၉)ဂကူဂှ်ကီုလေဝ် ဂဥုဲတအ်ဂှ် သွက်ဂွံဗတိုက်ပလီု အိုဝ်မဳခရောန် ကေုာံဂကူဍတ်ပါ်တိတ်တၟိ ကၠောံထၞာန်မာန်ဒၟံၚ် အခိၚ်လၟုဟ်ဏံ ဟွံဒှ်ဒတုဲဏီရဂှ် ဂွံတီကေတ်လဝ်ရ။
ဂဥုဲသၠုၚ်ပ္တိုန်ဇြဟတ်ဂှ် ဒုၚ်လဝ်သ္ဇိုၚ်ကဵု နဲကဲပညာ သုၚ်စောဲလဝ် ပ္ဍဲဂဥုဲစဵုဒၞာကၟိန်ဍုၚ်နာနာ ကၠောန်ပ္တိတ်လဝ် နူကဵု Pfizer-BioNTech ကေုာံ Moderna တအ်တုဲ ပ္ဍဲကဵုဂဥုဲစဵုဒၞာတိတ်နူဍုၚ်ဂှ် ဒှ်ဂဥုဲမၞုံကၠုၚ်ဒၟံၚ်ကဵု တၠုၚ်လအာခိုဟ် သွက်ဍုၚ်ကြုက် ပထမကိုပ်ကၠာအိုတ် မွဲဂကူရဂှ် ဟီုသ္ဂးလဝ်ရ။
ကုမ္ပဏဳ CanSino ဏံ ပ္ဍဲကဵုပရေၚ်စမ်ၜတ်နတဲ ကဆံၚ်လဒေါဝ် ပၠုပ်စုတ်ပ္တိုန်လဝ် စတအ်အုက်ချုၚ်ဟံၚ်ကံၚ်မွဲဂကူဂှ် ဒေတာတတ်အကြာ “ရေၚ်တၠုၚ်လပါ်ခိုဟ်” ဂှ်လေဝ် ဒုၚ်စဳရေၚ်ပတိုန်ထ္ၜးလဝ်ရ။
အတိုၚ်လဟီုကုမ္ပဏဳဏံမ္ဂး mRNAဂှ် ပ္ဍဲကဆံၚ်ပရေၚ်ကၠောန်ပ္တိတ် ဂဥုဲစဵုဒၞာဟေၚ်ဂှ် ဗ္ၜတ်ဂဥုဲ (၁၀၀) ပြကောဋိကိုတ် ကၠောန်ပ္တိတ်မာန်ကၠုၚ်လဝ်ရဂှ် လလောၚ်တြးလဝ် ပ္ဍဲမုက်လိက် ဇာနှိက်ပရေၚ်မၞိဟ်ညးတအ်ရ။
Ref: CNA