ဗြဝတဳ၊ ဂျန္နဝါရဳ(၁၁)
ဒဒန်ပရေၚ်ဆာန်ကၟိန် ဗြဝတဳ-မာချံက် ပယျဵုသေံဗၟာ ဒးကၟာတ်ကၠုၚ်လဝ် ဟိုတ်နူပရေၚ်ဒပ်ပၞာန်သီအဝဵု မွဲကရောံကဵု ယဲကပ်ဂိုဝ်ဝေတ် ဗ္ဒာဲပွိုၚ်(၃) သၞာံဂှ် ပ္ဍဲဂိတုဂျာန္နဝါရဳ ကၠုၚ်စိုပ် စၟတ်တ္ၚဲ(၁၂) ဏံမ္ဂး ကလေၚ်ပံက်အာရောၚ်ဂှ် ညးမၞုံတာလျိုၚ်ဍုၚ်သေံ ပွိုၚ်ဍုၚ်မာချံက်ဂှ် ကဵုကၠုၚ်သမ္တီ လလောၚ်တြးကၠုၚ်ရ။
ဒဒန်ပရေၚ်ဆာန်ကၟိန် စၟတ်(၁) ဆက်စၠောံလဝ် ဍုၚ်မာချံက်ကဵု ဍုၚ်ဗြဝတဳ ပယျဵုသေံဗၟာဂှ် ဒးကၟာတ်ကၠုၚ်လဝ် နူကဵု သၞာံ ၂၀၂၀ တုဲကၠုၚ်တေံ သ္ကုတ်လကြဴဏံဂှ် နူလပါ်သေံ ၜိုန်ရစဳရေၚ်ရေၚ်တၠုၚ်လဝ် သွက်ဂွံကလေၚ်ပံက်ဒဒန်ကီုလေဝ် ဟိုတ်နူအကာဲအရာ ပ္ဍဲကၟိန်ဍုၚ်ဗၟာတုဲ ဒဒန်စၟတ် (၁)ဂှ် စဵုကဵုအခိၚ်လၟုဟ် ကလေၚ်ပံက်ကၠုၚ် ဟွံမာန်ဏီရ။
သွက်ဂွံကလေၚ်ပံက် ဒဒန်ပရေၚ်ဆာန်ကၟိန် စၟတ်(၁) ဂှ် နူလပါ်သေံ ၜိုန်ရပလေဝ်ပလေတ်ကၠုၚ်လဝ် ဂၠိုၚ်ၚ်ကဵုဝါ နွံဒၟံၚ်ကီုလေဝ် ဟိုတ်နူ ပရေၚ်ဗုမ်ခတိုဟ် ပ္ဍဲသၞေဟ်ကၚ်ဒဒန်ပယျဵု ပ္ဍဲဍုၚ်ဗြဝတဳ လပါ်ကၟိန်ဍုၚ်ဗၟာကီု၊ ဟိုတ်နူအကာဲအရာပေါဲဗတိုက် ပ္ဍဲဂၠံၚ်ဇၞော်အာယှ သ္ကာတ်မြဟ်ဒၟံၚ်ကီုတုဲ သွက်ဂွံကလေၚ်ပံက်ဒဒန်ဂှ် ဒးပဆုဲပြံၚ်ကၠုၚ် ဂၠိုၚ်ၚ်ကဵုဝါရ။
အတိုၚ်ညးမၞုံတာလျိုၚ်သေံ လလောၚ်တြးလဝ်မ္ဂး ပ္ဍဲဂိတုဂျာန္နဝါရဳ ကၠုၚ်စိုပ် စၟတ်တ္ၚဲ (၁၂) အခိၚ်နူဂယး (၉) နာဍဳကဝက်ဏံမ္ဂး ကလေၚ်ပံက်အာ ဒဒန်ပရေၚ်ဆာန်ကၟိန် စၟတ် (၁) ရောၚ်ဂှ် ညးမၞုံတာလျိုၚ် လပါ်သေံဂမၠိုၚ် လလောၚ်တြးလဝ်ရ။
သွက်ဂွံကလေၚ်ပံက်ဒဒန်ဏံဂှ် တုဲကၠုၚ် ပ္ဍဲဂိတုဂျာန္နဝါရဳ စၟတ်တ္ၚဲ (၆) ဂှ် ညးမၞုံတာလျိုၚ်သေံ ခရိုၚ်တ ကၠောန်သ္ပလဝ်ကောံဓရီုတုဲ လလောၚ်တြးကဵုကၠုၚ်လဝ်သမ္တီ စၟတ်တ္ၚဲကလေၚ်ပံက်ဒဒန်သာ်ဏံရ။
သ္အာၚ်နူဂှ်ပၠန် ပ္ဍဲရုၚ်လဝက ခရိုၚ်ဗြဝတဳဂှ် စၟတ်တဲအခေါၚ်တတ်ကၠောံပယျဵု Thai-Myanmar Border Pass(BP) ဂှ် ပ္ဍဲဂိတုဂျာန္နဝါရဳ စၟတ်တ္ၚဲ (၉) ပ္ဍဲတ္ၚဲတုဲကၠုၚ်ဏံ စကၠောန်ပ္တိတ်ကဵုဒၟံၚ်ကီု နကဵုကောန်ဍုၚ်ဗြဝတဳဂမၠိုၚ် ကၠုၚ်စိုပ်ဂရၚ်ပ္တီအာတ်မိက် ပ္တိုန်စရၚ်မာန်ရဂှ် ဂွံတီကေတ်ရ။
ယဝ်ရကလေၚ်ပံက် ဒဒန်ပရေၚ်ဆာန်ကၟိန် ဗြဝတဳ-မာချံက် စၟတ်(၁) မ္ဂး ကွဳစက်ပတိုန်လဝ်စၟတ်သမ္တီ ဗွဲမလုပ်သၞောဝ် နူဗြဝတဳ စိုပ်မာချံက်တအ်ဂှ် ဂွံကၠုၚ်အခေါၚ် လုပ်တိတ်အာကၠုၚ်ရောၚ်ဂှ် ကောန်ဍုၚ်ဗြဝတဳတအ် ဟီုသ္ဂးလဝ်ရ။
ပ္ဍဲဂိတုဨဗြဴ တုဲကၠုၚ် စၟတ်တ္ၚဲ (၂၃) အခိၚ်ဗ္တံဂှ် ပ္ဍဲဒဒန်ပရေၚ်ဆာန်ကၟိန် ဗြဝတဳ-မာချံက် စၟတ်(၁) လပါ်ဗြဝတဳဂှ် ဂဗုတ်ဗုမ်ခတိုဟ် က္တဵုဒှ်ကၠုၚ်လဝ်ကီု ဂိတုအံက်တဝ်ဗာ စၟတ်တ္ၚဲ (၁၅) အခိၚ်ဗ္တံဂှ်လေဝ် ဂဗုတ်ဗုမ်ခတိုဟ် ထပ်က္တဵုဒှ်လဝ်တုဲ သၞေဟ်ကၚ်စၟဳစၟတ် မၞုံပ္ဍဲက္ဍိုပ်ဒဒန် ဒးခရိုဟ်လီုလဝ်ကီု သီုစမြာၚ်သ္ၚိဒၟံၚ် မၞုံဇိုၚ်ကရပ်ဂှ်ကေုာံ ယာဉ်ကွဳစက်တအ်လေဝ် ဇီုကပိုက်လီုလာ်ကၠုၚ်လဝ် နွံဒၟံၚ်ရဂှ် ဂွံတီကေတ်လဝ်ရ။
ပရိုၚ်-သြၚ်လောန်တိုၚ်(မ်)