ကျာ်ထဝ်၊ ဂျာန္နဝါရဳ(၁၁)
ပ္ဍဲတွဵုရးဍုၚ်မန်၊ ပ္ဍဲကဵုကွာန်မၞုံ ပ္ဍဲပွိုၚ်ဍုၚ်ကျာ်ထဝ်တအ်ဂှ် ဟိုတ်နူတံဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် သီုကဵုတၚ်ရန်တၟံနွံနွံဂှ်ရ ညးဒေသ (၁)တၠ ဒးချိုတ်လဝ်တုဲ (၈)တၠ က္လိဂွံလဝ် ဘဲဝပ်ရဂှ် KNU ဒပ်မဟာ(၁) ခရိုၚ်သဓီု လလောၚ်တြးလဝ် ပ္ဍဲဂိတုဂျာန္နဝါရဳ စၟတ်တ္ၚဲ (၁၀)ဂှ်ရ။
နူကဵုတံဒပ်ပၞာန်တိုက် ကံၚ်ဇြဳပၞာန် ခလရ (၂) မဖျေံလဝ်သ္ဇိုၚ်ကျာ်ထဝ်ဂှ် ပ္ဍဲဂိတုဂျာန္နဝါရဳ စၟတ်တ္ၚဲ (၆) ၜိုတ်အခိၚ် (၇)နာဍဳ နူဂယးဂှ် ပန်ဖျေံလဝ်လွဟ်ဇၞော် ပ္ဍဲကွာန်လှေဝ်လာန်ကူ ၆၀ မမ ၂မရ။
မကမ်လွဟ်ဇၞော် ဒပ်ကံၚ်ဇြဳပၞာန် ပန်ဖျေံနၚ်လဝ်ဂှ် ဒတုံပြဟ်စှ်ေ ပ္ဍဲလတူသ္ၚိ ဥူကျဝ်မျေတ်ကဵုမမိဖျူတအ်တုဲ ပါ်ခတိုဟ်အာလဝ်ဂှ်ရ ဥူကျဝ်မျေတ် အာယုက် ၆၃ သၞာံ ကေုာံမဖျူနှေန် အာယုက်၁၆ သၞာံတအ် ဇီုကပိုက်ဂွံလဝ်ဝပ်ရ။
ပ္ဍဲဂိတုဂျာန္နဝါရဳ တုဲကၠုၚ်စၟတ်တ္ၚဲ (၇) အခိၚ်ဗ္တံဂှ်လေဝ် နူကဵုခမရ (၂၀၇) မဖျေံသ္ဇိုၚ်တုၚ်ဇြယာတ် ကေုာံဒပ်အမၠံက် စၟတ်(၃၁၀)တအ် ပန်ဗလးနၚ်လွဟ်ဇၞော် (၈) မဂှ်ရ ညးဒေသ ကိုဝ်ဇြဝ်မိုဝ်လွေန် အာယုက် (၂၆) သၞာံ ဒးချိုတ်လဝ်တုဲ သ္ၚိကၟိန်အိန်ထံၚ်ညး (၆)တၠ ဂွံလဝ်ဘဲဝပ်ရ။
ညးဒေသ ဒးလဝ်လွဟ်ဇၞော် ဂွံလဝ်ဘဲဝပ်တအ်ဂှ် ပလံၚ်ဗစိုပ်ဏာလဝ် ရုၚ်ဂဥုဲတုၚ်ဇြယာတ် ကေုာံရုၚ်ဂဥုဲကျာ်ထဝ်ရဂှ် ဂွံတီကေတ်ရ။
ပရေၚ်ဒပ်ကံၚ်ဇြဳပၞာန်ပန် ဖျေံဒၟံၚ်လွဟ်ဇၞော် ပ္ဍဲလတူကွာန်တအ်ဂှ် ဒှ်ကမၠောန်ပ္ကီုပရာပ် လတူညးဍုၚ်ကွာန်တုဲ ကလိလောန် ဖံက်ပ္ကဝ်ဒၟံၚ် အခေါၚ်အရာမၞိဟ် ဇၞော်ကဵုဇြဟတ်ရဂှ် ညးတာလျိုၚ် KNU ခရိုၚ်သဓီုမွဲတၠ ဟီုသ္ဂးလဝ်ရ။
ပ္ဍဲကဵုပွိုၚ်ဍုၚ်ကျာ်ထဝ်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ဇၟာပ်ဒဒှ်တ္ၚဲဂှ်ရ ညးဒေသ နူကဵုဇြဳပျောၚ်၊ ဝေန်ကာန်၊ ပျေန်ကတိုဝ်၊ ကျောက်ဖျာ၊ ရးဝေန်ကလဝ်ဂမၠိုၚ် (၃၀၀၀) တၠပြၚ် ဒးဂြိပ်ဒဴပါဲဓလေတ်ဒၟံၚ်ရဂှ် KNU ခရိုၚ်သဓီု လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)