နျူဒေလဳ၊ ဂျာန္နဝါရဳ (၁၂)
ပွမပလေဝ်ပလေတ်ပရေၚ်ပၞာန် အပ္ဍဲဒေသတံ အသိၚ်သၠုၚ်တိုန်ကၠုၚ်တုဲ အရာဟွံပြေပြံၚ် အကြာၜါဍုၚ် ကုကြုက်တံ အခိၚ်စိုပ်ကၠုၚ် လလအ်ပိသၞာံဂှ် နကဵုအလဵုအသဳအိန္ဒိယ သွက်ဂွံရာန်ကေတ်အာ ကမ်လှောဝ်ထိၚ်သၞေဝ် ပရေၚ်စဵုဒၞါတရဴကျာ မဆုဲပြံၚ်ဂွံတံဂှ် စဳဇန်ဒၟံၚ်ယျရောၚ် သ္ဂးရ။
ကမ်လှောဝ်ထိၚ်သၞေဝ်တံဏံဂှ် စွံအာ အပ္ဍဲဒသပယျဵု မဒှ်ဒၟံၚ်ပရေၚ်ကယျာန်ဓဝါတ် ကုကြုက်ဂှ်ရောၚ် ဟီုဂးလဝ်ရ။
ပရေၚ်ကမ်လှောဝ်ထိၚ်သၞေဝ်ပန်ခြာဇမၠေံ ကောန်ဒပ်တံ မပန်ပှော်မာန်တံဂှ် နူကဵုဝန်ဇၞော်ကာစဵုဒၞါအိန္ဒိယ ပ္တိတ်တၚ်လလောၚ်တြးမွဲတုဲ သောၚ်ကလးဟီုဂးလဝ်ရ။
“ပြဟ်ဟ်ဏံ ရံၚ်ကဵုအကာဲအရာ သ္ကုတ်သၟဝ်ကျာဂှ်မ္ဂး သွက်ဂွံဗ္ဂပ်စွံ ကမ်လှောဝ်ထိၚ်သၞေဝ် အလဵုမၞိဟ်ယိုက်တုဲ ပန်ပှော်မာန်တံဂှ် စွံလဝ် အာရီုရ” သာ်ဝွံ ဌာနဝန်ဇၞော် ဟီုဂးလဝ်ရ။
ရန်တၟံ သွက်ဂွံခၠေဝ်ပၠန် ကုပွမဘပဠ နူကဵုမှဲအကး နူသမၠုၚ်ပေ ခရာဇမ္ၚောဲမသဝ်ဂှ်တုဲ နူကဵုဂကောံသုတေသန အိန္ဒိယ DRDO ကၠောန်ပ္တိတ်လဝ်ဒဳဇြာၚ် ကမ်လှောဝ်ဂှ်တုဲ ဗီုပြၚ်တုပ်ဒၟံၚ်ကဵု ကမ်လှောဝ်ပန်မှဲအကး နူကဵုဗလးတိ အမေရိကာန်မကၠောန်ပ္တိတ် FIM-92 Stinger ဂှ်ရောၚ် ထ္မံက်ထ္ၜးလဝ်ရ။
အပ္ဍဲသၞာံ ၂၀၂၀ အပ္ဍဲဂိတုဂျောန် ပ္ဍဲကဵုပေါဲဗ္တိုက်ဆေၚ်မုက် မက္တဵုဒှ်လဝ် မွဲဒမြိပ်ဒေသဟိမဝန်ဂှ် ကောန်ပၞာန်အိန္ဒိယ (၂၀) ကေုာံ ကောန်ပၞာန်ကြုက် (၄) တၠတံ ပြဟ်လလုဲအာလဝ်တုဲ လၟေၚ်ဒဒှ်ဂှ်ဝွံ အပ္ဍဲပွိုၚ် (၄၀) သၞာံဂှ် ဒှ်လဝ်ပရေံအိုတ်တုဲ ဗွဲကြဴဂှ်တုဲ ပရေၚ်ကြံၚ်မ္ၚိုဟ် အကြာၜါဍုၚ်တံ သၠုၚ်တိုန်ကၠုၚ်လဝ်ရ။
သွက်ပရေၚ်သ္ဂောံပြေပြံၚ် အကြေပ်အဂြတ်ပယျဵုဂှ် ၜိုန်ရရေၚ်တၠုၚ်ကၠုၚ်လဝ် ပရေၚ်တက်ကျာၜါလ္ပာ်တံ စဵုကဵု (၁၇) ဝါကီုလေဝ် ဟွံတၟေၚ်ကၠုၚ်လဝ်တုဲ အပ္ဍဲဂိတုတုဲကၠုၚ်တေံဂှ် ပ္ဍဲပယျဵုဒိုဟ်အဂၞဲအိန္ဒိယဂှ် အကြာဒပ်ၜါလ္ပာ်တံ ပရေၚ်ဆေၚ်မုက်ဒိဓဗတ်တံ ထပ်မံက်ကၠုၚ်လဝ်ရ။
ဌာနဝန်ဇၞော် ပရေၚ်စဵုဒၞါအိန္ဒိယဝွံ သွက်ပရေၚ်သ္ဂောံရာန် ယာန်ပၞာန် ဗရာမောတ်(ချ်) မဗ္ဂပ်စုတ် ကမ်လှောဝ်ပလီုက္ၜၚ်တံမာန် ကေုာံ က္ၜၚ်ကျာသၞေၚ်ဝဲ မဗ္ဂပ်စုတ် ကမ်လှောဝ်ပလီုကွဳစၚ်ခြပ်ပသဲ ပ္တိတ်နူအပ္ဍဲဍုၚ်တံဂှ်လေဝ် ထပ်သ္ပဒတန်လဝ်တုဲ သွက်လစှ်ေ အရပ်စပ်ပၞာန် အဇာဇၞော်တံဂှ် ဒးအိုတ် ဒဝ်ဠာအမေရိကာန် (၆၉၇ ဒဿမ ၁၄) မဳလဳယာန်ရောၚ်ဂှ်လေဝ် ဟီုဂးလဝ်ရ။
Ref: Straitstime