တဳဟဳရာန်၊ ဂျာန္နဝါရဳ (၁၃)
စပ်ကဵုပေါဲထ္ၜးဆန္ဒ မက္တဵုဒှ်လဝ် ပ္ဍဲဍုၚ်အဳရာန် ဟိုတ်နူဒဒှ်မချိုတ်မာယှာအာမ်မဳနဳဂှ်တုဲ သၟာပရိုၚ် အောန်အိုတ် (၃၀) တၠဝွံ နွံဒၟံၚ် ပ္ဍဲထံၚ်ဏီဂှ် ဂကောံအ္စာပရိုၚ် တဳဟဳရာန်တံ ဟီုရ။
ကြဴနူဂကောံဒပ်ဗၠာဲသၟိၚ် မဆက်စပ်ကဵုပရေၚ်ထိၚ်ဒက်စေဝ်ပၞောန်တံ ရပ်ဒက် ကုအာမ်မဳနဳ နကဵုတၚ်စောတ်စောဲ ဖံက်ပလီု သၞောဝ်ဥပဒေကျိုၚ်ကယျိုၚ်အဳရာန် မစၟတ်လဝ် သွက်ညးဗြဴတံဂှ်တုဲ စပ်ကဵုဒဒှ်မချိုတ် ညးဗြဴဂှ်တုဲ စနူဂိတုသေပ်တေမ်ဗာ (၁၆) တေံဂှ် ပေါဲထ္ၜးဆန္ဒ လလအ်ပွိုၚ်ပန်ဂိတု က္တဵုဒှ်လဝ် အပ္ဍဲဍုၚ်ရ။
နူကဵုလဒေါဝ်ဂိတု သေပ်တေမ်ဗာတေံ ဒဒှ်ရရပ်ထိၚ်လဝ် အ္စာပရိုၚ်ဗၞတ် (၇၀) တၠဂှ် ဂကောံအ္စာပရိုၚ်တံ လလောၚ်ပ္တိတ်လဝ် ပ္ဍဲဂိတုဂျာန္နဝါရဳ (၁၁) တေံရ။
အ္စာပရိုၚ်အဳရာန်ၜါတၠ ဟာမ္မဒဳ ကဵု အေလ်လာ မဵုဟာမေတ်ဒဳ မဒးဒုၚ်ဖျေံလဝ်ထံၚ် ပါလုပ်ပ္ဍဲစရၚ်ဏံဂှ်ဝွံ ဒှ်ညးချူတြးထ္မံက်ပ္တိတ်လဝ် ပရူပရာ ဒဒှ်မချိုတ်မေဿအာမ်မဳနဳဂှ် ကၠာအိုတ်ရ။
“နူကဵုပေါဲထ္ၜးဆန္ဒတံ စတုဲဂှ် သၟာပရိုၚ်ဗွဲမဂၠိုၚ်ဂၠေၚ်ဂှ်လေဝ် သၟိၚ်တၠအဝဵုတံ ကော်ဏာလဝ်ရ” သာ်ဝွံ ဂကောံဂှ် ထပ်ဟီုဂးလဝ်ဏီရ။
မၞိဟ်မဒးဒုၚ်ဖျေံဒုဟ်ဒဏ် လက္ကရဴအိုတ်ဂှ် ဒှ်ဂျာနေဝ်လေတ်ဝေၚ်ဇြဟတ်တုဲ ဒုဟ်ဒဏ် မစောဲစပ်လဝ်ညးဂှ် ဟွံထံက်ထ္ၜးလဝ် ချိုတ်တ်ပၠိုတ်တ်ကီုလေဝ် ဖျေံလဝ် ဒဏ်ထံၚ် (၁၈) သၞာံတုဲ အောန်အိုတ် သွက်ဂွံဒးဒုၚ်ဒဏ်ထံၚ် (၁၀) သၞာံဂှ် ပ္တိတ်လဝ်အမိၚ်ရောၚ် သ္ဂးရ။
ပ္ဍဲဂိတုအံက်တဝ်ဗာ သ္ကုတ်လက္ကရဴဏံဂှ် အ္စာပရိုၚ် ကေုာံ အ္စာပရိုၚ်ဗီုဓာတ်အဳရာန် (၃၀၀) ပြၚ်ဝွံ ဟိုတ်နူသ္ကအ်အဖဝ်ကမၠောန်ညးတံ ဒးဒုၚ်ရပ်တုဲ အခေါၚ်အရာကောန်ဍုၚ်ညးတံ ဒးဒုၚ်ဖံက်ပ္ကဝ်ဂှ်ရ ထ္ပက်လဝ်စၟတ်တဲ ပ္ဍဲကဵုလိက်လလောၚ် မဟီုဂးပါ်ပါဲလဝ်မွဲရောၚ်ဂှ် မဳဒဳယျာ အပ္ဍဲဒေသတံ ထ္မံက်ထ္ၜးလဝ်ရ။
အပ္ဍဲပေါဲထ္ၜးဆန္ဒ မၞိဟ်ဂၠိုၚ်ကဵုကၠံ သီုကဵုပါလုပ် ကောန်ဂကောံဒပ်ပရေၚ်ဂီုကၠီုတံ မဒးချိုတ်တုဲ သၟိၚ်တၠအဝဵုအဳရာန်တံ မထ္မံက်လဝ်ဗီုပြၚ် နဒဒှ်အဓိကိုရ်ဂှ် ဒဒှ်ရ မၞိဟ်ဂၠိုၚ်ကဵုလ္ၚီ ဒးဒုၚ်ရပ်ထိၚ်လဝ်ဂှ်လေဝ် ထ္မံက်ပ္တိတ်လဝ်ရ။
Ref: The National News