လ္ဂုၚ်၊ ဂျာန္နဝါရဳ (၁၃)
ပရေၚ်ဍုၚ်ဗၟာ လ္တူဝန်ဇၞော်ကာဍုၚ်သ္အာၚ် အေန်ဒိုဝ်နဳယှာ ရက်နဝ်မာသူဒဳ နဒဒှ်ညးစၞးကာတၟေၚ်အာဇြဳယာန် မကေတ်တာလျိုၚ် သ္ကိုပ်သ္ကအာဂှ်ဝွံ ၜိုန်ရကၠောန်ကၠုၚ် နကဵုၚုဟ်ဟ်က္တဵုက္တဵုမာန်ကီုလေဝ် ဒးမၚ်ကျောဝ်ဒၟံၚ်ဏီရောၚ်ဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်တံ ဟီုရ။
ဍုၚ်အေန်ဒိုဝ်နဳယှာ မကေတ်လဝ်တာလျိုၚ် နဒဒှ်ဥက္ကဌဒးအလန်အာဇြဳယာန် သွက်သၞာံ ၂၀၂၃ ဂှ် ဒက်ပ္တန်အာ ရုၚ်ညးစၞးတၟေၚ်အာဇြဳယာန် စပ်ကဵုကၟိန်ဍုၚ်ဗၟာတုဲ အလဵုညး သ္ကိုပ်သ္ကအာရောၚ်ဂှ် နဒဒှ်ဂလာန်တ္ၚဲကၠောံသၞာံဂှ် ရက်နဝ်မာသူဒဳ ဟီုဂးလဝ် ပ္ဍဲဂိတုဂျာန္နဝါရဳ (၁၁) တေံရ။
အေန်ဒိုဝ်နဳယှာ ကၠောန်ဗဒှ်အာ အတိုၚ်တၚ်သ္ဂုတ်သွာတ် မဖျေံစၟတ်လဝ် နူကဵုကောံဓရီုအာဇြဳယာန်ကဆံၚ်လ္တူ မကၠောန်ဗဒှ်လဝ် ပ္ဍဲဍုၚ်ဖဏံပေန် နကဵုတၚ်တုပ်စိုတ်အာဇြဳယာန် (၅) တၚ်ဂှ်ဏောၚ်မဒှ်တုဲ သွက်ဂွံသောၚ်ကလး ပြသၞာဍုၚ်ဗၟာဂှ် သဳကၠဳပ္ညဳပ္ညပ်အာ ကုညးမဆက်စပ်အိုဿီုရောၚ် ရက်နဝ်မာသူဒဳ သ္ဂးရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် အေန်ဒိုဝ်နဳယှာ ပါလုပ်ကၠုၚ် အပ္ဍဲအာဇြဳယာန် နဒဒှ်ညးစၞးဂှ်ဝွံ သွက်ပရေၚ်ဍုၚ်ဗၟာဂှ် ကၠောန်သ္ပၚုဟ်ဟ်က္တဵုက္တဵုမာန်ကီုလေဝ် သွက်ဂွံစိုပ် ဒဵုကဵုပေါဲသဳကၠဳပ္ဍဲဝိုၚ်တက်ကျာ ဟွံမွဲပုဟ်ဂှ် သ္ၚဳဂၠိပ်လဝ်ရ။
“အေန်ဒိုဝ်နဳယှာပါလုပ်ကၠုၚ် ပ္ဍဲအာဇြဳယာန် နဒဒှ်ညးစၞးဂှ်ဝွံ စပ်ကဵုပရေၚ်ဍုၚ်ဗၟာတုဲ နကဵုဂကောံဇြဟတ် မၞုံကဵုလစွံစိုတ်ဍာံဍာံပြပြ လ္ပာ်အာဇြဳယာန်တံ ဂွံကၠုၚ်အခေါၚ်အရာတံဂှ်ရ စပ်ကဵုပရေၚ်ဍုၚ်ဗၟာတုဲ ဍေံတံ ကၠောန်ကၠုၚ် နကဵုၚုဟ်ဟ်က္တဵုက္တဵုမာန်ဏောၚ်၊ ဆ္ဂး တၚ်ပၟိက်ဇၞော်ဂှ်တှ်ေ ကံၚ်ဇြဳပၞာန် သွက်ဂွံဖ္ဍိုက်ဗပေၚ်ကဵုမာန်ဂှ် ဟွံမွဲပုဟ်၊ တၚ်ပၟိက်ဇၞော်ဟီုဂှ် ကမၠောန်ပွပကီုပရာပ် မကၠောန်ဒၟံၚ် ပ္ဍဲဍုၚ်ဗၟာတံ ဂွံဒေါအ်ဒေၚ်အာ ကိစ္စတံဏံ၊ တုဲတှ်ေ ဒဵုကဵုကိစ္စ ဂွံဒှ်ပေါဲသဳကၠဳဝိုၚ်တက်ကျာတံဂှ် သ္ဂောံစိုပ်ကၠုၚ် ဟွံမွဲပုဟ်ဂှ် သ္ၚဳဂၠိပ်လဝ်ရ” သာ်ဝွံ ညးသ္ဂးရ။
သၞာံတုဲကၠုၚ် နူဂိတုနဝ်ဝေမ်ဗာ (၁၀) စဵုကဵု (၁၃) တေံ ပ္ဍဲကဵုကောံဓရီုအာဇြဳယာန် ကဆံၚ်လ္တူ မရနုက်ကဵု (၄၀) ဝါ ကေုာံ (၄၁) ဝါ မကၠောန်ဗဒှ် ပ္ဍဲဍုၚ်ဖဏံပေန်၊ ဍုၚ်ကာမ္ဗောဒဳယျာဂှ် စပ်ကဵုပရေၚ်ဍုၚ်ဗၟာတုဲ ကံၚ်ဇြဳပၞာန် ဒဒှ်ရနွံပၟိက် ဒးဒ္ဂေတ်ဗက် ကတိကဝတ်တံဂှ် က္ဍိုပ်သ္ကိုပ်အာဇြဳယာန်တံ ကဵုလဝ်ကတိရ။
သ္အာၚ်နူဂှ်ပၠန် နူကဵုကောံဓရီုအာဇြဳယာန်ကဆံၚ်လ္တူဂှ် ကလေၚ်သ္ၚဳဂၠိပ်လဝ် တၚ်တုပ်စိုတ်အာဇြဳယာန် (၅) တၚ်ဂှ်တုဲ ထပ်ဗပေၚ်စုတ်လဝ် တၚ် (၁၀) တၚ်ပၠန်တုဲ ပ္ဍဲဂိတုနဝ်ဝေမ်ဗာ (၁၁) သၞာံတုဲကၠုၚ်တေံ လလောၚ်ပ္တိတ်ကၠုၚ်လဝ် တၚ် (၁၅) တၚ်ဂှ်ရ။
ပ္ဍဲကဵုဏံဂှ် အစဳဇန်ထ္မံက်ရုပ်ရဴ မထ္မံက်ထ္ၜးလဝ် နကဵုတၚ်စၞောန် မၜတ်ကၞာတ် နတဲစှ်ေစှ်ေမာန် နကဵုခံက်အၚ်ချိုတ်တ်ပၠိုတ်တ် သွက်ဂွံထံက်ပၚ် ကုတၚ်တုပ်စိုတ် (၅) တၚ်ဂှ် ဝန်ဇၞော်ကာဍုၚ်သ္အာၚ်အာဇြဳယာန်တံ ဒးချူဓဇက်ရောၚ် သ္ဂုတ်သွာတ်လဝ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဒံက်တာသာၚ်ကျဳဇြေန်သဵုဂှ်လေဝ် ချူဓဇက်တုပ်စိုတ် အစဳဇန်ထ္မံက်ရုပ်ရဴ မထ္မံက်ထ္ၜး ခံက်အၚ်ချိုတ်တ်ပၠိုတ်တ်တံတုဲမှဟေၚ် နကဵုအလဵုအသဳဗၟာ ပွမဒ္ဂေတ်ဗက် တၚ်တုပ်စိုတ်တံ နွံ ဟွံမွဲဂှ် ထပ်ဒးမၚ်ရံၚ်ပၠန်ရောၚ် ထံက်ထ္ၜးလဝ်ရ။
“တၚ်တုပ်စိုတ်တံဂှ် နကဵုတၚ်စၞောန် အရာမၜတ်ကၞာတ်ချိုတ်တ်ပၠိုတ်တ်ဂှ် သာ်လဵုရေၚ်တၠုၚ်စဳဇန်ရောဟီုဂှ် အစဳဇန်သာ်ဏံ ဍေံတံ(အာဇြဳယာန်) ဒးနွံဏောၚ်၊ အေဇှ် သ္ဂောံချူဓဇက် နကဵုသ္ကိုပ်သ္က ဥက္ကဌ ဌာနဝန်ဇၞော်ဂှ် နွံရ၊ ဗွဲတၟေၚ် ဍေံတံ သဘဴဂွံချူဓဇက်အာ ကုဝန်ဇၞော်ကာဍုၚ်သ္အာၚ်တံ နွံရ၊ ပ္ဍဲကဵုချူဓဇက်အစဳဇန်တံဂှ် အရာမဒးကယျာန်ဓဝါတ်တံ ကေုာံ အရာမကယျာန်စာန်စးတံ နွံမံၚ်ဏီရောၚ် ထေၚ်ရ၊ ဣဏံတုဲမ္ဂး သီုဖအိုတ်တုပ်စိုတ်တုဲမှ အစဳဇန်တိတ်ကၠုၚ်တုဲမှ အခိၚ်မထ္မံက်ရုပ်ရဴ အစဳဇန်ဍာံဍာံဂှ် နကဵုအလဵုအသဳပၞာန်ဗၟာ ဒ္ဂေတ်ဗက် ဟွံဒ္ဂေတ်ဗက်ပုဟ်ဟာဟီုဂှ် ပိုယ်တံ ဒးထပ်ရံၚ်ပၠန်ဏောၚ်၊ အေဂှ်တှ်ေ အကြာဂှ် မၞုံသဘဴသှ်ေဒၟံၚ် မွဲကဆံၚ်ဏီဏောၚ်” သာ်ဝွံ ညးသ္ဂးရ။
ပ္ဍဲကောံဓရီု က္ဍိုပ်သ္ကိုပ်အာဇြဳယာန်လ္ပာ်လ္တူတံ မကၠောန်ဗဒှ်လဝ် အပ္ဍဲဂိတုဨပရဴ သၞာံ ၂၀၂၁ ဒပ်ပၞာန်သီလဝ်အဝဵုဂှ် စပ်ကဵုပရေၚ်ဍုၚ်ဗၟာတုဲ ဖျေံစၟတ်လဝ် တၚ်တုပ်စိုတ် (၅) တၚ်ရ။
ပ္ဍဲကဵုတၚ်တုပ်စိုတ် (၅) တၚ်ဏံဂှ် သွက်ဂွံဗလးကဵု ကောန်ထံၚ်ပရေၚ်ဍုၚ်ကွာန် ကေုာံ က္ဍိုပ်သ္ကိုပ်ကၟိန်ဍုၚ် မရပ်လဝ်တံ၊ သွက်ဂွံဒေါအ်ဒေၚ်ကဵု ပွမသောၚ်ကလး နနဲပကီုပရာပ်တံ၊ သွက်ဂွံဆဵုဂဗသဳကၠဳကဵု ဂကောံဇြဟတ်မဆက်စပ်တံ၊ သွက်ဂွံကဵုအရီုဗၚ် ပရေၚ်ဗ္စာရဏာမၞိဟ်တံ ဒှ်တမ် တၚ်နၚ်တံဏံ ပါလုပ်ရ။
တၚ်တုပ်စိုတ်အာဇြဳယာန် (၅) တၚ်ဂှ်ဝွံ ဒှ်တၚ်သ္ဂုတ်သွာတ် အလဵုက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ် မတုပ်လဝ်စိုတ် ဂတက္ဍိုပ်သ္ကိုပ် အာဇြဳယာန်ကဆံၚ်လ္တူတံကီုလေဝ် ကာလသီအဝဵု ဒဵုကဵုပေၚ် ဗ္ဒါဲ (၂) သၞာံဂှ် တၚ်တုပ်စိုတ်တံဂှ် မုမွဲမှ ရေၚ်တၠုၚ်ထ္မံက်ရုပ်ရဴမာန်လဝ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)