ထဝါဲ၊ ဂျာန္နဝါရဳ (၁၄)
အပ္ဍဲပေါဲဗ္တိုက် မက္တဵုဒှ်လဝ် ပ္ဍဲဒေသ(အရှေ့တော) ၊ ရးဒေသဇၞော်တၞၚ်သဳဂှ် ၜါလ္ပာ်ဇီုကပိုက်ချိုတ်ဂျိုၚ်တံ နွံလဝ်တုဲ လ္ပာ်ကံၚ်ဇြဳပၞာန် ဒးဂိလဝ်ရောၚ် ညးဒုၚ်တာလျိုၚ် လလောၚ်ပရိုၚ် ကရောၚ်ပၞာန်ဥအဝ် (ပွိုၚ်ဍုၚ်ထဝါဲ) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဂျာန္နဝါရဳ စၟတ်တ္ၚဲ (၅) ကဵု စၟတ်တ္ၚဲ (၇) တုဲကၠုၚ်တေံဂှ် နူကဵုကရောၚ်ပၞာန်ဥအဝ် ပန်ပှော်ဗ္တိုက်လဝ် ကရောၚ်ပၞာန်ဒပ်ကံၚ်ဇြဳပၞာန် ဇြဟတ်ဒပ် ပွဳပွူ (၁၀၀) ပါ မစှ်ေကၠုၚ် နူလ္ပာ်ထဝါဲဂှ်ကီု၊ ဒပ်ကံၚ်ဇြဳပၞာန် မမၚ်တောပ်ဗ္တိုက်ဒၟံၚ် ဗ္ဒါဲဒဒန်ပခါတ်တံ နကဵုလွဟ်ဇၞော် ၄၀ မမ၊ ၆၀ မမတံရ။
ဟိုတ်နူပရေၚ်ဗ္တိုက်တံဂှ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် (၃) ဝါတုဲ လ္ပာ်ဒပ်ကံၚ်ဇြဳပၞာန် ဟွံအောန်နူကဵု (၂၀) တၠ ချိုတ်အာလဝ်တုဲ လ္ပာ်ကရောၚ်ပၞာန်ဥအဝ်ဂှ် ဒုသ္ကိုပ်ကရောၚ်ပၞာန် (၁) တၠ ပြဟ်လလုဲတုဲ (၃) တၠ ကလိဂွံလဝ်ဝပ်ဂှ် ဂွံတီကေတ်ရ။
ညးဒုၚ်တာလျိုၚ်လလောၚ်ပရိုၚ် ကရောၚ်ပၞာန်ဥအဝ် (ထဝါဲ) ဂှ် ကြဴနူက္တဵုဒှ်ပေါဲဗ္တိုက်တုဲဂှ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်တုဲ ဒပ်ကံၚ်ဇြဳပၞာန်တံ ဟိုတ်နူဖျေံကၠုၚ်ဒၟံၚ် ကၚ်တောပ်ဗ္တိုက်တံ ဂၠိုၚ်ကၠုၚ်ဂှ်ရ ပေါဲဗ္တိုက်တံ သ္ကာတ်မြဟ်ကၠုၚ်မာန်ရောၚ်ဂှ် ဟီုရ။
ဟိုတ်ဂှ်ရ ယဝ်ရပေါဲဗ္တိုက်တံ ထပ်က္တဵုဒှ်ကၠုၚ်မ္ဂး နကဵုညးဍုၚ်ကွာန်တံ ညံၚ်ဂွိုအ်ဒးဒုၚ်ရပ်စပ်စကာ နဒဒှ်ဇွောံစဵုဒၞါပၞာန် ဒပ်ကံၚ်ဇြဳပၞာန်တံဂှ် လ္ပပါဲဒဴဘဲပၞာန် ပ္ဍဲကဵုဘာဗ္တောန်လိက်၊ ဘာလ္ၚောဝ်ကျာ်ခရေတ်ယာန်၊ ဘာလေံကျာ်တံအိုတ်ဂှ် ဖ္တိုက်ဖ္အောဝ်လဝ်ရ။
ပ္ဍဲဒေသ (အရှေ့တော) ထဝါဲဂှ် ကြဴနူဒပ်ပၞာန်သီအဝဵုတုဲ အကြာဒပ်ကံၚ်ဇြဳပၞာန်ကဵု ဒပ်စဵုဒၞါဒေသတံဂှ် ပေါဲဗ္တိုက်ဇီုမုက်တံ ဆက်က္တဵုဒှ်လဝ်တုဲ လ္ပာ်သ္ကုတ်ဂၠံၚ်ထဝါဲ−ထဳခဳတံဂှ်လေဝ် ဟိုတ်နူပေါဲဗ္တိုက်တံတုဲ ဂၠံၚ်ကၟာတ်တံ ကေုာံ ဒးဒုၚ်ဗၞတ်ဗ္ၜတ်ဒၟံၚ် အခေါၚ်အာကၠုၚ်တံဂှ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)