မတ်မလီု၊ ဂျာန္နဝါရဳ(၁၄)
အခန်ကၞာန်တ္ၚဲကောန်ဂကူမန်မရနုက်ကဵု(၇၆)ဝါ ဗဟဵု ကၠုၚ်စိုပ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၅)ဏံဂှ် ကၠောန်ဗဒှ်အာ ပ္ဍဲဍုၚ်လဂုၚ်၊ ၝောံခန်မျာန်မာကောန်ဗေယှေန်ဇြေန်တာ (MCC) မၞုံ ပ္ဍဲဂၠံၚ်မေန်ဓမ္မရောၚ်ဂှ် ကဝ်မတဳကၠောန်ဗဒှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္ပသ္ဇိုၚ်ကဵု တ္ၚဲပ္တန်ကၠုၚ်ဍုၚ်ဟံသာဝတဳ ဂိတုမာ်မွဲစွေက်တုဲ တ္ၚဲကောန်ဂကူမန် ကၠောန်ဗဒှ်ကၠုၚ်ဒၟံၚ်ဂှ် ပ္ဍဲဌာန်ကောန်ဂကူမန်ဂမၠိုၚ် နွံတန်တဴဒၟံၚ် တွဵရးဍုၚ်မန်၊ တွဵုရးကရေၚ်၊ ရးတၞၚ်သဳ ကေုာံရးဗဂေါတအ် ကၠောန်ဗဒှ်ကၠုၚ်ဒၟံၚ် ကဆံၚ်ကွာန်၊ ကဆံၚ်ပွိုၚ်ဍုၚ်၊ ကဆံၚ်ဗဟဵု ဇၟာပ်ပ်သၞာံရ။
အခန်ကၞာတ္ၚဲကောန်ဂကူမန်ဗဟဵု ကၠုၚ်စိုပ်ပ္ဍဲသၞာံဏံဂှ်မ္ဂး စဳဇန်လဝ်သွက်ဂွံကၠောန်ဗဒှ်အာ ပ္ဍဲၝောံခန် MCC မၞုံပ္ဍဲဍုၚ်လဂုၚ် ပွိုၚ်မွဲတ္ၚဲဓဝ်ဟေၚ်တုဲ ပါဲနူပေါဲပြိုၚ်လိက်ပတ်တုဲ ဟွံဒှ်ကၠောန် ပေါဲပြိုၚ်လှ်ေဒိၚ် ကေုာံပေါဲပြိုၚ်ဒယှ်ေဒွက်တအ်ရဂှ် ဥက္ကဋ္ဌကၠောန်ဗဒှ် နာဲအံၚ်ထူ ဟီုသ္ဂးလဝ်ရ။
အခန်ကၞာတ္ၚဲကောန်ဂကူမန်ဗဟဵု သၞာံတုဲတုဲကၠုၚ်တေံဂှ် ၜိုန်ရကၠောန်ဗဒှ်ကၠုၚ်ဒၟံၚ် ပွိုၚ် (၃)တ္ၚဲကီုလေဝ် ပ္ဍဲသၞာံဏံမ္ဂး ဟိုတ်နူအကာဲအရာ ပရေၚ်ဍုၚ်ကွာန်တုဲ ကၠောန်ဗဒှ်အာ ဗွဲခမ္ဍန်ရဂှ် သ္ဂးလဝ်ရ။
ဂတဵုမုက်ပစူတိ တ္ၚဲကောန်ဂကူမန်မရနုက်ကဵု(၇၆)ဝါဂှ်မ္ဂး ဓမံက်ထ္ၜးလဝ် ဗီုရုပ်မပ္တံကျာ်ဍိုတ်ဗကာံ၊ ကျာ်ဍိုတ်သဓီု၊ ကျာ်ဍိုတ်ဒွါရဝတဳ မထ္ပက်ချူပုတ်လဝ် လိက်တၟံဘာသာမန် ပ္ဍဲကျာ်ဍိုတ်ဂကူမန် စတမ်ဂွံဆဵုညာတ်ကေတ်လဝ် ပ္ဍဲအေဒဳ ၆ ဗွဝ်ကၠံကဵု ၇ ဗွဝ်ကၠံသၞာံတအ်ရ။
ပ္ဍဲလတူဏံဂှ် ရန်တၟံလဝ်ကဵု သွက်သၟတ်ခေတ်ကာလတအ်သီုဖအိုတ် ဂွံစွံၚုဟ်မး ထိၚ်ဒက်မၚ်မွဲအာကီု၊ သွက်ဓမံက်ထ္ၜး သၠုၚ်ပတိုန် ဂကူဘာသာ သာသနာယေန်သၞာၚ်ကီုရဂှ် ကဝ်မတဳကၠောန်ဗဒှ် ဟီုသ္ဂးလဝ်ရ။
အခန်ကၞာတ္ၚဲကောန်ဂကူမန် သၞာံရတုဗိုတ် မရနုက်ကဵု(၇၅)ဝါ ဗဟဵု တုဲကၠုၚ်တေံဂှ် ၜိုန်ရစဳဇန်လဝ် သွက်ဂွံကၠောန်ဗဒှ်အာ ပ္ဍဲၝောံခန်တွဵုရးဍုၚ်မန် ရန်လဝ်ဗွဲကိုပ်ကၠာကီုလေဝ် သွက်ဂွံကၠောန်ဗဒှ် ညံၚ်ဂွံနွံကဵုကြက်ရှ်သာ ကေုာံသွက်ဂွံကၠောန်ဗဒှ် ဗွဲမသၠဲလးမာန်ကီုတုဲ ပြံၚ်သၠာဲကၠောန်ဗဒှ်ကၠုၚ် ပ္ဍဲဗုဒ္ဓတက္ကသိုလ်ရာမညရဋ္ဌ မၞုံပ္ဍဲဍုၚ်မတ်မလီုရ။
ပရိုၚ်-သြၚ်လောန်တိုၚ်(မ်)