ဖရူဇြော – ဂျာန္နဝါရဳ(၁၄)
ပ္ဍဲတွဵုရးကရေၚ်ဍာဲ ပွိုၚ်ဍုၚ်ဖရူဇြော သုၚ်စောဲဂၠံၚ်ဍာန် နာန်ဖေဝ်-ဗဝ်လခေဝ် ကေုာံထူချောၚ်တုဲ ညံၚ်ဟွံဂွံသ္ပ ပရေၚ်အာကၠုၚ်တရဴ ကေုာံပရေၚ်ကူသာန်သွံရာန်ဂှ် ဒပ်ပရေၚ်စဵုဒၞာကောန်ဂကူကရေၚ်ဍာဲ KNDF ကဵုလဝ်သတိရ။
စတမ်နူ ဂိတုဂျာန္နဝါရဳ စၟတ်တ္ၚဲ (၁၂)တုဲ တ္ၚဲအပိုၚ်ခြာဟၟဲ ကၟာတ်လဝ်ယာယဳရောၚ်ဂှ် KNDF တံဒပ်လၟိဟ်-၁၆ ဂှ် လလောၚ်တြးလဝ် ပရိုၚ်ရ။
ကံၚ်ဇြဳပၞာန် သုၚ်စောဲဒၟံၚ် ဂၠံၚ်ဍာန်ဂှ်တုဲ သုၚ်စောဲဒၟံၚ် သွက်ဂွံဗပေၚ်ဇြဟတ် ဇွောံမ ကေုာံဇြဟတ်မၞိဟ်တုဲ ဟိုတ်နူ ကွဳစက်ပလံၚ်ကောန်ကမၠောန် ညးဒေသဟွံသေၚ်တအ် သုၚ်စောဲဒၟံၚ်တုဲ ကၟာတ်လဝ်ရဂှ် ညးမၞုံတာလျိုၚ်လလောၚ်ပရိုၚ် KNDF ကိုဝ်ဖျိုဝ် ဟီုသ္ဂးလဝ်ရ။
“ဂၠံၚ်ဇၞော်နာန်ဖေဝ်ဂှ် ပေါဲဗတိုက်ဒှ်လဝ်ပေၚ်ၚ်ရ၊ ဒှ်ဒၞာဲအာကၠုၚ် ဟွံဂွံရ။ လအ်မံၚ်ယျလေဝ်။ ညးလဵုလေဝ် အာကၠုၚ်ဟွံဂွံပုဟ်။ ညးဒေသတအ်လေဝ် ဟွံအာကၠုၚ်ပုဟ်။ လပါ်ဏံဂှ် ဗီုဟီုနူကၠာဂှ်ရ ကွဳစက်ပလံၚ်သၟာကမၠောန်တအ် နူလပါ်မဝ်ချဳတအ် မုတအ် ညးဒေသဟွံသေၚ်တအ်ဂှ် စိုပ်ကၠုၚ်မံၚ် ဗီုပြၚ်ဓလုက်ရ” ဂှ် ညးတာလျိုၚ်လလောၚ်ပရိုၚ် KNDF ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန် ဟိုတ်နူစၟဳစၟတ်ဆဵုညာတ်ဒၟံၚ် ကွဳစက်ဓလုက်တအ်ဂှ်ရ ပ္တိတ်လဝ်လိက်လလောၚ်တြး ညံၚ်ညးဍုၚ်ကွာန်တအ် ဟွံဂွံသုၚ်စောဲဂၠံၚ်ဏံရဂှ် ညးဆက်ဟီုလဝ်ဏီရ။
အခိၚ်လၟုဟ်ဏံဂှ် ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် လွိုၚ်ကဝ် ကေုာံဒဳမအ်ဇြော နကဵုကရောပ်ပၞာန်ပိကရောၚ်ပၞာန် လပါ်ကုန်တြဴမိုၚ်တုဲ ပရေၚ်ဇီုကပိုက်ဒၟံၚ်ကဵု ဒပ်ပရေၚ်စဵုဒၞာဒေသတအ် နွံဒၟံၚ်ရဂှ် ဂွံတီကေတ်ရ။
ပ္ဍဲကဵုတွဵုရးကရေၚ်ဍာဲဂှ် ဟိုတ်နူကံၚ်ဇြဳပၞာန် သုၚ်စောဲဒၟံၚ် ဂၠံၚ်ဇၞော်ကၟိန်ဍုၚ် ဂၠံၚ်လွိုၚ်ကဝ်-မဝ်ချဳ ကေုာံဂၠံၚ်တၞဟ်သ္အာၚ်တအ်တုဲ ဒပ်ပရေၚ်စဵုဒၞာဒေသဂမၠိုၚ် ပတေၚ်ဂြတ်လဝ် ပရေၚ်စၟဳစၟတ်ရ။
ပ္ဍဲအခိၚ် ဒပ်ပၞာန်သီလဝ်အဝဵု ပွိုၚ် (၂၂)ဂိတုဂှ် ပ္ဍဲတွဵုရးဍုၚ်သေံ သၠုၚ်ကျာ မိုဝ်ဗျာ၊ ဖေဝ်ခုၚ် ကေုာံ တွဵုရးကရေၚ်ဍာဲတအ်ဂှ် ပေါဲဗတိုက် ပံၚ်(၅၄၅)ဝါ က္တဵုဒှ်လဝ်ရဂှ် ဂကောံဇြဟတ်ညးဍုၚ်ကွာန်ကရေၚ်ဍာဲ PKPF လလောၚ်တြးလဝ် ပရိုၚ်ရ။
ပရိုၚ်-သြၚ်လောန်တိုၚ်(မ်)