မတ်မလီု၊ ဂျာန္နဝါရဳ (၁၇)
ပ္ဍဲတွဵုရးဍုၚ်မန် အပ္ဍဲသၞာံ ၂၀၂၂ ပွိုၚ်မွဲသၞာံ ဒပ်ပၞာန်သီလဝ်အဝဵုဂှ် ရပ်ဒက်ဂွံလဝ် ကုညးကလိလောန် ဖံက်ပလီုသၞောဝ်ဥပဒေ ပရေၚ်ဗ္တိုက်ပလီု ပွပကီုပရာပ်တံ (၂၁၆) တၠမာန်လဝ်ဂှ် ဝန်ဇၞော်ပရေၚ်ဂီုကၠီုတွဵုရး ကေုာံ ကေၚ်ကာပယျဵု ကံၚ်ဇြဳပၞာန် သ္ကိုပ်ဗိုလ်ဇၞော် ကျဝ်ဇြဲမျေတ် ဟီုရ။
ပ္ဍဲကဵုကောံဓရီုဗဟဵုကံၚ်ဇြဳပၞာန် ပရေၚ်ဗ္တိုက်ပလီုပွပကီုပရာပ် လိက်စၞောန်ပၞုက် မမံက်တိတ်ကၠုၚ်ဂှ် အခိၚ်မပ္တိုန်ထ္ၜး စပ်ကဵုအကာဲအရာ တွဵုရးဍုၚ်မန်ဂှ် သ္ကိုပ်ဗိုလ်ဇၞော်ကံၚ်ဇြဳပၞာန် ကျဝ်ဇြဲမျေတ် ဟီုဂးလဝ်ရ။
သ္ကိုပ်ဗိုလ်ဇၞော်ကျဝ်ဇြဲမျေတ်ဂှ် အပ္ဍဲတွဵုရးဂှ် ထ္မံက်ပ္တိတ်ဂွံလဝ် ကုရဲကလိလောန်ဖံက်ပလီု သၞောဝ်ဗ္တိုက်ပလီု ပွပကီုပရာပ်တံ (၅၁၀) တၠတုဲ ပ္ဍဲကဵုဂှ် (၂၁၆) တၠဂှ် ရပ်ဒက်မာန်လဝ်တုဲ ပံက်လဝ်အမှု (၄၁၆) အမှု နကဵုသၞောဝ်ပကီုပရာပ်ရောၚ်ဂှ် သ္ဂးရ။
ပ္ဍဲတွဵုရးဍုၚ်မန်ဂှ် ဒဒှ်မဂၠံၚ်ဍာန်ဒဒန် ဒးဒုၚ်ဖံက်ပလီုဂှ် နွံလဝ် (၇၀) ဝါတုဲ တာဝါတိုၚ်ပရေၚ်ဆက်စၠောံ ဒးဒုၚ်ဖံက်ဗ္တိုဟ်မာၚ်ဂှ် (၁၁၆) ဝါ နွံလဝ်တုဲ ဟိုတ်နူကဵုလၟေၚ်ဒဒှ်ပန်ဂစိုတ်တံတုဲ (၁၀၅) တၠ ချိုတ်အာလဝ်တုဲ မၞိဟ်ကလိဂွံဝပ် (၂၈၂) တၠ နွံလဝ်ဂှ် သ္ကိုပ်ဗိုလ်ဇၞော်ကျဝ်ဇြဲမျေတ် ဟီုရ။
ပ္ဍဲကဵုကောံဓရီုဂှ်ဂှ် အခိၚ်မရေၚ်တၠုၚ် လၟေၚ်ကမၠောန် စပ်ကဵုပေါဲရုဲမာဲ သွက်ပေါဲရုဲမာဲ သၞာံ ၂၀၂၃ ဏံဂှ် ကၠောန်သ္ပကၠုၚ် ပွပကီုပရာပ်တံမာန်တုဲ ပွမယိုက်ဏာနၚ်လွဟ်လက်နက် ကေုာံ ပြဟ်ဒုၚ် ဂၠိုက်ဂၠါဲကေတ်ပရိုၚ် ထ္မံက်ပ္တိတ် ကု PDF တံကီု၊ ကဵုလညာတ်ပညာ ကုညးဍုၚ်ကွာန်တံကီုဂှ် ကၠောန်ၜိုတ်ဒၟံၚ်ရောၚ်ဂှ် ညးသ္ဂးရ။
အခိၚ်လၟုဟ်ဂှ် ကံၚ်ဇြဳပၞာန်ဝွံ ပ္ဍဲတွဵုရးဍုၚ်မန်ဂှ် လက္ကရဴဏံ ရပ်ဒက်ကၠုၚ်ဒၟံၚ် ကုညးမကဵု Like ၊ ချူ commend ပ္ဍဲသၟဝ်မုက်လိက်ဇာဇၞိက်ပရေၚ်မၞိဟ် ညးမကၠောန်ဒၟံၚ်ပရေၚ်ပၠန်ဂတးတံဂှ် ကၠောန်ၜိုတ်ကၠုၚ်ဒၟံၚ် အဆက်က်ရ။
ကုညးဒးဒုၚ်ရပ်ဒက်ဟွံဗဗွဲဓဝ်တံဂှ် ကံၚ်ဇြဳပၞာန် ကေတ်ဒုဟ် မ္ၚးနူကဵုသၞောဝ်ဥပဒေရာဇာသာတ်ဇၞော် ၝောံပိုဒ် ၅၀၅−ကဂှ် သၞောဝ်ဥပဒေ ဗ္တိုက်ပလီုပကီုပရာပ် ၝောံပိုဒ် ၅၂(က) ၊ ရာဇာသာတ်ဇၞော် ၝောံပိုဒ် ၁၂၄−က၊ သၞောဝ်ဥပဒေ ပရေၚ်ဆက်စၠောံသၞောတ်အဳလက်ထရောနေတ် ၝောံပိုဒ် ၃၃ (က) တံသၟးဟွံက သီုကဵုသၞောဝ်ဥပဒေတန်တဴတံဂှ်တုဲ ဖျေံစၟတ်ဒၟံၚ် ဒဏ်ထံၚ် သၞာံဇမၠိၚ်တအ်ရ။
ပရိုၚ်−သြၚ်လောန်တိုၚ်(မ်)