လှာဒကှ်၊ ဂျာန္နဝါရဳ (၁၇)
ဒဒှ်မကၟာတ်လဒဵုအခေါၚ်အာကၠုၚ် ယာန်ဖ္ဍိုက်ညးအာတရဴ ပ္ဍဲဂၠံၚ်လှာဒကှ်−ကျာ်ပိ၊ ပွိုၚ်ဍုၚ်လှာဒကှ်၊ တွဵုရးကရေၚ် ပွိုၚ် (၈) တ္ၚဲဂှ်ဝွံ ဒၟါနူပေါဲဗ္တိုက်တံ ဆက်က္တဵုဒှ်ဒၟံၚ်ဂှ်ရ ဂွိၚ်ဖေက် ညးဍုၚ်ကွာန်အာတရဴတံ ဇီုကပိုက်တုဲ ကၟာတ်လဒဵုလဝ်ရောၚ်ဂှ် ညးမၞုံအခေါၚ်ဟီုဂး KNU ဗဒိုဝ်သဝ်တဝ်နဳ ဟီုဂးလဝ်ရ။
အပ္ဍဲပွိုၚ်ဍုၚ်လှာဒကှ်ဂှ် ပေါဲဗ္တိုက်တံ က္တဵုဒှ်ဒၟံၚ် ဗွဲမသ္ကာတ်မြဟ်ဂှ်ရ ညးဍုၚ်ကွာန်အာတရဴတံ ပ္ဍဲအရာအာကၠုၚ်တရဴဂှ် က္တဵုဒှ်ဒၟံၚ် အကာဲအရာ အန္တရာယ်နွံ ဗွဲမလောန်ရောၚ်ဂှ် နကဵုစၟတ်တဲ ညးအုပ်ကာ ခရိုၚ်ဒူပလာယာ ဗော်သွးကောန်ဂကူကရေၚ် KNU သဝ်လေဿတာန်ဂှ် လလောၚ်ပ္တိတ်လဝ်ရ။
အတိုၚ်တၚ်လလောၚ်တြးဂှ်မ္ဂး နကဵုယာန်ဖ္ဍိုက်မၞိဟ်အာတရဴ ဂၠံၚ်လှာဒကှ်−ကျာ်ပိဂှ် စနူတ္ၚဲဏံ ဂိတုဂျာန္နဝါရဳ (၁၆) စဵုကဵု ဂိတုဂျာန္နဝါရဳ (၂၃) ဂှ် လ္ပကၠောန်သ္ပအာကၠုၚ်လးလးဂှ် ခရိုၚ်ဒူပလာယာ KNU ကဵုလဝ်သမ္တီရ။
ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳဂှ် တၚ်လလောၚ်ပ္တိတ်ဏံဝွံ ဂွိၚ်ဖေက်ညးဍုၚ်ကွာန်တံ ဇီုကပိုက်တုဲ ဒးလလောၚ်ပ္တိတ်လဝ်ရောၚ်ဂှ် ဟီုရ။
“ပေါဲဗ္တိုက်လၟုဟ်တံဂှ်တှ်ေ ဒဵုကဵုတ္ၚဲဏံ က္တဵုဒှ်ဒၟံၚ် ဇၟာပ်ပ်တ္ၚဲရ၊ ဒေသအတေံဂှ်တှ်ေ သာပရေံရ၊ က္တဵုဒှ်လဝ် အကာဲအရာ လုပ်ဗ္တိုက်လဝ် သီုကဵုတမ်ဒပ် ပိတမ်ဒပ်ရ၊ သ္အာၚ်နူဂှ်ပၠန် ပ္ဍဲကဵုပွဳပွူဗ္ဒါဲဗ္ဒါဲတံဂှ်လေဝ် ပေါဲဗ္တိုက်တံ က္တဵုဒှ်ဒၟံၚ် ဗွဲမဇၞော်ကဵုဇြဟတ်ရ၊ က္တဵုဒှ်ဒၟံၚ်တုဲ ယဝ်ရညးဍုၚ်ကွာန်တံ အာကၠုၚ်မ္ဂး ဂွိၚ်ဖေက်ဇီုကပိုက်ဒးတုဲ ဟိုတ်ပရူပရာဏံရ၊ ညအ်ဂှ်လေဝ် သွက်ညးဍုၚ်ကွာန်တံရ၊ ပရူပရာတၞဟ်ဟ်ဂှ် ဟွံမွဲပုဟ်၊ ပ္ဍဲဂှ်လေဝ် ထ္မံက်ထ္ၜးလဝ်တုဲတုဲရ” သာ်ဝွံ သ္ဂးရ။
စပ်ကဵုတၚ်လလောၚ်တြး ခရိုၚ်ဒူပလာယာ KNU ဂှ်တုဲ နကဵုညးဍုၚ်ကွာန်မှာဇန်တအ် သွက်ဂွံပံၚ်တောဲပါလုပ် ဒ္ဂေတ်ဗက်ရေၚ်တၠုၚ်ကဵုအိုတ်ဂှ် ကောန်ဂကောံဒပ်ပံၚ်ကောံ KNLA မချဳဒရာၚ်ဒၟံၚ် အပ္ဍဲပွိုၚ်ဍုၚ်လှာဒကှ်တအ်လေဝ် ဒုၚ်လဝ်ဂုဏ်နမေတ္တာရ။
ပ္ဍဲဂိတုဂျာန္နဝါရဳ (၄) တုဲကၠုၚ်တေံ ဂကောံဒပ်ပံၚ်ကောံ ဒပ်မဟာ(၆) KNLA တံ လုပ်စိုပ်ဗ္တိုက်လဝ် ဗ္ဒိုပ်ဖျေံသ္ဇိုၚ် တမ်ဒပ်ကံၚ်ဇြဳပၞာန်ဂမၠိုၚ် ခလရ (၂၈၃) ၊ ခလရ (၂၈၄) ၊ ခလရ (၃၂) မၞုံဗ္ဒါဲဍုၚ်လှာဒကှ် မၞုံအပ္ဍဲတိဍာ်ထိၚ်ဒဝ်ခရိုၚ်ဒူပလာယာ KNU တံဂှ် မွဲအခိၚ်ဓဝ်ရ။
ပ္ဍဲကဵုပေါဲဗ္တိုက်ဏံဂှ် လ္ပာ်ဒပ်ကံၚ်ဇြဳပၞာန် ဇီုကပိုက်ချိုတ်အာလဝ် ဂၠိုၚ်ဂၠေၚ်လဝ်တုဲ လ္ပာ်ဂကောံဒပ်ပံၚ်ကောံ KNLA တံဂှ်လေဝ် ဇီုကပိုက်ပြဟ်လလုဲတံ နွံလဝ်ရ။
ကြဴနူ ဗ္ဒိုပ်ဌာန်ဂအုပ်တမ်ဒပ်တံ ဒးဒုၚ်ဗ္တိုက်သာ်ဏံတုဲဂှ် ဒပ်ကံၚ်ဇြဳပၞာန်ဝွံ မ္ၚးနူထောံမခတိုဟ် နကဵုက္ၜၚ်ကျာ ပ္ဍဲကွာန် မၞုံဗ္ဒါဲဗ္ဒါဲဍုၚ်လှာဒကှ်တံသၟးဟွံ သီုကဵုပန်ပှော်လဝ်လွဟ်ဇၞော် ကြာန်န်တအ်ဂှ် ကၠောန်ၜိုတ်လဝ်တုဲ လုပ်စိုပ်ထ္ပက်ကရောၚ်ပၞာန်တုဲ ကၠောန်သ္ပလဝ် ပရေၚ်ချဳဒရာၚ်ပရေၚ်ပၞာန်တံဂှ်ရ ဆက်က္တဵုဒှ်လဝ် ပေါဲဗ္တိုက်ဆေၚ်မုက် ကုဒပ်ပံၚ်ကောံ KNLA တံရ။
ကရောၚ်ပၞာန်ဒပ်ကံၚ်ဇြဳပၞာန် မလုပ်စိုပ်ချဳဒရာၚ်ဒၟံၚ်ပရေၚ်ပၞာန် အပ္ဍဲပွိုၚ်ဍုၚ်လှာဒကှ်တံဂှ်ဝွံ မ္ၚးနူရပ်ဒက်ဂစိုတ်ဂယိုၚ် ရပ်စပ်ကောန်အရာပ်တံ နဒဒှ်ဇွောံစဵုဒၞါပၞာန် ကေုာံ ကဵုယိုက်ကပေါတ်ပၞာန်တံဂှ် သီုကဵုကၠောန်ၜိုတ် စံၚ်ပလီုပလာ်ဒၟံၚ် ဗ္ဒိုပ်သၞေဟ်ကၚ် KNU မွဲဗ္ဒိုပ် ကေုာံ သ္ၚိဒၟံၚ်ညးဒေသတံရောၚ်ဂှ် ဂကောံပရေၚ်အုပ်ဓုပ်ညးဍုၚ်ကွာန် ပွိုၚ်ဍုၚ်လှာဒကှ် လလောၚ်ပ္တိတ်လဝ်ရ။
ဒၟါနူပေါဲဗ္တိုက်ၜါလ္ပာ်တံတုဲ အခိၚ်လၟုဟ်ဂှ် ညးဍုၚ်ကွာန်ဒေသ (၁၆၀၀၀) ပြၚ် နူကဵုအပံၚ်ကွာန် (၂၀) ပြၚ် မၞုံအပ္ဍဲပွိုၚ်ဍုၚ်လှာဒကှ်တံဂှ်ဝွံ ဒးဂြိပ်ဒဴပါဲဒလေတ်ဒၟံၚ်ဘဲပၞာန်ရောၚ်ဂှ် ဂွံတီကေတ် နူကဵုစရၚ် ဂကောံပရေၚ်အုပ်ဓုပ်ညးဍုၚ်ကွာန် ပွိုၚ်ဍုၚ်လှာဒကှ်တံ မကံက်ကပှ်လဝ်တၚ်နၚ်တံဂှ်ရ။
ပရိုၚ်−သြၚ်လောန်တိုၚ်(မ်)