တိုဝ်ကျိုဝ်၊ ဂျာန္နဝါရဳ (၁၇)
ဂျပါန် ကေုာံ အိန္ဒိယတံ ပံၚ်တောဲတုဲ စကၠောန်ၜိုတ်ဒၟံၚ် ပွမပဝ်ယာန် ပ္ကတ်ပ္ကေၚ် ပရေၚ်ပၞာန်ပံၚ်တောဲ က္ၜၚ်ကျာဂျက်ဗ္တိုက် အလန်ပထမကိုပ်ကၠာအိုတ် ပ္ဍဲဗ္ဒါဲဍုၚ်တိုဝ်ကျိုဝ်ရ။
ပွမဒးကၠောန်သာ်ဏံဂှ်ဝွံ သွက်ဂွံမၚ်ရံၚ် ဇြဟတ်ပရေၚ်ပၞာန် ဍုၚ်ကြုက် မဇၞော်ကၠုၚ်ဂှ်ကီု နဒဒှ်ရေၚ်တၠုၚ် သၠုၚ်ပ္တိုန်အသိၚ် တၚ်တုပ်စိုတ်ပရေၚ်ဂီုကၠီုဂမၠိုၚ် ကေုာံ ပရေၚ်စဵုဒၞါကၟိန်ဍုၚ်တံဂှ်တုဲ ကၠောန်လဝ်ရောၚ်ဂှ်လေဝ် ဌာနဝန်ဇၞော်ကာစဵုဒၞါဂျပါန် ဟီုဂးလဝ်ရ။
ပ္ဍဲကဵုပွမပ္ကတ်ပ္ကေၚ်ပရေၚ်ပၞာန်ပံၚ်တောဲ မလအ်အာ ပွိုၚ် (၁၁) တ္ၚဲဏံဂှ် နူအိန္ဒိယဂှ် က္ၜၚ်ကျာဗ္တိုက် ၄၊ က္ၜၚ်ကျာပရေၚ်ပလံၚ်ဗစိုပ် ၂ ကေုာံ က္ၜၚ်ကျာဗပေၚ်ကၠေၚ်တံ ပါလုပ်တုဲ ဂျက်ဖိုက်တာဂျပါန် ၈ ပါလုပ်ဂှ် သ္ဂးလဝ်ရ။
အပ္ဍဲပရေၚ်ပ္ကတ်ပ္ကေၚ် ပရေၚ်ပၞာန်ပံၚ်တောဲ မပ္ကတ်ပ္ကေၚ်အာ ပ္ဍဲဗ္ဒိုပ်ဒပ်ကျာ ဟိုၚ်ကူရဳ မၞုံဒေသအဳဗာရာကဳ လ္ပာ်ဗၟံက်သၟဝ်ကျာ ဍုၚ်တိုဝ်ကျိုဝ်ဂှ် သၞာဲဒဴဒပ်ကျာအိန္ဒိယ (၁၅၀) သွက်ဂွံပါလုပ်အာဂှ် နွံဒၟံၚ်ရ။
ပွမပ္ကတ်ပ္ကေၚ်ပရေၚ်ပၞာန်ပံၚ်တောဲတံဝွံ စတုပ်လဝ်စိုတ် နူကဵုသၞာံ ၂၀၁၉ မကၠောန်ဗဒှ်လဝ် ပေါဲသဳကၠဳ ဝန်ဇၞော်ကာဍုၚ်သ္အာၚ် ကေုာံ ကာစဵုဒၞါ မၞုံအကြာၜါဍုၚ် အိန္ဒိယ ကဵု ဂျပါန်တံဂှ်တုဲ ဟိုတ်နူဘဲကပ်တုဲ ဒးပဆုဲပြံၚ်လဝ်ရ။
မွဲကရောံကဵုဂျပါန်၊ အိန္ဒိယတံဂှ် အဝ်သတြေလျ ကေုာံ ကၟိန်ဍုၚ်ပံၚ်ကောံအမေရိကာန်တံဝွံ ဒှ်ဍုၚ်လုပ်ဂကောံ Quad တံမဒှ်တုဲ လ္တူပရေၚ်ပၞာန်ကြုက် ကေုာံ ပရေၚ်ပိုန်ဒြပ်ကြုက်တံ မအုပ်ဓလီုကၠုၚ်တံဂှ် ပရေၚ်ဂွိၚ်ဂွါဲစံၚ်တူတံ သၠုၚ်တိုန်ဒၟံၚ်ရ။
တိုဝ်ကျိုဝ်ဝွံ ပ္ဍဲကဵုကာလလၟုဟ်ဂှ် ဆက်စပ်ကဵုဍုၚ်ကြုက်တုဲ က္တဵုဒှ်ဒၟံၚ် ပရေၚ်ဒှ်ဓဝိၚ်ဂွိၚ်ဂွါဲတံဂှ်ရ ကၠောန်ၜိုတ်ဒၟံၚ် ပွပ္ကတ်ပ္ကေၚ်ပရေၚ်ပၞာန်ပံၚ်တောဲတံဖိုဟ်ရ။
ပ္ဍဲကာလဒဳဇြေမ်ဗာဂှ် အလဵုအသဳ သ္ကိုပ်ဝန်ဇၞော် ဖူမဳအဵုကဳယှဳတာဝွံ ပ္ဍဲသၞာံ ၂၀၂၇ ဏံ သွက်ဂွံသၠုၚ်ပ္တိုန် ခရိတ်အိုတ်ကာစဵုဒၞါၜါဆ စဵုကဵု GDP ၜါတၟံကၠံဂှ် ကဵုလဝ်ကတိတုဲ ဍုၚ်ကြုက်ဝွံ သွက်ပရေၚ်ဂီုကၠီု ဍုၚ်ဂျပါန်ဂှ် ဒှ်တၚ်ကော်ဆဴ မစှ်ေကဵုမဟာဗျူဟာ ဇၞော်အိုတ်ရောၚ်ဂှ်လေဝ် ဟီုဂးလဝ်ရ။
ပ္ဍဲကဵုသတ္တာဟတုဲကၠုၚ်တေံဂှ်လေဝ် ဍုၚ်ဂျပါန်ဝွံ ထ္ပက်လဝ်စၟတ်တဲ တၚ်တုပ်စိုတ်ကာစဵုဒၞါတၟိ ကုဗျိတိၚ်တုဲ ကုဝါယှေန်တာန်ဂှ်လေဝ် သွက်ဂွံသၠဲပ္တိုန် လိက်ကသုက်ပရေၚ်စဵုဒၞါ မွဲကေုာံမွဲဂှ် တုပ်လဝ်စိုတ်ရ။
Ref: AFP